Read Achang DANIEL 12 Bible Online

DANIEL 12 - Achang bible

DANIEL 12

¹Jeiyhwiq dyimis wuot dah loeuswons soeu taiq. Hauh shishenh lyis nah dius jens lyis zungh dah loeuswons zainsmuh, Mikhael, thuq los das. Hauh thang lhyi yau dah shishenh jweh los das. Houka dius nyau duot xi masyah yau thank zis nghuot. Hauh shishenh jweh lyis Mangso dah buk mas nyings lhaih toh dah nah dius nyau dvnganh gas khyuot yoeus zis xauh das.

²Shei goeus bang nyoshoq doms dwis los das. Dvyhamh gas vcaiq vto kang yoh das, dvyhamh gas vcaiq vto ngelang gyoh zis xauh das.

³Joeui bos dah uhshe bang gas maukhung mha bvng zis teh bvng das. Dius jens nyoshoq lyis jus cho kuot das zis jyauh bang gas kyi teh vcaiq vto bvng das.

⁴Nyang ngos lyis taiq, Daniel eh, gvshih nvng sauhbuk nyheih las hauh thoq mas kyihau tap toh aq. Heika thang thank shishenh lyis bweh los das. Dius jens nyoshoq gas jyoeng dah joeui lung los das xiklyis e los xo wuih yenh das.

⁵Hauh thang lhyi ngos jeislvng yvm thyitvp haqtvp dvshot dvyuk yap joq, loeuswons aiq yuk lyis nyvng.

⁶Jeiyhwiq dyi wuot soeu dvyuk gas jeismons pheh yap joq dah loeuswons soeu lhyi, Hai mauhphoh cho nyuk los shoq khanyhank nyangh das lah, ge nyei.

⁷Loeuswons soeu ka, loq aiq shot yah maukhung pheh toeu lha vcaiq caiq Mangso nyings yoeus maukhi lha, Somh zvn dvkhyamh nghuot das. Mangso dah dius jens lyis shoeuhshih cho dye lyis haih muh dvnganh dye bweh das,[19] ge taiq yvlyis ngos xauhgyo, ge.

⁸Ngos nyang taiq zis xauhgyo laus eq hauh zis ma daq gyo. Housoeh las ngos nyei. Nghuot laus eq svra eh, hauh cho ka khasoeh thank das lah, oen.

⁹Nyang phuk taiq zis gas, Haih dang gas thang thank jweh shoq zauh shung toh chah zis nghuot yvmvyah Daniel eh, nvng gvshih nyenstap zis yah loh aq.

¹⁰Dius nyoshoq gas shangkyei los das. Lhung bang gas ma daq gyo das las lhung cho chank nyeis das. Joeui bos bang kyingh dvdaq gyo das.

¹¹Nyeih yau nyeih dah phudyei tung toh shishenh masyah, houka gyukphoh vchoqh vjyot lyis toeutsung shishenh masyah dvkhyoengh aiqxo gauci nyeih lai loh das.

¹²Dvkhyoengh somhxo somhci oeng nyeih lai shoq lomluk nyeis soeu ka ngelhoq.

¹³Daniel eh, nvng gas thank shoq lomluk aq. Nvng shei loh das laus eq thang thank shishenh lyis nvng phauh shangh zis xauh yoeus das xiklyis dwis toq los das, ge.