Read Achang DANIEL 10 Bible Online

DANIEL 10 - Achang bible

DANIEL 10

¹Persia hwankti Kuru, hwankti doq dah somh vzvn lyis Belteshaza ge dah Daniel gas loeus dang nyoqnyvng dyei zis xauh. Hauh zis gas jyoeng, nghuot laus eq svsoh seqgyo nanh.[16] Nyoqnyvng mas nyang lyis hauh zis phui kyoh.

²Hauh shishenh lyis ngos somh daus nhaiqkuk nyeis.

³Hau somh daus ma lai dvchank ngos wom gis ma zo, shoh ma zo, zvbiq ma shuk, ma saiq.

⁴Hauh zvn cangxeih lhamhmuh khyvp aiqci nyei vnyeih lyis ngos gas Tigri jeismuh lvng jyankyvm mas yap joq.

⁵Ngos yoeuh kat las misyhwiq dyimis wuot, xing gyingh dyichih chih dah vbusbih dvyuk lyis nyvng.

⁶Nyah gungs gas phauhdap luk teh bvng, nyah nyoqnho ka maunyoq nyik teh bvng, nyah nyoqjeih nyiduk teh, nyah khyei yahge nyah loqyom gas buot ying toh dah thunk teh bvng. Nyah thwe ka moqjens zainsmuh kaiq teh nyings.

⁷Hauh nyoqnyvng lyis nyvng soeu ka ngos kyingh dvnghuot. Ngos yah dvgeh nghuot bang gas cha ma nyvng, nghuot laus eq nyamoq gyuk dvn wuih zis yah tamh joq.

⁸Houmha ngos kyingh nyet joq zis yah hai mauhphoh nyoqnyvng lyis zungh yoeuh nyeis. Ngos yom ma bos lo, ngah nyoqnho eq thaiq loh las hank eq ngos lyis ma doq yoeuh lo.

⁹Ngos nyah thwe xauhgyo lyis, nyeisjvng mas wuqdung lvgop chuot lains joq.

¹⁰Housoeh loq dvkoeuq ngos lyis los zwi las, ngah loq yahge phvlukchvp yah du nhang toh. Ngos nvn nyeis shih.

¹¹Hau loeuswons soeu ngos lyis taiq, Daniel eh, Mangso nvng lyis jyet. Toq yap las ngos cha taiq das zis vlhomuh kamp gyo aq. Ngos lyis nah jyank mas nhang kat, ge. Nyang haih zis dye taiq lyis, ngos nvn zis yah toq yap.

¹²Housoeh nyang taiq, Daniel eh, vgyuk; seqgyo cho yoh das xiklyis nvng nah Mangso xikkhonh mas ehnyet nyhen mha gyoh das ge cangxeih nghamh thyet nyeih masyah nvng dung dang lyis Mangso xauhgyo goeus. Ngos nvng dung dang lyis phuk taiq das xiklyis jweh los.

¹³Persia munghdan zaulo, loeuswons soeu ka ngos lyis aiqci dvnyeih kyamp gos toh. Hauh thang lhyi loeuswons vgyis jens mas dah Mikhael ka ngos lyis los pangh, khasoeh ge lyis hau Persia mas ngos dvyuk kyingh gyoh nyeis khoq.

¹⁴Thang pheh nah dius jens mas cha bweh los das zis seqgyo nhang das xiklyis ngos los. Heika thang pheh jweh los das cho nyoqnyvng nghuot, ge.

¹⁵Nyang haih zis taiq lyis ngos gas dang ma yoh taiq, nyeisjvng mas yoeuh tsuk toh.

¹⁶Hauh uhlyis, cangsoeu teh doeus dah loeuswons soeu ka ngah nhuotkuk mas los tanh. Housoeh ngos nyang lyis taiq, Svra eh, haih nyoqnyvng yah ngos lyis yom svsoh nhuk nhang lha ngos nvn zis ma yoh no.

¹⁷Ngos gas jons dvyuk nyah svra xikkhonh mas yap joq teh nghuot. Ngos nvng lyis khasoeh yoh jis das? Ngos yom ma bos, nghuot ya ngos soq she nanh, oen.

¹⁸Nyang ngos lyis dvlhain doms zwi las ngos yom zes bos los nyhink.

¹⁹Nyang taiq, Mangso nvng lyis jyet, vgyuk, nyenstap nyeis aq, yombos aq, yomhuont aq, ge. Nyang haih zis taiq lyis ngos yom zes bos los nyhink las taiq, Svra eh, nvng ngos lyis taiq das zis taiq kyoh aq. Nvng ngos lyis zes gis shoq kuot dyei goeus, oen.

²⁰Nyang taiq, Ngos nah jyank mas chamus los zis nvng vseq lah? Houka Jyoeng Buk mas cha lhaih toh zis ngos nvng lyis phank xoeuq das. Gvshih ngos Persia lyis zungh dah loeuswons soeu lhyi zan das zis tauh loh chah. Hauh thang lhyi Greece lhyi zungh dah loeuswons soeu thuq los das. Houmha Israel dah zungh soeu loeuswons Mikhael mas lai las ngos lyis pangh das zis gohtoeu hank ma bos.