Read Achang HOSEA 14 Bible Online

HOSEA 14 - Achang bible

HOSEA 14

¹Israel jens eh, YHENSAIN, namoq dah Mangso jyank mas tauh los geh. Namoq dah yaunos gas namoq lyis thungh lains nhang.

²YHENSAIN jyank tauh loh los geh; haih shvmanh dung zis gas nyah jyank mas nah jyungshuk nghuot bas jungh. Ngamoq dah yaunos dvnganh khyuot dyei las ngamoq dah shvmanh dung dang lhom yoeus dyei aq. Ngamoq nvng lyis dangthoengh toh vgus chungh das.

³Asiria ngamoq lyis khanhamp eq ma yoh khyuot yoeus; jes nyang jens ngamoq lyis ma yoh gos dyei. Ngamoq dah phvra jens lyis, nyamoq gas ngamoq dah Mangso nghuot oen khanhamp eq ma doms sang lo das. YHENSAIN eh, chauhlo jens lyis nhaiqnyen das.

⁴YHENSAIN taiq, Ngos ngah dius jens lyis ngah jyank mas shwih tauh los das. Ngos nyamoq yah nhaiq ma yo lo. Ngos nyamoq lyis ngah nhaiqlom gonh yah jyetdap das.

⁵Ngos gas Israel jens xiklyis nyeis kyuk yos mas dah mau teh duot das. Nyamoq ban teh buh das, Nyamoq gas Lebanon saiq teh vnyet goeng goeng chent das.

⁶Nyamoq gas vko nyonh las tsanlun zains teh tsain yungh das. Nyamoq gas Lebanon mas dah arit teh xangh shom bos das.

⁷Nyamoq gas gos toh dah vkhau mha dvlhain doms nyeis das. Nyamoq gas jyo teh kuh los las, zvbiq nwis teh shih shih das. Nyamoq gas Lebanon zvbiq teh nyings hoeuh das.

⁸Israel jens gas, phvra cha ma kuot lo das. Ngos nyamoq dah shvmanh dung dang phuk dyei las nyamoq lyis loqzamh zwi das. Ngos gas vjangh nyaus dah saiqzains teh nyamoq lyis buisshen dyei das. Ngos gas nyamoq dah shvmanh dvnganh vpom nghuot.

⁹Joeui bos bang gas heimha cha lhaih toh zis seq bas jungh. Seqgyo soeu ka nhaiqlom mas comh bas jungh. YHENSAIN dah cho jus las, dan bang hauh zis chank kuot zis yah kang dwis. Nghuot laus eq yaunos kuot bang gas, hauh cho lhyi chaxwe ma nhang lha thungh lains.