Read Achang HOSEA 13 Bible Online

HOSEA 13 - Achang bible

HOSEA 13

¹Xikpheh, Ephraim vkoq dang taiq lyis Israel gohkoq jens tsain gyuk; nyamoq Ephraim lhyi tsain yoeuh. Nghuot laus eq dius jens Bala phvra paiq zis yah yaunos kuot, haih gvng mas nyamoq shei das.

²Nyamoq gas paiq das nyhenshang ngwis xing yah gungslho kuot zis yah yaunos tsoq kuot nyeis shih. Dius ehnyet yah vzwvng nghamh thuq las dius loq yah kuot. Hauh thang lhyi nyamoq taiq, Hauh bang lyis phudyei geh, ge. Noeulu vzwvng dah phvra lyis dvyuk yuk bvlot khasoeh yoh tanh das!

³Housoeh las haih dius jens gas, nvpsangh jyommauh, noq yah bi tyamp dah jyweh teh dyuk tyamp das. Nyamoq gas thanjang masyah lyeis muot tangh dah guksom, zainsbung mas dah nyikhauh teh nghuot das.

⁴YHENSAIN taiq, Ngos gas nvng lyis Egutu masyah shwih los dah YHENSAIN, nah Mangso nghuot. Nvng ngos mas lai las gohtoeu Mangso ma bos, ngos kyingh nah khyuot yoeus soeu nghuot.

⁵Ngos nvng lyis kyuk dah sihsho yos mas loqzamh zwi los.

⁶Nghuot laus eq namoq gis dah mau mas wvng los lyis, namoq jo las nhaiqtap. Hauh thang lhyi namoq khwank los las ngos lyis tohnyhik.

⁷Housoeh las ngos namoq lyis khangkhyi teh zan das. Lutyoeuh teh namoq dah cho chank yah lhom das.

⁸Ngos namoq lyis Lo dyuk loh dah woms zains teh zan las namoq lyis kyen phank das. Khangkhyi teh ngos namoq lyis houmha nyang nyhau tyamp das, yewus teh vchingh chingh lang chingh das.

⁹Israel dius jens eh, ngos nvng lyis mhont das, housoeh lyis nvng lyis hank yoh pangh?[12]

¹⁰Nvng hwankti yahge uhshe bang sang, nghuot laus eq nyamoq dius nyau lyis khasoeh yoh khyuot yoeus?[13]

¹¹Ngos nhaiqyo zis yah nvng lyis hwankti jens dyei goeus, ngos nhaiqlom dyis zis yah nyamoq lyis yoeus tyamp goeus.

¹²Israel dah yaunos yahge yobos lyis comh toh, hau comh toh cho lhyi gau gau shung toh.

¹³Israel gas kang dwis das toeuh yoh laus eq ma daq yoeus khoeu los das shishenh jweh laus eq, ma mes khoeu thuq los dah loshang teh nghuot.

¹⁴Ngos haih dius jens lyis shei mau masyah ma khyuot yoeus das, nghuot ya shei dah yomsoq masyah ma khyuot das. Shei cho eh, nah yomh she los aq! Shei mau eh, nah thyoqpi cho she los aq! Ngos haih dius jens lyis nhaiq ma nyen nyeis lo das.

¹⁵Israel jens gas nyoq teh[14] lho lho nghuot laus eq, ngos sihyos masyah buisthuq lyeis nhang lha nyamoq dah jeisthuq dwang jens yahge jeisdwang jens kyuk tyamp das. Hauh zis yah phauhdap vyhang dvnganh yoeus tyamp das.

¹⁶Samari gas ngos lyis gomloeus toq gvng mas joeng zis xauh chah. Nyah dius jens gas jes mas shei das; lonoeuh jens gas nyeisjvng mas thungh thyi zis xauh das. Loshang gungs lyis chi dah vmesbih jens gas phuk zis xauh das.