Read Achang HOSEA 12 Bible Online

HOSEA 12 - Achang bible

HOSEA 12

¹Israel dius jens nvp masyah nyenh jweh shoq kuot zis dvnganh gas yhung pvjus thyoqpi cho dvnghuot. Nyamoq mas dang ma jings cho yahge thyoqzo cho kuot zis nyo los. Nyamoq Asiria yah buisnoms toh las Egutu yah soenghi kuot, ge.

²YHENSAIN ka Yuda dius jens yah tyi lha kauq cho bos las kauq. Nyang gas Israel dius jens kuot dah cho gvng mas Israel lyis eq joeng das. Nyamoq kuot goeus nyhenshang lvto phuk das.

³Nyamoq dah phauh thyeih Yakop gas nyah aiq yuk dah ungwes ung mha dvnghuot shih lyis lozoms vmang Esau yah zan goh. Nyang bes los lyis Mangso yah zan goh.

⁴Nyang loeuswons soeu yah zan goh las ung: nyang ngaus las nyang lyis shvmanh das zis sang. Bethel mha Mangso ka yah phauh thyeih Yakop jyank mas jweh los las jisgoh.

⁵Heika Maukhung Jesphung YHENSAIN Mangso nghuot. Nyah nyings YHENSAIN nghuot.

⁶Housoeh las Yakop dah vnyau vshih jens eh, gvshih namoq dah Mangso lhyi loms las nyah jyank mas tauh los geh. Wontang geh, lyi jus cho kuot geh. Namoq dah Mangso kuot dyei das yvlyis ehnyet xing xing langh nyeis geh.

⁷YHENSAIN taiq, Israel dius jens gas Khanan dius jens teh ma jyoeng bang nghuot. Nyamoq gas nyamoq dah hu wis bang lyis ma jus dah jvng yah kuotzo das zis ngwis.

⁸Nyamoq taiq, Ngamoq dis, ngamoq ngwis nyoshoq yoh goeus. Ngamoq lyis ma jyoeng cho yah dis los ge hank ma los yoh kauq, ge.

⁹Nghuot laus eq namoq lyis Egutu masyah shwih los soeu ngos YHENSAIN, namoq dah Mangso ka sihyos mas ngos namoq jyank mas los uhlyis nyeis teh namoq lyis zvng mas doms nyeis nhang das.

¹⁰Ngos lvpe jens lyis taiq las nyamoq lyis nyoqnyvng nyoshoq dyei lho lha, lvpe jens lyis yah ngos ngah dius jens lyis zaih nhang cho dyei.

¹¹Nghuot laus eq Gilead mas phvra jens lyis tsain paiq las hau paiq bang shei das. Giga mas noeulu jens lyis phudyei las houmha dah phon jens gas hau pa mha luk boms bweh das.

¹²Yah phauh thyeih Yakop gas Mesopotamia pheh phang loh chah goeus. Houmha nyang yhensain nyhiq yoh das xiklyis gohtoeu dvyuk lyis muh zwi dyei las nyah yvng tsomh dyei.

¹³YHENSAIN ka lvpe dvyuk lyis yah, Israel dius jens Egutu mas jons duot nyeis masyah khyuot las loqzamh zwi nhang.

¹⁴Israel dius jens gas YHENSAIN lhyi nhaiq gis yo nhang; nyamoq gas nyamoq dius sat yobos gvng mas shei mon. Nyamoq dah YHENSAIN ka nyah thoq mas nyamoq she los dah nyoqnho ngelang gyoh cho gvng mas nyamoq lyis joeng das.