Read Achang DANIEL 3 Bible Online

DANIEL 3 - Achang bible

DANIEL 3

¹Hwankti Nebukhaneza gas 90 pe nyhang lha, vluk 9 pe lvm dah xing gungslho kuot las Babilon mauxom Dura janggyon mha toh.

²Hauh thang lhyi hwankti ka nyah zau jens dvnganh dvgeh los das xiklyis zaudang khyoq. Houka zaulo jens, mungh zau jens, jeszau jens, joeui dyei bang, ziszom bang, soetuon bang, zauguon bang yahge gohtoeu mauxom mas zau jens tsain nghuot. Nyamoq gas hwankti Nebukhaneza kuot toh gungslho lhyi lhom yoeus das xiklyis los tsain huom.

³Haih zau jens gas nyang kuot toh gungslho lhyi lhom yoeus das xiklyis gungslho xik mas dvgeh los tsain huom yap lyis,

⁴dang kyoh soeu kaiq hoeuh zis gas, Dius nyau, dius huh jens yahge nyingh gohtoeu toeu kat dah dius jens dvnganh eh,

⁵namoq gas lvbuh thwe thang lhyi, pvkhe, toenk, khvlhank [2] yahge chont toenk; thang lhyi gohtoeu dah toenk khvlhank nyhink kat thwe xauhgyo das. Hau thwe yungh xi yah dvyih namoq gas gop las hwankti Nebukhaneza kuot toh, xing gungslho lhyi paiq chah.

⁶Gop las ma paiq soeu hank lyis laus eq, hauh uhlyis nyang, duk nyeis dah nyikhyomp mas kat zis xauh das, ge.

⁷Housoeh las nyamoq toenk khvlhank thwe xauhgyo yah dvyih dius nyau, dius huh, nyingh gohtoeu toeu kat dah dius jens dvnganh gas hwankti Nebukhaneza kuot toh, xing gungslho lhyi gop las tsain paiq.

⁸Babilon jens dvyhamh toeuh yoeus las Yuda jens dah cho taiq hoeuh.

⁹Nyamoq hwankti Nebukhaneza lyis taiq, Hwankti kang xing bas jungh.

¹⁰Nvng hwankti nyang, thwe yungh xi yah dvyih yuk khanghmuh gas hau xing gungslho lhyi gop las paiq chah ge zaudang khyoq goeus.

¹¹Gop las ma paiq soeu hank laus eq duk nyeis nyikhyomp mas kat zis xauh das, ge goeus.

¹²Nghuot laus eq Babilon mauxom mha nvng yoeuh nhang toh dah Yuda dius dvyhamh Shadrak, Meshak, Abenego moq gas nvng hwankti dah zaudang lyis ma gyo. Nyamoq gas nah mangso lhyi ma paiq, nvng kuot toh dah gungslho lhyi ma dupaiq, ge.

¹³Houmha hwankti ka phot phot tsoeu zis yah hauh dius somh yuk lyis nyah xikkhonh mas shwih los das xiklyis zaudang khyoq.

¹⁴Nyang nyamoq lyis taiq zis gas, Shadrak, Meshak, Abenego moq eh, namoq ngah mangso lhyi ma paiq, ngos kuot toh dah xing gungslho lhyi ma dupaiq zis jyoeng lhyeh?

¹⁵Namoq gvshih lvbuh, pvkhe, toenk, khvlhank, chont toenk, yahge gohtoeu toenk khvlhank thwe xauhgyo yah dvyih gop las hauh gungslho lhyi paiq geh. Namoq ma kuot lyis gas hauh uhlyis nyang duk nyeis dah nyikhyomp mas kat zis xauh das. Namoq lyis yoh khyuot kat dah mangso bos oen nghamh goh lhyeh, ge.

¹⁶Shadrak, Meshak, Abenego moq toeuh zis gas, hwankti eh, hauh cho ngamoq nvng lyis cha taiq dais ma bos.

