Read Achang AMO 3 Bible Online

AMO 3 - Achang bible

AMO 3

¹Israel dius jens eh, namoq dvnyau gonh lyis Egutu masyah shwih thuq los dah YHENSAIN hai namoq cho taiq nyeis loeus lyis gyo geh.

²Nyeisjvng thoq dius nyau jens mas ngos namoq dvnyau lyis kyingh seq las yoeuh gomh. Heika nah yaunos svsoh gyukphoh nghuot nhang. Housoeh yvmvyah hauh nyhenshang ngos nvng lyis joeng chah.

³Dius dvzomh gas xauhgoh das zis ma toeuq lyis dvgeh gyung yoh toq lhyeh?

⁴Khangkhyi ka saiqkhyam mha shoh ma yoh nyvng lyis nyings lhyeh? Khangkhyi kyoh gas dvja ja ma xauh yoeus lyis nyah khyung mha nyings lhyeh?

⁵Lhyik thung yvmas nhoh zis ma bos lyis nghoq nyih lhyeh? Dvja ma nyih lyis lhyik baiq lhyeh?

⁶Wus khau mha jes lvbuh muot lyis dius jens ma gyuk mus das lah? YHENSAIN ma nhang lhyi wus lyis dyoqbis zainsmuh zangh das lah?

⁷Yomzains YHENSAIN ka nyang toeuq cho nyah jyeidwis lvpe jens lyis ma phank xoeuq khanhamp eq cha ma kuot.

⁸Khangkhyi nyings lyis ma gyuk soeu hank yoh bos? Yomzains YHENSAIN taiq lyis, nyah loeus ma hoeuh hank yoh kuot?

⁹Egutu yahge Ashdod hwankti yhen jens mas nyeis bang lyis loeus tsain kyoh geh: Samari yvmlhaink jing jens mas dvgeh zain los las houmha thyoqpi zainsmuh yahge dius sat cho lhyi yoeuh geh.

¹⁰YHENSAIN taiq, Haih bang gas nyamoq dah yhen mha dius sat zis yah lhuot yoeus dah vyhang yah tyink toh. Nyamoq gas dang khasoeh jings das zis yangh ma seq.

¹¹Housoeh yvmvyah jes dvphung ka nyamoq dah mau lyis lhaink toh las, nyamoq dah thoenkgus jesdvp jens lyis mhont das, nyamoq dah yhen lhyi thyoqpi tyamp das, ge.

¹²YHENSAIN taiq, Yvng yoeuh soeu ka yvng lyis khangkhyi zo masyah khyei aiq khyungh, nghuot ya no dvkhyvp kyingh yoh lhuot yoeus teh, gvshih pyo dah jung jens mas jyont toh dah Samari dius jens dvtsiq kyingh dvdoeng lo das.

¹³Gvshih gyo las Yakop dah vnyau vshih jens lyis taiq kyingh aq, ge Maukhung Jesphung, Yomzains YHENSAIN taiq.

¹⁴Israel dius jens dah yaunos gvng mas ngos nyamoq lyis joeng nyeih lyis ngos Bethel phon jens lhyi mhont tyamp das. Phon khanghmuh mas dah vthunk phon khyau jens lhyi eq khyauh las nyeisjvng mas gyoh das.

¹⁵Cungh yhen jens, zvn yhen jens lyis mhont das; cang zwis yah shunk toh dah yhen jens dyoq gyoh joq das, kuh dah yhen zains khanghmuh dyoqbis tyamp das, ge.