Read Achang DANIEL 7 Bible Online

DANIEL 7 - Achang bible

DANIEL 7

¹Belshaza Babilon hwankti doq zis cangxeih vzvn lyis ngos yhetmoq moq las nyenh lyis nyoqnyvng nyvng. Ngos haih yhetmoq lyis lhaih las heika ngos hau nyenh lyis nyvng zis comh toh cho nghuot.

²Lyeis gas nyei shot masyah muot los las thomh thoq mas jeisphauq toq nyeis.

³Dvdoeu yah gohtoeu dvdoeu ma doeusgoh dah yewus kuh nyei doeu eq nvmukdra masyah thuq los.

⁴Cangxeih yewus gas khangkhyi teh doeus laus eq zonsmuh teh dungs tsain dap. Ngos yoeuh nyeis lyis, hauh dungs lyis nuot tyamp dyei. Hauh yewus gas toqh kat las zungh zungh yap nhang zis xauh. Hauh thang lhyi dius ehnyet kat dyei zis xauh.

⁵Yewus aiq vdoeu gas woms teh doeus las kuon toh. Hauh zis gas nyah zwis mas nvm yau somh khvt ngat chi. Thwe dvkoeuq nyang lyis taiq zis gas, Toq aq, shoh yoh zo nyhoq zo aq, ge.

⁶Ngos yoeuh nyeis lyis, gohtoeu yewus dvdoeu thuq los: houka lumuh teh doeus laus eq hauh gvnungh mas nghoq dungs teh zis nyei koeuq dap, uhloms eq nyei koeuq dap. Hauh yvlyis guon das toeuh dyei toh.

⁷Ngos yoeuh nyeis lyis yewus nyei vdoeu thuq los. Houka yomsoq bos, gyukphoh, dvn phoh nghuot. Kha iq teh thyeq zwis yah nyang zo das shoh lyis ngat chingh thang lhyi nyet yvlyis nang nheh tyamp. Houka gohtoeu yewus yah shaih las khyau dvci lom yuk.

⁸Ngos hauh khyau jens lyis yoeuh tsuk toh lyis, hauh khyau jens masyah khyaulo dvkoeuq yuk thuq los zis nyvng. Hauh zis yah houmha yuk joq goeus dah khyau somh lom lyis khot tyamp. Haih khyaulo mas dius nyoqjeih yahge khwank las moengs dah nhuot dap.

⁹Ngos yoeuh nyeis lyis hwankti tank jens nyah joqyos mas tsain toh. Hau hwankti tank dvkoeuq mas vcaiq vto dwis nyeis Soeu tsung toh. Nyah dyimis gas gyu teh thyoeu, nyah cam ka yvng mauh gyingh teh nghuot. Nyah hwankti tank gas nyilhyam lhyingh thoq mas joq las, nyi yah ngeh nyeis.

¹⁰Hou mhayah nyi jeislo dvlvng yaus thuq nyeis. Houmha nyang lyis phuqsoe das zis dius khyoengh khyoengh nyeis. Nyah xikkhonh mas dius mons mons tsain yap joq. Soetuon das zis cvvq las maussauh buk tsain phank toh.

¹¹Ngos yoeuh nyeis lyis, hauh khyaulo khwank las moengs zis xauhgyo shih. Ngos zungh yoeuh nyeis lyis hau yewus nyei vdoeu sat xauh las, nyah mvng lyis nyilhyam mha doeuh khyoq zis yah mhont tyamp.

¹²Gohtoeu yewus jens gas, nyamoq dah yomsoq yoeus tyamp goeus laus eq shishenh dvyoq dwis nyeis shih das toeuh yoh.

¹³Nyenh lyis haih nyoqnyvng gyo lyis ngos dius teh zis dvyuk nyvng. Nyang gas maukhung jyommauh yah thop las ngah jyank mas jweh los. Thang lhyi vcaiq vto dwis nyeis ku soeu jyank mas loh las nyah xikkhonh mas yap joq.

