Read Achang AMO 7 Bible Online

AMO 7 - Achang bible

AMO 7

¹Ngos Yomzains YHENSAIN jyank masyah nyoqnyvng yoh. Houmha Mangso ka hwankti dah gvmboms huhyau dye yet thang lhyi, mhanh nhungh doms yuk los shishenh lyis, janghgyik dvwhom gvnkhanh kat zis ngos nyvng.

²Ngah nyoqnyvng mas hauh janghgyik jens gas hauh mau mas nyau ya nyaus zis dvnganh zo tyamp zis ngos nyvng las ngos taiq, Yomzains YHENSAIN eh, nah dius jens lyis yobos khyuot dyei aq. Nyamoq gas ngis las yomnhuk yvmvyah khasoeh yoh doeng das, oen.

³YHENSAIN ka nyah ehnyet thaiq las taiq zis gas, Nvng nyvng zis ma bweh los das, ge.

⁴Ngos Yomzains YHENSAIN jyank masyah nyoqnyvng gohtoeu dvkoeuq yoh. Houmha nyang nyah dius jens lyis nyi yah joeng das zis sont nyeis yvlyis nyvng. Hauh nyi gas nyeisjvng khau namukdra zainsmuh lyis ngeh tyamp. Thang lhyi maunyeis lyis ngeh xi loh.

⁵Hauh uhlyis ngos taiq, Yomzains YHENSAIN eh, no aq, nah dius jens gas ngis las yomnhuk yvmvyah khasoeh yoh doeng das, oen.

⁶YHENSAIN ka nyah ehnyet doms thaiq las taiq, Haih zis eq ma bweh das, ge.

⁷Ngos YHENSAIN jyank masyah gohtoeu nyoqnyvng dvkoeuq yoh. Houmha ngos nyang lyis mvvs lang zis yah ci toh dah ciank yvm mas yap joq zis nyvng. Nyah loq mas mvvs chi toh.

⁸Nyang ngos lyis, Amo eh, nvng cha nyvng, ge nyei. Ngos gas, Mvvs nyvng oen toeuh. Hauh thang lhyi nyang taiq, Ngah dius jens gas haih lhyoh dah ciank teh nghuot yvlyis hai mvvs lyis yhung zis yah chixoeuq. Ngos nyamoq lyis joeng das cho ehnyet ma doms thaiq lo das.

⁹Isak dah vnyau vshih dah paiq joqyos dyoqbis tyamp das. Israel dah gyingshang joqyos dyoqgyoh tyamp das. Ngos Yeroboam dah hwankti diusjangh caiq thank loh nhang das, ge.

¹⁰Bethel mas dah phudyei Amazia gas, Israel hwankti Yeroboam jyank mas dang tying kat Amo gas Israel dius jens mas nvng lyis tyi lha lhaink nyeis. Nyang taiq dah dang gas hauh mau lyis dyoqbis nhang.

¹¹Heika nyang taiq zis nghuot. Yeroboam gas jes mas shei das, Israel dius jens gas nyamoq mau masyah shwih jons loh das, ge.

¹²Hauh thang lhyi Amazia gas Amo lyis, Lvpe eh, geh goeus, Yuda mau mas doms loh las houmha pe lha womdau khoeu aq.

¹³Hai Bethel mha vpe lo: haih zis gas hwankti paiq dah joqyos, dius jens dah yhenmuh nghuot, ge.

¹⁴Amo phuk taiq zis gas, Ngos lvpe pe lha womdau khoeu dah lvpe ma nghuot. Ngos gas yvng yoeuh las lvhomp zains dyangh soeu dvnghuot.

¹⁵Nghuot laus eq YHENSAIN ka ngos lyis ngah muh yvng yoeuh masyah shwih yoeus las, nyah dius jens Israel lyis los pe das xiklyis zaudang khyoq.

¹⁶Housoeh las gvshih YHENSAIN taiq yvlyis gyo aq: nvng ngos lyis lvpe vpe, Israel jens lyis tyi lha vtaiq, ge.

¹⁷Housoeh las Amazia eh, YHENSAIN nvng lyis taiq, Nah yhensain nyhiq gas haih wus mas nghe nyhiq duot das. Nah lo jens jes mas sat zis xauh das. Nah maunyeis lyis gvm las gohyuk lyis tsain dyei das. Nvnyang eq gohnyau bang mau mas shei das. Israel jens gas nyamoq nyang mau masyah jyoengh shwih jons loh das.