Read Achang HOSEA 9 Bible Online

HOSEA 9 - Achang bible

HOSEA 9

¹Israel dius jens eh, Mangso lhyi ma seq bang teh zvn yau dah pwe kuot cho no geh. Namoq gas namoq dah Mangso mhayah nungs phuk loh zis yah nyang lyis lom maluk kuot. Mau gonh namoq nyang gungs lyis nghe nyhiq teh Bala mangso lhyi ungh tyamp. Namoq jyo yoh zis gas Bala dyei zis nghuot ge nghamh.

²Nghuot laus eq ma nyangh lyis jyo, tsanlun coeu ma tham lo das, zvbiq eq ma bos lo das.

³Israel dius jens YHENSAIN dah mau mas ma nyet lo das. Egutu pheh tauh e chah das. Asiria mau mas eq tung toh zonoms zo chah das.

⁴Hau lvbaus mau mas YHENSAIN lhyi zvbiq jyungshuk ma yoh kuot das, lomhxangh eq ma yoh chi los das. Nyamoq dah zonoms gas shei yos mas zo dah wom teh zo bang dvnganh lyis vwot v-oeu bweh nhang. Houka yuot cho lhyi kyingh nhaiqtap nhang lha YHENSAIN dah Yhenmuh mas jyungshuk khyvlyis cha eq ma gis yoeus loh.

⁵Housoeh lyis YHENSAIN lhyi nyoqnho ngelang dyei, toeuq toh pwe shishenh jweh lyis nyamoq cha kuot goh das lah?

⁶Dyoqbis zainsmuh los lyis dius jens sanh tyamp zis xauh. Egutu jens gas nyamoq lyis tsainh toh das. Nyamoq lyis Memphi mha nyhop tyamp das zis tsainh das. Nyamoq dah ngwis zisyos yahge gohlhain nyamoq yhen bos dah joqyos gas nyoq yahge zoeugyomh yah nghop tyamp das.

⁷Joeng cho xiklyis shishenh jweh goeus. Dius jens nyamoq mon-yih zis yoh das shishenh jweh goeus. Hauh zis bweh los lyis Israel seq lo das! Namoq taiq, Haih lvpe ka koh, hai Dyos wvng lungh soeu ka huonh, ge. Namoq dius jens dah yaunos gas svsoh kuh yvmvyah ngos lyis svsoh hoeng.

⁸Mangso ka nyah dius jens Israel lyis zaih nhang das xiklyis ngos lyis lvpe dvyuk khyvlyis nhang goeus. Nghuot laus eq ngos khalhye loh khalhye nghoq lyis teh twih tungh khyoq. Mangso dah Yhenmuh mas yangh dius jens gas lvpe dah jeswus nghuot joq.

⁹Nyamoq gas Gibea wus mas teh, svsoh lhung dah yaunos kuot goeus. Mangso ka nyamoq dah yaunos lyis soh las hauh xiklyis nyamoq lyis joeng das.

¹⁰YHENSAIN taiq, Ngos Israel lyis cangxeih xo nyvng uhlyis houka sihyos mas yuk dah zvbiq shih lyis nyvng teh nghuot. Ngos namoq dah phauh thyeih moq lyis cangxeih nyvng uhlyis maiphang shih xeih nyhink zis teh nghuot. Nghuot laus eq nyamoq Peor boms mas jweh lyis nyamoq Bala lyis paiq xi lha ma nyangh lyis nyamoq jyet dah mangso teh vchoqh vlhauq bweh los.

¹¹Israel dah kuhxing cho ka nghoq teh dang dyuk das. Houmha lo khoeu los zis ma bos, loshang gungs lyis chi vmesbih eq ma bos, loshang dap zis eq ma bos lo das.

¹²Lo jens lyis nyhoeu kat lyis yangh ngos nyamoq lyis dvyuk eq ma nyet lo shoq yop tyamp das. Ngos haih dius jens lyis tyamp lyis nyamoq mas gyukphoh zis bweh los das.

¹³YHENSAIN eh, ngos nyamoq dah lo jens lyis chank khat las sat yvlyis yoh nyvng.[8]

¹⁴Ngos nvng lyis haih dius jens xiklyis cha dung das? Nyamoq dah vmesbih jens dyei thonh bweh las dyei nauh kyuk bas jungh.

¹⁵YHENSAIN taiq, Nyamoq dah ma gis zis kuot cho dvnganh gas Giga mas xi. Houmha ngos nyamoq lyis hoeng. Nyamoq kuot dah ma gis cho gvng mas ngos nyamoq lyis ngah mau masyah khat tyamp das. Ngos nyamoq lyis ma jyetdap lo das. Nyamoq dah uhshe bang dvnganh ngos lyis gomloeus toq goeus.

¹⁶Israel dius jens gas, nyah vnyet kyuk las shih ma shih dah vzains teh nghuot; Nyamoq lo ma bos das. Bos lyis yangh, nyamoq svsoh jyet bang lyis ngos sat das.

¹⁷Ngos Phuqsoe dah Mangso ka nyah dius jens lyis peq das: khasoeh ge lyis nyamoq nyah dang ma gyo. Nyamoq gas dius nyau jens mas whang yenh bang bweh das.