Read Achang HOSEA 2 Bible Online

HOSEA 2 - Achang bible

HOSEA 2

¹Housoeh las namoq dah Israel changh jens lyis, Mangso dah dius jens, YHENSAIN jyet xauh bang oen lui geh.

²Ngah lo jens eh, namoq ungwes lyis dung geh. Nyang gas ngah yhensain nyhiq ma nghuot lo, ngos eq nyah yhensain phoq ma nghuot lo laus eq nyang gas lvng shuot cho yahge nghe nyhiq kuot cho no das xiklyis dung geh.

³Nyang ma no lyis gas, ngos nyah dyimis shang tyamp las nyang khoeu los buisnyeis lyis teh shohchen kuot das. Ngos nyang lyis nyeis kyuk nyeis gyih yos teh kuot las nyang jeis shet shei das.

⁴Ngos nyah lo jens lyis nhaiqnyen cho ma chixoeuq das. Nyamoq gas ma daq xoq nghe nyhiq dah lo jens nghuot. Nyang taiq zo, Ngos ngah hwank jens jyank mas loh das, nyamoq ngos lyis zonoms yahge jeis, sauh yahge jeiyhwiq, tsanlun coeu yahge zvbiq dyei, ge.

⁶Housoeh las ngos nyang lyis zoeu yah khyam kyamp lhunk las, nyah cho lhyi ciank ci lha cheiq toh das.

⁷Nyang nyah hwank jens thang mha chank wuih laus eq nyamoq lyis ma duons das. Nyamoq lyis xo laus eq ma nyvng das. Hauh thang lhyi nyang taiq das zis gas, ngos cangxeih dah ngah yhensain phoq jyank mas doms loh das; nyang yah nyeis khoq zis gas gvshih thoq lyis zes gis, ge.

⁸Ngos gas nyang lyis jyo, zvbiq, tsanlun coeu dyei soeu, nyang Bala phvra paiq yvmas yhung dah ngwis xing dvnganh dyei soeu nghuot yvlyis nyang khanhamp eq ma seq nyvng!

⁹Housoeh las jyo yhomh shishenh lyis ngah jyungshuk jyo yahge zvbiq doms yoeus das, nyang wuot das xiklyis ngos dyei dah sauh yahge jeiyhwiq lyis yoeus tyamp das.

¹⁰Nyah hwank jens xikkhonh mas ngos nyang lyis shohchen shang das. Nyang lyis ngah yomsoq masyah hank eq ma yoh khyuot yoeus.

¹¹Ngos nyah pyo pwe, zvn yau pwe, khyvp khanghmuh pwe yahge no nyeih pwe, nyah lomsnoq cho huom dvnganh lyis tomh tyamp das.

¹²Nyang taiq, nyang nyah hwank jens lyis phuqsoe dah nyhenshang nyamoq dyei dah zvbiq nwis yahge maiphang zains nghuot ge yvlyis ngos mhont tyamp das. Ngos nyah zvbiq khyam yahge shih khyam lhyi mhanhdyvp kuot las, yewus hauh yvlyis mhont das.

¹³Nyang ngos lyis tohnyhik las Bala lyis xangh ngheq dyei; phauhdap shunkzis wuot las nyah hwank jens thang mha chank khat loh shishenh gvng mas ngos nyang lyis joeng das. YHENSAIN taiq goeus, ge.

¹⁴Housoeh las ngos nyang lyis Sihyos pheh doms shwih loh das. Houmha Jyetdap dang yah ngos nyang lyis doms ung das.

¹⁵Ngos nyang lyis nyang yoh dah zvbiq khyam doms dyei das las, Yau cho Langhkhau lyis nghamhloms khomh kuot das. Nyang gas lonyi bon lyis Egutu masyah thuq los buisnyeis lyis kuot teh, houmha ngos lyis jyet cho doms kuot das.

¹⁶Hauh thang lhyi nyang ngos lyis nyah yhensain phoq ge dvlhain doms lui das - Nyang ngos lyis nyah Bala ge ma lui lo das, ge.

¹⁷Ngos nyang lyis Bala nyings khanhamp eq ma doms taiq nhang lo das.

¹⁸Hauh shishenh lyis ngos yewus jens yahge nghoq jens yah thanghchvp toh das las ngah dius jens lyis ma nos nhang das. Ngos hauh mau masyah jes kyonhkhyi dvnganh eq yoeus tyamp das, moengsa yahge lyei dvnganh yoeus tyamp das las ngah dius jens lyis nyenstap zis yah jesluiq shohluiq nyeis nhang das.

¹⁹Israel eh, ngos nvng lyis ngah yhensain nyhiq kuot das. Ngos nvng lyis jyoeng das, lomluk das. Ngos nvng lyis mathank magons jyet zis yahge nhaiqnyen cho chixoeuq las vcaiq vto ngah zis kuot das.

²⁰Ngos nvng lyis dangthoengh zwi las ngah zis kuot das las nvng ngos lyis YHENSAIN khyvlyis rhen das.

²¹Hauh shishenh lyis ngos ngah dius Israel jens dung yvlyis phuk taiq das. Ngos nyeisjvng mas mau wus nhang das las nyeisjvng gas jyo, zvbiq shih, tsanlun shih thuq los nhang das.

²³Ngos ngah dius jens lyis hauh mau mas toh las nyeisgis los nhang das. Jyet zis ma xauh ge bang lyis ngos jyet cho chixoeuq das. Ngah dius ma nghuot ge bang lyis, Namoq ngah dius jens nghuot oen das. Nyamoq eq, Nvng ngamoq dah Mangso nghuot, ge das.