¹⁷Hwankti eh, ngamoq lyis duk nyeis dah nyikhyomp mas doeuh kat lyis, ngamoq phuqsoe dah Mangso ka ngamoq lyis hou mhayah yoh khyuot kat. Nyang ngamoq lyis nah yomsoq masyah eq khyuot yoeus das.

¹⁸Nyang ma khyuot yoeus laus eq, hwankti eh, ngamoq nah mangso lhyi jyoengh ma paiq; nvng kuot toh dah xing gungslho lhyi ngamoq ma du paiq das, ge.

¹⁹Housoeh Nebukhaneza ma yoh jhen lo Shadrak, Meshak, Abenego moq lyis nhaiq gis yo las nyoqnho nes los. Housoeh las nyang gas hauh nyikhyomp lyis xikpheh thoq lyis nyhet huon zes ngeh nhang das zis zaudang khyoq.

²⁰Housoeh nyang nyah jesphung mha yombos thank bang lyis hauh somh yuk lyis twih las hau duk nyeis nyikhyomp mas doeuh khyoq das zis taiq kat.

²¹Housoeh nyamoq gas hauh bang somh yuk lyis nyamoq dah dyi, dyixing, uhthop eq cheq twih las duk nyeis nyikhyomp mas doeuh kat.

²²Gvshih hwankti zaudang khyoq zis than yvmvyah nyikhyomp gas svsoh ngeh las, hauh nyilhyam ka nyamoq lyis nyikhyomp mas she kat dah zungh bang lyis ngeh tyamp.

²³Housoeh Shadrak, Meshak, Abenego moq somh yuk gas hau duk nyeis dah nyikhyomp khau mha twih zis gyoh loh.

²⁴Nebukhaneza gas mauh zis yah nyetlos nyettant dyvm toq las nyah zau jens lyis nyei. Yang duk nyeis nyikhyomp mas dius somh yuk lyis dvtwih khyoq ma nghuot lhyeh, ge. Nyamoq toeuh zis gas, nghuot goeus, hwankti eh, ge.

²⁵Nyang nyei, Housoeh lyis ngos chamus dius nyei yuk nyi mas suh lhain nyeis zis nyvng? Nyamoq lyis ma twih toh, nyamoq cha nos teh ma doeus- hau nyei vyuk gas loeuswons soeu teh doeus, ge.

²⁶Housoeh las Nebukhaneza gas duk nyeis nyikhyomp khomh mas loh las lui. Nyhang thank Mangso dah jyeidwis jens Shadrak, Meshak, Abenego moq eh, thuq los geh, ge. Housoeh nyamoq lvnyap thuq los.

²⁷Zaulo jens, mungh zau jens, jeszau jens, yahge gohtoeu hwankti dah zau jens dvnganh huom lha, hauh nyi ma ngeh dah dius somh yuk moq lyis chomp yoeuh. Nyamoq dah cam dvkhvt eq nyi ma nyhot, dyimis eq ma ngeh, nyikhauh shom eq ma nvm.

²⁸Hwankti taiq zis gas, Shadrak, Meshak, Abenego moq dah Mangso lhyi chungh geh. Nyang nyah loeuswons soeu lhyi nhang lha hai nyang lyis loms las phuqsoe bang lyis khyuot goeus. Nyamoq gas nyamoq nyang dah Mangso mha lai las gohtoeu mangso lhyi gop las ma paiq. Nyamoq kang lhyi ma yoeuh ngah zaudang lyis domsyos gyo das zis ngoek.

²⁹Dius nyau, vnyau yahge nyingh gohtoeu toeu kat bang dvyuk yuk, Shadrak, Meshak, Abenego moq dah Mangso lhyi ma phauh ma nyang taiq lyis, hauh soeu lhyi vdoeus doeus khyoq las nyah yhen lhyi eq dyoq gyoh boms joq nhang oen gvshih ngos zau dang toh. Heisoeh teh yoh khyuot dah mangso gohtoeu ma bos, ge.

³⁰Housoeh hwankti ka Shadrak, Meshak, Abenego moq lyis Babilon mauxom mha muh vkhom nyhang mha tsain toqh dyei.