Read Achang HOSEA 4 Bible Online

HOSEA 4 - Achang bible

HOSEA 4

¹Israel jens eh, YHENSAIN taiq dang gyo geh. Haih mau mas nyeis bang lyis YHENSAIN kauq cho bos. Hauh mau mas lomluk cho, jyet cho ma bos. Dius jens gas ngos lyis Mangso khyvlyis ma rhen.

²Nyamoq gas nhoengh, hwah, dius sat, khauh zis yahge nyi shuot lvng shuot. Lhung cho je los, dius sat cho dvkoeuq thang lhyi dvkoeuq bos.

³Housoeh las hauh mau gas kyuk das las houmha nyeis zis dvnganh shei das. Gaunyhauq yahge nghoq, oengdoq yangh, shei das.

⁴YHENSAIN taiq, dius jens lyis hank eq ma kauq bas jungh, than than ma taiq bas jungh. Ngos phudyei bang yah tyi lha lop.

⁵Nvng nyeih eq nyenh eq thungh lains, lvpe eq nvng yah dvyhangteh nghuot. Ngos nah ungwes Israel lyis mhont das.

⁶Ngah dius jens gas ngos lyis ma rhen yvmvyah jom lo das. Namoq phudyei bang ngos lyis rhen das zis ngoek las ngos jyauh cho lhyi peq tyamp. Housoeh las ngos namoq lyis peq las namoq loloeu jens lyis ngah phudyei bang khyvlyis ma rhen das.

⁷Nyamoq phudyei bang mvno nyo mvno ngos lyis zes tyi lha yaunos kuot: housoeh las ngos namoq dah nyoqnho ngelang lyis nge pyaih yvpheh lhaiq kat das.

⁸Dius jens yaunos kuot las yaunos jyungshuk chi los lyis phudyei bang xauh zo. Housoeh las namoq gas nyamoq yaunos zes zes kuot das zis o.

⁹Namoq gas dius jens xauh dah joeng cho yah dvyhangteh xauh das. Ngos namoq kuot dah ma gis cho nyhenshang phauh shangh joeng das.

¹⁰Namoq gas namoq dah phudyei gvmboms zo das laus eq yuot nyeis shih das. Namoq gas lo jens jebais los nhang dah mangso jens lyis paiq laus eq lo ma bos. Khasoeh ge lyis gohtoeu mangso jens thang mha chank loh das zis ngah jyank masyah nungs phuk loh.

¹¹YHENSAIN taiq, Zvbiq vcauh eq vsaiq eq aiq ja yah ngah dius jens dah seq nghamh cho lhyi thyoqzo loh.

¹²Nyamoq gas saiqchvp masyah nyoqnyvng sang. Wuseh gas nyamoq seq mes yvlyis taiq dyei. Nyamoq gas nghe nyhiq duot das vmesbih nyamoq nyang gungs gohtoeu mangso jens lyis dyei tyamp teh, ngos lyis tyamp khoq.

¹³Nyamoq gas boms thyoh, gyingshang joqyos mas lomhxangh tsain lainh. Jing thoq, buisshen gis dah saiq nyhang zains khyei mha xangh tsain ngheq dyei. Thang thank lyis namoq dah lonyi jens nghe nyhiq duot las, doeusmuh jens lvng tsain shuot.

¹⁴Nghuot laus eq haih xiklyis ngos nyamoq lyis ma joeng das. Khasoeh ge lyis namoq nyang yhenmuh nghe nyhiq jens yah dvgeh loh las yius mangso lhyi lomhxangh lainh dyei. Houka, Uhnuk ma bos bang gas dyoqbis tyamp das, ge sodang mas taiq zis yah dvyhangteh nghuot.

¹⁵Israel dius jens ngos lyis lom maluk laus eq, Yuda gas hau dvyhangteh dah yobos ma bos bas jungh. Giga mas, nghuot ya Bet-awen[1] mas vpaiq, nghuot ya houmha dwis nyeis YHENSAIN dah nyings yoeus las dangthoengh vtoh.

¹⁶Israel dius jens gas luzoe soeh ehnyet than. Ngos nyamoq lyis katjang mas yvng lyis teh khasoeh yoh tsoh das!

¹⁷Israel dius jens gas phvra yah tsoq goh toh, nghuot lo goeus jungh.

¹⁸Zvbiq nyoshoq shuk thang lhyi nyamoq nghe nyhiq nan yvmas tsain pyo nyeis. Nyamoq gas nyamoq dah nyoqnho ngelang thoq lyis xoqphuh cho lhyi zes ngwis.

¹⁹Nyamoq gas lyeis muot yvmas bos loh teh dang loh das. Nyamoq gas phvra lyis lomhxangh lainh gvng mas xoqphuh das.[2]