Read Achang DANIEL 8 Bible Online

DANIEL 8 - Achang bible

DANIEL 8

¹Belshaza hwankti guon zis somh vzvn lyis ngos nyoqnyvng aiq vkoeuq nyvng.

²Nyoqnyvng mas nyetlos nyettant ngos gas Elam mauxom tyoyvm yvm toh dah Susa wus mas nyeis. Ngos gas Ulai tvp yvm mas yap joq.

³Hau tvp yvm mas khyau xing aiq lom yuk las dvlom gas gohtoeu thoq lyis zes xing, zes saiq dah yvnglus dvdoeu lyis ngos nyvng.

⁴Hauh yvnglus gas, nyah khyau yah buiswvng pheh, mautsung pheh, mautyi pheh thungh loh nyeis yvlyis ngos zungh yoeuh goeus. Chah gaunyhauq eq nyang lyis ma yoh tomp, nyah yomsoq masyah ma yoh phang luiq. Nyang gas nyang nhaiqdoeus khyvlyis kuot las yomsoq bos los.

⁵Ngos hauh vjyuk cha nghuot yvlyis nghamh mauh nyeis lyis, shvbeq dvdoeu buiswvng pheh yah duon wuih los zis nyo nyap las nyeisjvng mas nyah khyei ma tanh lo. Nyah nyoq jo mas gohtseq khyau dvlom yuk.

⁶Nyang gas, hau ngos nyvng las tvp yvm mas yap joq dah yvnglus jyank pheh nyah yom dvnganh yah duon loh.

⁷Ngos gas nyang yvnglus lyis thungh yvlyis yoeuh nyeis. Shvbeq gas svsoh nhaiqyo zis yah yvng lus lyis yomkat thungh las hau yvng lus khyau aiq koeuq khyauh tyamp. Yvnglus gas nyang lyis doms thoenk das yom ma bos. Nyang lyis nyeisjvng mas thungh lhain lha nang nheh tyamp. Nyang lyis hank ma yoh khyuot yoeus.

⁸Shvbeq gas zes zes yomsoq bos los. Nghuot laus eq nyang yomzau zau nyeis lyis nyah khyau gyau tyamp. Hauh joqyos mas dede nyvng dah khyau nyei koeuq yuk los. Houka gohshot shot tsain xoeu toh.

⁹Hau nyei koeuq dah dvkoeuq mas khyaulo dvkoeuq yuk thuq los las, hauh yomsoq gas mautyi pheh eq, buisthuq pheh eq, dangthoengh toh dah mau pheh eq jelvm los.

¹⁰Houka Maukhung Jesphung ge dah kyi jens lyis yoh zan das shoq yombos los las kyi dvkhamh lyis nyeisjvng mas doeuh khyoq zis yah nang nheh tyamp.

¹¹Hauh zis gas maukhung jesphung dah Zaulo lyis yangh gomloeus toq, nyang lyis nyeih yau nyeih phudyei dah jyungshuk lyis tomp toh zis yah Yhenmuh lyis dyoqbis shoq kuot.

¹²Dius jens gas houmha nyeih yau lainh nyeis dah lomhxangh jyungshuk gungsthaiq yaunos kuot las, Mangso dah jyoeng cho lhyi tyi lha taiq. Hau khyau ka nyang kuot ya kuot zis ung los.

¹³Hauh thang lhyi loeuswons soeu[11] dvyuk gohtoeu dvyuk lyis nyei zis ngos xauhgyo. Haih zis nyoqnyvng mas khanyhank jweh shoq tsoq nyvng nyeis das lah? Nyeih yau lomhxangh joqyos mas haih gyukphoh yaunos khanyhank jweh shoq joqyos yoeus nyeis das lah? Maukhung Jesphung yahge Yhenmuh lyis khanyhank jweh shoq nang nheh toh das lah, ge.

¹⁴Gohtoeu loeuswons soeu phuk taiq zis ngos xauhgyo. Aiq khyoengh somhxo nvp yahge nyenhthang tsoq loh das. Hauh gyo lyis lomhxangh ma ngheq dyei das. Hauh thang lhyi Yhenmuh doms toeu das, ge.

¹⁵Ngos hau nyoqnyvng vjyuk seqgyo shoq xo nyeis lyis, nyetlos nyettant ngah xikkhonh mas vbusbih teh zis dvyuk yap joq.

¹⁶Ulai tvp pheh yah lui dah thwe dvkoeuq ngos xauhgyo. Gabriel eh, nyang nyvng zis cha nghuot yvlyis phui kyoh aq, ge.

¹⁷Gabriel gas ngah vnvm mas los yap. Ngos gas svsoh gyuk dvn las nyeisjvng mas dupaiq toh. Nyang ngos lyis taiq, Lvcang eh, hauh vjyuk seqgyo aq, hauh nyoqnyvng gas mungkvn thank das shishenh yah sen, ge.

¹⁸Nyang taiq nyeis lyis, ngos nyeisjvng mas chuot lains joq. Nghuot laus eq nyang ngos lyis zwi las, toeu toq yap nhang.

¹⁹Nyang taiq, Mangso dah nhaiqyo cho yahge joeng cho shishenh lyis cha bweh los das zis ngos nvng lyis taiq kyoh bah. Hau nyoqnyvng gas toeuq toh dah thang thank shishenh yah sen.

²⁰Nvng nyvng, khyau aiq lom yuk dah yvnglus gas Media yahge Persia dah munghdan jens lyis taiq mes.

²¹Shvbeq gas Greece munghdan nghuot. Nyah nyoq jo mas yuk dah khyau ka cangxeih dah hwankti nghuot.

²²Xik lyis dah khyau gyau tyamp lyis khyau nyei lom yuk thuq los zis gas, xik lyis dah munghdan mas dius nyau gvm loh das, houka xiklyis dah munghdan iq yom ma bos das.

²³Hauh munghdan jens dah vthang ni los lyis, nyamoq gas joeng cho jweh bah ge shoq svsoh lhoeng los lyis, nhaiqlom than, seq mhuih dah hwankti dvyuk thuq los das.

²⁴Hauh soeu ka yombos los, nghuot laus eq nyah yomsoq yah ma nghuot. Nyang gas gyuk phoh mhont cho kuot das las, nyang kuot zis dvnganh ung los das. Nyang gas yomsoq bos bang yahge Mangso dah dius jens thoq mas dyoqbis cho she los das.

²⁵Nyang ehnyet guih gvng mas nyang mhuih khwangh cho pheh ung das. Nyang khwank zis yah dius nyoshoq lyis zaih nhang zis ma bos mhont. Kuh thank Hwankti lyis yangh nyang toeu nghank laus eq nyang gas cangsoeu yomsoq ma yhung, mhont tyamp zis xauh das.

²⁶Nyenh yahge nvp dah lomhxangh cho nvng lyis phui kyoh dah nyoqnyvng gas bweh los das. Nghuot laus eq gvshih hauh yvlyis zauh toh aq. Khasoeh ge lyis hauh zis bweh los das zis nyangh shih, ge.

²⁷Ngos gas yomnhuk zis yah dvyoq nos. Hauh thang lhyi ngos toq las hwankti ngos lyis toeuq dyei dah muh loh doms wons wuq. Ngos hauh nyoqnyvng cho mauh nyeis las hauh yvlyis ma seqgyo.