Read Achang HOSEA 11 Bible Online

HOSEA 11 - Achang bible

HOSEA 11

¹YHENSAIN taiq, Israel loshang nghuot yoq lyis ngos nyang lyis jyetdap las ngah loloeu khyvlyis nyang lyis Egutu masyah khi yoeus.

²Nghuot laus eq ngos nyang lyis zes lui zes ngah jyank masyah nungs phuk loh. Ngah dius jens Bala lyis phudyei las, nyamoq gas phvra jens lyis xangh ngheq dyei.

³Nghuot laus eq ngos gas Israel lyis cho suh jyauh soeu nghuot las ngah dius lyis loqyom mas po khoq. Nghuot laus eq ngos nyamoq lyis loqzamh zwi zis nyamoq ma seq.

⁴Ngos nyamoq lyis jyetdap sainhnos shvnanh khying yah lang. Ngos nyamoq lyis bvlot changh tanh shoq kui po. Ngos gop las nyamoq lyis tsoh.

⁵Nyamoq ngah jyank pheh tauh los das zis ngoek, housoeh las nyamoq Egutu pheh tauh e chah. Housoeh Asiria gas nyamoq lyis guon das.

⁶Jeszan cho ka nyamoq dah wus jens chank shenh loh das las wus khomh lyis tsain khyauh das. Houka nyamoq nyang nghamh zis gis thank ge kuot yvmvyah ngah dius jens lyis mhont das.

⁷Nyamoq ngah jyank masyah nungs tungh phuk loh. Nyamoq thoq mas dah tanzoe gvng mas nyamoq kaiq ngaus das laus eq, nyamoq lyis hauh zis hank ma toeu tyamp dyei das.

⁸Israel eh, ngos nvng lyis khasoeh yoh tyamp toh das? Ngos nvng lyis khasoeh yoh doeuh tyamp das? Ngos nvng lyis Adma wus lyis teh, nghuot ya Zeboim wus lyis teh khasoeh yoh mhont das? Ngos namoq lyis jyet cho ka goeng las ngah ehnyet gas ngos lyis housoeh ma kuot nhang das.

⁹Ngos nhaiqyo zis yah namoq lyis ma joeng das. Ngos Israel lyis ma doms mhont lo das. Khasoeh ge lyis ngos gas diuslaiq dius ma nghuot, Mangso dvnghuot. Ngos Gyingshang soeu ka namoq yah nghuot. Ngos nhaiqyo zis yah namoq jyank mas ma los das.

¹⁰Ngos ngah dius jens lyis khangkhyi soeh nyings lyis, nyamoq ngah thang mha chank das. Nyamoq buiswvng pheh yah ngah jyank lvnyap los das.

¹¹Nyamoq gas Egutu masyah nghoq teh, Asiria mau masyah khotjyauh teh dang jweh los das. Ngos nyamoq lyis nyamoq yhen mas doms shwih los das. Ngos YHENSAIN taiq goeus.

¹²YHENSAIN taiq, Israel jens gas hwah las, mhuih zis yah ngos lyis lhaink toh. Yuda jens ngos, wontang lha gyingshang dah Mangso lhyi tyi lha gomloeus toq nyeis shih.