Read Achang YOEL 3 Bible Online

YOEL 3 - Achang bible

YOEL 3

¹YHENSAIN taiq, Hauh uhlyis ngos Yuda mau yahge Yerusalem wus dah nyeisgis yaplhoq cho lhyi doms toeu dyei das.

²Ngos dius nyau jens dvnganh lyis tsainh las Soetuon cho Langhkhau mha shwih los das: nyamoq ngah dius jens lyis kuot goeus cho gvng mas Ngos houmha nyamoq lyis soetuon das. Nyamoq gas Israel jens lyis lvbaus mau mas sanh tyamp las ngah mau Israel lyis kangh tyamp.

³Nyamoq gas jonsdoeus bang hank yoh oeng zis doeugoh zis yah tsain thyet. Nyamoq gas nghe nyhiq phauh yahge zvbiq xiklyis nyelo yukgis lo jens lyis jons tsain ungh.

⁴Taire, Sidon yahge Philisti mau dvnganh mas bang eh, namoq ngos lyis cha kuot bah oen? Namoq ngos lyis lvto phuk bah oen lah? Namoq phuk nghuot lyis, ngos namoq lyis lvnyap tauh dyei das.

⁵Namoq ngah ngwis xing yoeus, ngah phauhdap zisyos lyis namoq dah yhenmuh jens mas tsain wuq toh.

⁶Namoq gas Yuda yahge Yerusalem dius jens lyis nyamoq mau yah we mau mas shwih loh las Greek jens jyank mas ungh.

⁷Gvshih ngos nyamoq lyis namoq ungh toh joqyos masyah shwih thuq los das. Namoq nyamoq lyis kuot goeus zis ngos namoq lyis kuot das.

⁸Ngos namoq dah loloeu lonyi jens lyis Yuda dius jens jyank mas ung nhang lha; nyamoq gas nyamoq lyis we dah Sabean jens jyank mas ungh das. Ngos YHENSAIN taiq goeus.

⁹Haih hoeuh cho dius nyau jens mas taiq kyoh geh. Moeng zan das xiklyis sont las, jes thoeuqzoe jens lyis lui geh: nah jeslo jens dvnganh tsainh las jens loh geh.

¹⁰Namoq khont-suh lyis moengsa, banlyenh lyis lham bat geh; yomnhuk soeu yangh zan chah.

¹¹Vyvm vwi mas nyeis dius nyau jens dvnganh eh, langhkhau mha lvnyap[2] los zop geh. YHENSAIN eh, nah jesphung gyoh los nhang lha nyamoq lyis zan aq!

¹²Dius nyau jens gas cicont kuot las Soetuon Langhkhau mha los chah. Houmha ngos YHENSAIN ka tsung lha vyvm vwi mas nyeis dah dius nyau jens dvnganh lyis soetuon das.

¹³Nyamoq gas svsoh lhung. Jyo yhomh nyos lyis guk yet teh zan khyoq geh; nyamoq lyis zvbiq dyingh dah nyhetzwvng mas zvbiq shank shoq nyhet teh thungh thyi geh.

¹⁴Hau Soetuon Langhkhau mha YHENSAIN dah buisnyeis jweh los bah ge goeus las dius mons mons tsain nyeis.

¹⁵Buislom lhamhmuh chuot tyamp las kyi eq ma bvng lo.

¹⁶YHENSAIN ka Zion boms masyah kaiq las nyah thwe ka Yerusalem masyah maujau soeh jau das; maukhung yahge nyeisjvng nonh das. Nghuot laus eq nyang nyah dius jens lyis gos das.

¹⁷Housoeh Israel eh, Ngos gas YHENSAIN namoq Mangso nghuot yvlyis namoq seq das: ngos gas ngah gyingshang jing Zion mha nyeis. Yerusalem gas ngah gyingshang wus nghuot das las lvbaus yah khanhamp eq ma doms ung lo das.

¹⁸Hauh shishenh lyis boms jens gas zvbiq khyamh yah nghop das. Jing khanghmuh mas noeu jens lyis nyvng das. Yuda mau gonh nyhenshang jeis nyoshoq yoh das. YHENSAIN dah Yhenmuh masyah jeislo dvlvng yaus das las hauh zis Akhesia Langhkhau lhyi jyweq das.

¹⁹Egutu mau gas sihyos, Edom mau jyamhjyuklhyuk joqyos bweh das: khasoeh ge lyis nyamoq gas Yuda mau lyis zan las tswi ma bos dius jens lyis sat.

²⁰Sat zis xauh bang xiklyis ngos lvto phuk[3] das. Yobos bos soeu lyis eq ma kat kat das. Nghuot laus eq Yuda mau yahge Yerusalem wus gas vcaiq vto dius nyeis jang nghuot das. Ngos YHENSAIN ka Zion boms mas nyeis das.