Read Achang DANIEL 4 Bible Online

DANIEL 4 - Achang bible

DANIEL 4

¹Hwankti Nebukhaneza gas mungkvn dius nyau jens, vnyau jens yahge nyingh gohtoeu toeu kat bang lyis o mha dah loeus kyoh, nyenstap bas jungh. Jeshuh!

²Nyhang thank Mangso ngos lyis kuot dah mauh loqmuh yahge yomsoq muh cho lhyi gyo geh.

³Mangso yang lyis kuot dah mauh loqmuh gas kha iq kuhxing joq! Nyang kuot dah yomsoq muh gas kha iq yomsoq bos! Mangso ka vcaiq vto hwankti nghuot. Nyang vcaiq caiq guon nyeis das.

⁴Ngos ngah hwankti yhen mha pyo pyo nyeis las nyeisgis cho khoek khoek yah pyo nyeis.

⁵Nghuot laus eq ngos yhet joq uhlyis ngos lyis tant dah yhetmoq yahge gyukphoh nyoqnyvng nyvng.

⁶Hau yhetmoq vjyuk cha nghuot zis yoh pho dyei das xiklyis Babilon mas hwankti joeui dyei bang dvnganh lyis ngah jyank mas shwih los das zaudang khyoq.

⁷Housoeh las botthyet bang, hweq kat bang, gyuiswvng bang yahge kyi yoeuh bang dvnganh lyis shwih hwank kat. Ngos nyamoq lyis ngah yhetmoq taiq kyoh laus eq nyamoq hauh zis ma yoh pho dyei.

⁸Hauh thang lhyi Daniel wvng los.[3] Nyang mas gyingshang mangso jens dah dyos bos. Housoeh las ngos nyang lyis ngah yhetmoq taiq kyoh. Ngos nyang lyis taiq,[4]

⁹Botthyet bang dah vgyis Belteshaza eh, gyingshang mangso jens[5] dah dyos nvng mas bos las nvng gas nghop toh cho dvnganh seqgyo yvlyis ngos seq. Heika ngah yhetmoq[6] nghuot. Ngos lyis hauh vjyuk taiq kyoh aq.

¹⁰Ngos yhet joq uhlyis ngah nyoqnyvng mas, nyeisjvng vgungs mas saiqmuh dvzains nyvng.

¹¹Hauh saiq gas yuk kuh los las, maukhung lhyi duons shoq nghuot. Hauh yvlyis mungkvn mas bang yuk khanghmuh yoh nyvng.

¹²Hau vhuq gas yungh las vshih vtyom dom shih las mungkvn gonh luk zo. Hauh buisshen mha yewus jens no nyeis. Nyah vko jens mha nghoq jens sot sot las kang dwis zis vja ja gas houmha dah shih tsain zo.

¹³Ngos yhet joq shih lyis, maukhung mhayah phuksohlhaiq zungh yoeuh dah loeuswons dvyuk gyoh los yvlyis nyvng.

¹⁴Nyang thwe lvm yah Hauh saiqzains thoeuq lhain aq, saiqko kyet aq, vhuq khywi aq, nyah vshih lyis sanh tyamp aq. Yewus jens lyis hauh vzains khyei mhayah, nghoq lyis hau saiqko mhayah khat thuq tyamp aq, ge taiq hoeuh.

¹⁵Nghuot laus eq nyeisjvng mas saiqngot lyis nyhet toh las, thyeq yahge thunk yah twih Lhaink las pa mha mhanh yah toh aq. Gvshih haih dius thoq mas jyweh gyoh bas jungh. Nyang gas gaunyhauq jens yahge mhanh yah dvgeh nyeis bas jungh.

¹⁶Nyang nyhet zvn dius ehnyet ma bos, yewus ehnyet dvbos das.

¹⁷Heika phuksohlhaiq zungh yoeuh dah loeuswons bang dah nghamh thyet cho nghuot. Housoeh lyis Nyhang Thank Mangso ka dius dah munghdan thoq mas yomsoq bos zis eq, Nyang khyen yoeus soeu hank lyis laus eq hau yomsoq yoh dyei cho lhyi dvkhauyah dah dius jens dvnganh lyis seq nhang. Yhaugyen cho nain thank bang lyis yangh yoh dyei.

¹⁸Hwankti Nebukhaneza taiq, Heika ngos moq dah yhetmoq nghuot. Belteshaza eh, nvng gvshih hauh yhetmoq pho dyei aq. Ngah joeui dyei bang hank eq yhetmoq ma yoh pho dyei. Nghuot laus eq nvng yoh pho, khasoeh ge lyis gyingshang mangso jens [7] dah dyos nvng mas bos.

¹⁹Hauh uhlyis Belteshaza ge dah Daniel gas, dvn chi loh las dang eq dvxa ma yoh taiq mus. Hwankti nyang lyis taiq, Belteshaza eh, yhetmoq yahge yhetmoq pho gvng mas nvng vchiq, ge. Belteshaza phuk taiq zis gas, Hwankti eh, yhetmoq yahge vjyuk gas nvng yah ma sen, nah jeswus yah sen loh nhang mes.

²⁰Nvng nyvng dah saiqzains gas maukhung thuk shoq nyhang lha mungkvn mas yuk khanghmuh yoh nyvng.

