Read Achang AMO 1 Bible Online

AMO 1 - Achang bible

AMO 1

¹Heika Tekoa wus mas dah yvng yoeuh soeu Amo dah dang tsain nghuot. Yuda hwankti Uzia yahge Yehoash lo Israel hwankti Yeroboam zaih lyis, hau maunyeis ma dwis shih aiq zvn dah xikpheh, Mangso ka Israel yah sen cho dvnganh Amo lyis chixoeuq.

²Amo taiq, YHENSAIN Zion mhayah nyings las nyah thwe Yerusalem masyah mau soeh jau kat. Katjang kyuk las Kharmel boms mas dah mhanh xwi loh.

³YHENSAIN taiq, Damasku dius jens yaunos doms kuot doms kuot las haih xiklyis ngos nyamoq lyis jyoengh joeng das. Nyamoq gas Gilead dius jens lyis svsoh lhoeng khyvlyis kuot goeus.

⁴Housoeh las ngos hwankti Hazael tsuk dah hwankti yhen thoq mas nyi nhang lha hwankti Benhadad dah thoenkgus jesdvp lyis ngheq kat das.

⁵Ngos Damasku wus khomh kyank lyis khyauh tyamp las Awen langhkhau mha nyeis bang yahge Betheden mas guon soeu lhyi yoeus tyamp das. Siria bang gas Kir mau pheh jonsdoeus loh das.

⁶YHENSAIN taiq, Gaza wus mas bang gas yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas dius dvnyau gonh lyis shwih las Edom jens jyank mas jons khyvlyis ungh.

⁷Housoeh las ngos Gaza ciank thoq mas nyi khyoq las nyah thoenkgus jesdvp jens lyis ngeh das.

⁸Ngos Ashdod yahge Ashkelon wus jens mas dah guon bang lyis yoeus tyamp das. Ngos Ekron wus lyis joeng das, nyet shih dah Philisti jens dvnganh shei das.

⁹YHENSAIN taiq, Taire dius jens yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas dvnyau gonh lyis Edom pheh shwih jons loh, lho lha nyamoq kuot toh dah buisnoms dangthoengh lyis thyoq.

¹⁰Housoeh las ngos Taire wusciank thoq mas nyi khyoq las nyah thoenkgus jesdvp ngheq das.

¹¹YHENSAIN taiq, Edom dius jens yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas nyamoq dah buisnoms Israel jens lyis shoh soeh khat las nyamoq nhaiqnyen cho ma bos yvlyis chixoeuq. Nyamoq nhaiqyo cho ma thank, khanhamp eq ma thank nhang.

¹²Housoeh las ngos Teman wus thoq mas nyi khyoq zis yah Bozra thoenkgus jesdvp ngheq das.

¹³YHENSAIN taiq, Amon dius jens yaunos doms kuot doms kuot, haih gvng mas ngos nyamoq lyis jyoengh joeng das. Nyamoq dah mau jyeq kat dah zan goh yvmas Gilead mau mas loshang gungs lyis chi dah vmesbih jens dah ung lyis yangh tsain khwih tyamp.

¹⁴Housoeh las ngos Raba wusciank thoq mas nyi khyoq las nyah thoenkgus jesdvp ngheq kat das. Housoeh lyis jeszan buisnyeis lyis kaiq hoeu lha hau zan cho ka lyeisjyang teh toeukhuk das.

¹⁵Nyamoq dah hwankti yahge nyah zauguon jens gas jonsdoeus loh das.