Read Achang DANIEL 6 Bible Online

DANIEL 6 - Achang bible

DANIEL 6

¹Dari gas nyah munghdan lyis zwi das xiklyis dvkhauyah mungh zau dvxo aiqci toh dah zis nghamh thyet.

²Hauh thoq lyis nyang gas Daniel yahge gohtoeu aiq yuk lyis khyen lha hau mungh zau jens thoq mas yoeuh nhang. Hwankti dah vmyat lyis yoeuh nhang.

³Ma nyangh lyis Daniel gas mungh zau zainsmuh jens yahge mungh zau jens thoq lyis muh zes gis shoq yoh kuot cho chixoeuq. Nyang gas gohtseq nghuot yvmvyah hwankti ka nyang lyis munghdan gonh thoq mas yoeuh das zis toh das zis toeuq.

⁴Hauh thang lhyi gohtoeu mungh zau zainsmuh jens yahge mungh zau jens gas munghdan lyis guon yvmas yobos tungh xo mes laus eq Daniel gas wontang lha shuot cho ehnyet guih cho cha ma kuot yvmvyah nyang mas yobos huon dais cha eq ma nyvng.

⁵Nyamoq nyang changh taiq goh zis gas, Nyah lomsnoq cho yah ma tsoq lyis gas yang Daniel lyis kauq das cho cha ma xo nyvng das, ge.

⁶Housoeh las nyamoq dvgeh xamxonh zis yah hwankti lhyi loh xauhgoh las taiq zis gas, Hwankti Dari eh, nvng kang xing bas jungh.

⁷Ngamoq nah munghdan mas guon bang dvnganh: mungh zau zainsmuh jens, mungh zau jens, jeszau jens yahge gohtoeu zau jens xamxonh las, nvng hwankti zaudang dvkoeuq khyoq chah. Somhci nyeih gyo lyis nvng mas lai las, gohtoeu mangso lhyi eq, dius lyis eq dung das toeuh ma dyei. Haih zaudang lyis lais soeu hank laus eq khangkhyi khyung mha khyoq zis xauh das, ge.

⁸Hwankti eh, Haih zaudang khyoq las loqyos duon las goeng nhang aq. Heika ma yoh thaiq loh dah Mede yahge Persia dah lyi nghuot.

⁹Housoeh las hwankti Dari gas, hau zaudang lyis loqyos duon.

¹⁰Hauh zaudang loqyos duon goeus yvlyis Daniel seq lyis nyang nyah yhen pheh loh. Nyah yhen thoq yvp mas Yerusalem shot xoeu dah khomhbaiq tsain phank toh. Houmha nyang vjangh kuot vgus, phank toh khomhbaiq mas dvnyeih somh lhain phvluk thuk las Mangso lhyi vkyuh dung.

¹¹Daniel Mangso lhyi shvmanh dung nyeis zis nyah jeswus jens nyvng lyis,

¹²nyamoq dvnganhmoq dvgeh hwankti jyank mas Daniel cho loh kauq. Nyamoq taiq, Hwankti eh, somhci nyeih gyo lyis nvng mas lai las gohtoeu mangso lhyi eq, dius lyis eq shvmanh dung soeu hank laus eq khangkhyi khyung mha khyoq zis xauh das ge dah zaudang mas nvng loqyos duon goeus, ge. Hwankti toeuh zis gas, Nghuot goeus, houka than dah zaudang, ma yoh thaiq lo dah Mede yahge Persia jens dah lyi nghuot, ge.

¹³Hauh thang lhyi nyamoq hwankti lhyi taiq, Yuda mau masyah jonsdoeus loh bang mas dah Daniel gas nvng lyis ma phauh, nvng thuq kat dah zaudang lyis domsyos ma gyo. Nyang gyangh kuot teh dvnyeih somh lhain shvmanh dung nyeis, ge.

¹⁴Hwankti haih zis xauhgyo lyis uhnungh nungh las Daniel lyis yoh khyuot das cho nyang duot nyhoq xo nyeis. Buis wvng shoq nyang lyis lhuiq kat das cho tungh xo nyeis.

¹⁵Hauh thang lhyi Daniel dah jeswus jens hwankti jyank mas doms los taiq zis gas, Hwankti eh, Mede yahge Persia dah lyi yah sen lha hwankti khyoq goeus dah zaudang gas ma yoh thaiq lo zis nvng seq, ge.

¹⁶Housoeh hwankti ka Daniel lyis nyhik las khangkhyi khyung mha kat das xiklyis zaudang khyoq. Nyang Daniel lyis, Nvng wontang phuqsoe nyeis dah nah Mangso ka nvng lyis khyuot yoeus bas jungh, ge.

¹⁷Dwangkhonh mas luklhyoq yoeus nghop lho lha, Daniel lyis hank ma yoh khyuot shoq hwankti loqkyop kyihau yahge nyah xamchangh jens dah kyihau tsain tap.

¹⁸Hauh thang lhyi hwankti ka nyah hwankti yhen pheh loh. Nyang dvnyens yah wom ma zo, shvpyo cho cha eq ma kuot, yhet eq ma muih.

¹⁹Mau buh los lyis hwankti ka toq las dwang pheh lvnyap e loh.

²⁰Nyang houmha jweh lyis nyang chiq zoh lyis lui, Dwis nyeis Mangso dah jyeidwis Daniel eh, nvng wontang phuqsoe nyeis dah Mangso ka nvng lyis khangkhyi jens masyah yoh khyuot yoeus lhyeh, ge.

²¹Daniel toeuh zis gas, nvng hwankti kang xing bas jungh.

²²Mangso ka nyah loeuswons soeu lhyi nhang lha khangkhyi nhuot nyheih dyei yvmvyah nyamoq ngos lyis cha ma zangh. Khasoeh ge lyis ngos yobos ma bos zis nyang seq, lho lhyi hwankti eh, ngos nvng lyis cha ma cu, ge.

²³Hwankti ka svsoh gaus las Daniel lyis dwang mhayah she thuq kat das zis zaudang khyoq. Housoeh nyamoq Daniel lyis khyung mhayah she thuq kat. Nyang Mangso lhyi loms yvmvyah nyang mas chah dvm ma dap zis nyvng.

²⁴Hauh thang lhyi hwankti ka Daniel lyis kauq bang dvnganh lyis nyhik las nyamoq dah yhensain nyhiq, lo jens eq cheq khangkhyi khyung mha khyoq das zaudang khyoq. Nyamoq khyung theh mas ma jweh shih lyis khangkhyi jens dyvm ngat zo las shohyau dvnganh khyauh tyamp.

²⁵Hauh thang lhyi hwankti Dari gas, nyeisjvng thoq mas dius nyau jens, vnyau jens, nyingh gohja ja kat bang lyis lhaih kat. Namoq mas nyenstap joq bas jungh.

²⁶Ngah munghdan goms shoq mas nyeis dah dius yuk khanghmuh gas Daniel dah Mangso lhyi gyukwoms las phauh nyang chah oen tying kat. Nyang gas kang dwis Mangso nghuot las, vcaiq vto guon das. Nyah munghdan khanhamp eq ma dyoqbis das; nyah yomsoq khanhamp eq mathank loh das.

²⁷Nyang khyuot yoeus las lhuiq; nyang maukhung yahge nyeisjvng mas mauh loqmuh yahge yomsoq muh kuot. Nyang gas Daniel lyis khangkhyi jens yah sat das masyah khyuot yoeus, ge.

²⁸Daniel gas Dari guon zaih lyis eq, Persia dius Kuru guon zaih lyis eq, nyeisgis yaplhoq nyeis.