²¹Nyah vhuq yungh las vshih eq mungkvn gonh luk tsoh shoq shih. Hauh vkhyei mha yewus jens no nyeis, nyah vko mha nghoq jens sot sot toh.

²²Hwankti eh, nvng gas nyhang lha yombos dah saiqzains nghuot. Nvng gas kuh los las maukhung lhyi duons, nah yomsoq gas mungkvn gonh thoq mas dvm joq.

²³Nvng hwankti yoeuh nyeis lyis maukhung mhayah loeuswons soeu dvyuk gyoh los las taiq zis gas, Hauh saiqzains thoeuq lhain lha mhont tyamp aq. Nghuot laus eq nyeisjvng mas saiqngot nyhet toh aq. Hauh yvlyis thyeq yahge thunk twih yah kwank las houmha mhanh yah dvgeh nyhet toh aq. Haih dius thoq mas jyweh gyoh bas jungh. Nyang houmha gaunyhauq yah dvgeh nyhet zvn nyeis bas jungh, ge.

²⁴Hwankti eh, heika hauh vjyuk nghuot. Haih Nyhang Thank Mangso taiq hoeuh zis gas nvng mas bweh los das.

²⁵Nvng gas dius phung mhayah khat tyamp zis xauh las yewus yah dvgeh nyeis das. Nvng nyhet zvn noeu teh mhanh zo, nghe mha yhet las houmha nah thoq mas jyweh gyoh gyon das. Hauh thang lhyi Nyhang Thank Mangso ka dius dah munghdan dvnganh lyis joeu las, hauh zis nyang khyen yoeus soeu hank lyis laus eq yoh dyei yvlyis nvng rhen das.

²⁶Loeuswons soeu, Hau saiqngot lyis nyeisjvng mas nyhet toh aq, ge zaudang khyoq. Haih vjyuk gas, Mangso ka mungkvn gonh lyis guon nyeis cho nvng seq los lyis nvng hwankti doms bweh das.

²⁷Housoeh las nvng hwankti ngos joeui dyei zis chank kuot aq. Yaunos vkuot lo, jus zis kuot aq, zaiq zis xauh bang lyis nhaiqnyen aq. Housoeh lyis nvng tsoq las nyeisgis yaplhoq das.

²⁸Hai dvnganh hwankti Nebukhaneza mas bweh los.

²⁹Lhamhmuh dvci aiq khyvp thang lhyi, nyang gas Babilon hwankti yhenkhung thoq mas suh nyeis lyis,

³⁰nyang taiq, Yoeuh aq Babilon wus kha iq kuhxing! Ngos ngah yomsoq, duot cho, ngah phunk yahge shoenkkhyi lhyi chixoeuq das xiklyis wus zainsmuh khyvlyis ngos tsuk toh, ge.

³¹Nyang hauh dang ma dye taiq shih lyis, maukhung mhayah thwe dvkoeuq taiq, Hwankti Nebukhaneza eh, ngos cha taiq zis gyo aq. Gvshih nah hwankti yomsoq gas nvng masyah yoeus tyamp goeus.

³²Nvng gas diusphung masyah khat tyamp zis xauh das. Nyhet zvn yewus yah dvgeh nyeis las noeu teh mhanh zo das. Hauh thang lhyi Nyhang Thank Mangso ka dius dah munghdan thoq mas yomsoq bos las hauh zis nyang khyen yoeus soeu hank lyis laus eq yoh dyei yvlyis seq los das, ge.

³³Hauh dang gas lvnyap jweh jyoeng los. Nebukhaneza gas diusphung mhayah khat tyamp zis xauh las noeu teh mhanh zo goeus. Jyweh gas nyah gungs mas gyoh, nyah cam ka zonmuh mauh teh xing, nyah loqsainh nghoq khyeisainh teh xing los.

³⁴Nyhet zvn lai lyis hwankti taiq, Ngos maukhung Mangso lhyi yoeuh las ngah ehnyet doms gying los. Ngos Nyhang Thank Mangso lhyi chungh. Vcaiq vto dwis nyeis soeu lhyi chungh las phunk nyoqnho dyei. Nyang vcaiq vto guon das, nyah munghdan vcaiq caiq goeng joq das.

³⁵Nyang nyeisjvng thoq mas dius lyis cha ma nghuot ge dvyoeuh. Maukhung mha loeuswons bang yahge nyeisjvng thoq mas dius gas nyang joeu dah o mha dvnghuot. Nyah ehnyet lyis hank eq ma yoh khyank. Nyang cha kuot ge hank ma yoh nyei.

³⁶Ngah ehnyet doms gying los lyis ngah nyoqnho ngelang, ngah shoenkkhyi, yahge ngah munghdan phunk gas ngos lyis doms dyei los. Ngah zau jens yahge ngah xamchangh jens ngos lyis lhom yoeus las ngos lyis hwankti yomsoq doms dyei, xikpheh thoq lyis yangh nyoqnho ngelang zes dyei.

³⁷Gvshih ngos Nebukhaneza gas Maukhung Hwankti lhyi chungh, nyoqnho ngelang dyei, phunk lyis chungh. Nyang kuot zis dvnganh gas jus las, lyi bos, khwank las kuot soeu hank lyis laus eq nyhen mha yoh khyoq, ge.