Read Achang HOSEA 10 Bible Online

HOSEA 10 - Achang bible

HOSEA 10

¹Israel dius jens gas shih jyop jyop shih dah zvbiq nwis teh nghuot. Nyamoq nyeisgis yap zes lhoq los nyhoq phon zes nyo nhang. Nyamoq maunyeis mas guknyau shih nyau zes nyo los zes nyamoq paiq dah gyingshang lukzains yungh yungh tsain shunk.

²Dius jens dah nhaiqlom gas mhuih las gvshih nyamoq yaunos xiklyis kham chah. Mangso ka nyamoq dah phon jens lyis thyoq khyoq das. Nyamoq dah gyingshang zains lyis tsain mhont das.

³Ma nyangh lyis haih dius jens taiq das zis gas, Yang YHENSAIN lhyi ma gyukwoms yvmvyah hwankti ma yoh. Nghuot laus eq hwankti ka yah xiklyis cha yoh kuot dyei, ge.

⁴Nyamoq gas vkyuh ma bos dang taiq, ma jus dah dangthoengh toh, yung pvjus dah xamxonh cho yoh. Lyi jus cho ka lyi ma jus yvpheh loh las, phuk toh yos mas nyonoq nyoq yuk los teh nghuot.

⁵Samari wus mas nyeis bang gas Awen mas xing noeulu[9] dyuk loh las gyuk zis yah kuk das. Nyamoq yahge phvra lyis phuqsoe phudyei bang hauh gvng mas ngaus das. Hau yunghshop xing thyoq tyamp zis xauh lyis nyamoq kuk ngaus das.

⁶Hauh phvra lyis Asiria mas hwankti zainsmuh lyis jyungshuk khyvlyis yoeus loh das. Israel dius jens gas hau joeui dyei cho chank yvmvyah nyoqnho ngelang gyoh las xoqphuh das.

⁷Nyamoq dah hwankti ka jeis mas dang dah saiqjvp teh nyhik loh zis xauh das.

⁸Awen mas Israel dius jens phvra paiq dah jingthyoh joqyos eq mhont tyamp zis xauh das. Nyamoq dah phon thoq mas zoeu yahge nyoq yuk gyomh das. Dius jens gas Boms jens lyis lui las, ngamoq lyis gos shung toh dyei aq; jing jens lyis, ngamoq lyis nghop toh dyei aq, ge das.

⁹YHENSAIN taiq, Israel dius jens gas nyamoq Gibea mas yaunos kuot masyah ngos lyis tyi lha yaunos kuot zis ma no. Housoeh las jeszan cho ka nyamoq lyis Gibea mas chank duons das.

¹⁰Ngos hai yaunos kuot dah dius jens lyis zan las[10] joeng das. Dius nyau jens eq nyamoq yah tyi lha dvgeh bos das las, nyamoq dah yaunos nyoshoq gvng mas nyamoq joeng zis xauh das.

¹¹Israel gas vlhomuh pot las cicont guk nang mes dah noeupon teh nghuot khoq laus eq, ngos nyah lainzain yungh mas tanzoe kih las muh changh kuot nhang das oen nghamh thyet. Ngos Yuda lyis yos phuk nhang lha Israel lyis kyeq nhang das.

¹²Ngos taiq, Namoq nyang xiklyis yos saiq phuk geh, dan cho jyo khyoq geh, namoq ngos lyis dung dah shvmanh jyo thuq los zis yhomh geh. Heika ngos, namoq YHENSAIN jyank mas tauh los shishenh nghuot las ngos namoq thoq mas shvmanh los huot khyoq das, oen.

¹³Nghuot laus eq hauh gungsthaiq namoq ma gis jyo khyoq las nyah jyo yhomh. Namoq gas namoq hwah zis yah thuq los dah shih lyis tsain zo. Khasoeh ge lyis namoq gas namoq dah jeslhyingh jens[11] yahge nyo dah jeslo jens lyis tsain khau.

¹⁴Jeszan cho ka nah dius jens mas jweh los las nah thoenkgus jesdvp dvnganh monh tyamp das. Houka jeszan yvmas hwankti Shalman gas Betharbel wus lyis mhont tyamp buisnyeis teh nghuot das. Houmha ungwes moq yahge nyamoq dah loshang jens thunghthyi sat zis xauh.

¹⁵Bethel dius jens eh, houka namoq mas bweh los das cho nghuot. Khasoeh ge lyis namoq gas gyukphoh ma gis cho kuot goeus. Jeszan xi yah dvyih Israel hwankti shei das.