¹⁴Nyang gas toeuh, nyoqnho ngelang, hwankti yomsoq dyei zis xauh. Housoeh las dius nyau jens, vnyau jens yahge nyingh vja ja kat bang dvnganh nyang lyis phuqsoe das. Nyah toeuh gas vcaiq caiq goeng joq das. Nyah munghdan khanhamp eq ma thank lo das.

¹⁵Ngos nyvng dah nyoqnyvng gas ngos lyis dvn nhang lha chiq nyeis.[9]

¹⁶Ngos houmha yap joq bang mas dvyuk jyank mas loh las hai dvnganh dah vjyuk phui kyoh das zis dung. Housoeh las nyang ngos lyis hauh cho dah vjyuk taiq kyoh.

¹⁷Nyang taiq, Haih kuh dah yewus nyei doeu gas nyeisjvng thoq mas toq los das munghdan nyei koeuq nghuot.

¹⁸Nyhang thank Mangso dah dius gas hwankti yomsoq xauh yoeus das las hauh yvlyis vcaiq caiq vto to zwi toh das, ge.

¹⁹Housoeh lyis ngos seq mes shih zis gas, gohtoeu yah ma doeusgoh dah yewus nyei vdoeu cho nghuot. Hauh zis gas svsoh gyukphoh yewus, nyang shoh zo las nyet yvlyis thyeq zwis, thunk loqsainh yah khyop thang lhyi khyei yah nang nheh tyamp.

²⁰Ngos seq mes shih cho ka nyah uhloms mas dah khyau dvci, thang lhyi yuk los dah khyau ka xik lyis dah khyau somh koeuq lyis gyoh shoq kuot cho nghuot. Houka nyoqjeih yahge khwank las moengs dah nhuot dap. Houka gohtoeu thoq lyis zes gyukphoh nghuot.

²¹Ngos yoeuh nyeis lyis, hauh khyau ka Mangso dah dius jens yah jeszan goh las nyamoq lyis ung tyamp.

²²Hauh uhlyis vcaiq vto dwis nyeis soeu jweh los las Nyhang Thank Mangso dah dius jens shot dap las soetuon cho taiq hoeuh. Mangso dah dius jens gas hwankti yomsoq xauh yoeus das shishenh jweh goeus.[10]

²³Heika ngos lyis vjyuk phui dyei dah cho nghuot. Yewus nyei vdoeu gas, nyeisjvng thoq mas thuq los das munghdan nyei vkoeuq nghuot. Houka gohtoeu munghdan dvnganh thoq lyis shaih das. Houka nyeisjvng gonh lyis thungh thyi lha nang nheh tyamp das.

²⁴Hauh khyau dvci ka, hauh munghdan lyis guon das hwankti dvci nghuot. Hauh thang lhyi gohtoeu hwankti dvyuk thuq los das. Nyang gas xik lyis bang yah svsoh shaih las hau hwankti dvci yuk mas dah somh yuk lyis ung das.

²⁵Nyang gas Nyhang Thank Mangso lhyi tyi dang taiq las Mangso dah dius jens lyis zaiq das. Nyang gas nyamoq dah lomsnoq cho lyi yahge pwe lhyi thaiq das zis yomkat las, Mangso dah dius jens gas nyah yomsoq khau mha somh zvn dvkhyamh nyeis das.

²⁶Hauh thang lhyi maukhung soetuon jang mas soetuon das las, nyah yomsoq yoeus tyamp dyei zis yah nyang lyis mhont tomh tyamp das.

²⁷Nyeisjvng mas munghdan yomsoq yahge kuhxing cho Nyhang Thank Mangso dah dius jens lyis dyei das. Nyamoq dah zauguon yomsoq khanhamp eq ma thank das. Nyeisjvng thoq mas guon bang dvnganh nyamoq lyis phuqsoe lha nyamoq domsyos gyo das, ge.

²⁸Heika hauh nyoqnyvng cho dye toh. Ngos gas svsoh dvn las nyoqnho dyoq loh. Ngos haih cho dvnganh ngvnyang comh toh.