Read Achang AMO 8 Bible Online

AMO 8 - Achang bible

AMO 8

¹Ngos Yomzains YHENSAIN jyank masyah gohtoeu nyoqnyvng dvkoeuq yoh. Hauh yvmas ngos shih dvkyank nyvng.

²YHENSAIN ka Amo eh, nvng cha nyvng, ge nyei. Ngos gas, Shih dvkyank nyvng, oen toeuh. YHENSAIN ngos lyis taiq, Ngah dius jens Israel xiklyis vthang jweh goeus, nyamoq lyis joeng das cho mha ngah ehnyet ma doms thaiq lo das.[6]

³Hauh buisnyeis lyis hwankti yhen mha dah chunghthwe ka kuk ngaus thwe bweh das. Dvkhau yah shei mvng tsain joq das. Nyamoq gas tsoeklo tsain doeuh tyamp das, ge.

⁴Nyungs bang lyis nang gyik las, hauh mau mas dah shohjyen bang lyis tungh mhont bang namoq eh, haih zis gyo geh.

⁵Namoq nyang taiq zo zis gas, ngamoq dah jyo yoh ungh das zis gyingshang nyeih lai shoq ma thoq langh nyeis lo. Ngamoq yoh doms ungh das zis No nyeih khanhamp thank das au? Housoeh ngamoq ma jus dah pan, jvng yhung lha ngamoq dah wis bang lyis mhuih zis yah phauh toqh ungh das.

⁶Ngamoq ma phauh dah sunghso lhyi phauh changh changh yah yoh ungh. Jyen ma yoh cap dah shohjyen soeu dvyuk yuk xo nyvng lyis nyang lyis thyvkoq dvzomh phauh yangh ma bos jons khyvlyis wis das.

⁷YHENSAIN, Israel dah Mangso ka nyamoq dah ma gis zis kuot cho lhyi khanhamp eq ma tohnyhik das ge maukhi toh goeus.

⁸Housoeh nyeisjvng dwis das, hauh mau mas nyeis bang yuk khanghmuh shanghsenh das. Dvmau gonh nonh das. Houka Nile lvng teh toq los las gyoh das.

⁹Ngos nyeih gungs lyis buis wvng nhang lhyi, nyeih lyis nyeisjvng gas chuot das shishenh jweh los nyeis. Ngos Yomzains YHENSAIN taiq goeus.

¹⁰Ngos namoq dah pyo pwe lyis shei pwe, namoq dah gaus dah chunghthwe lhyi kuk dah ngaus thwe pheh lhaiq kat das. Ngos namoq lyis uhyuk nhang lha yanghthung dyimis wuot nhang das. Housoeh namoq gas loloeu loteh xiklyis nyah nyhiphoq kuk teh kuk nhang das. Buis wvng shoq hauh buisnyeis gas ma gis mus das.

¹¹Ngos hauh mau mas phanghkhauq nhang lhyi dius jens yuot shet das. Nghuot laus eq zos yuot jeis shet phanghkhauq ma nghuot, YHENSAIN jyank masyah dah loeus, yuot shet das shishenh jweh los nyeis. Ngos Yomzains YHENSAIN taiq goeus.

¹²Dius jens gas Coh Thomh masyah Mediteranean thomh jweh shoq, mautsung mhayah buisthuq pheh jweh shoq suh whang yenh. Nyamoq gas YHENSAIN jyank masyah loeus dvkhauyah xo laus eq hauh yvlyis ma xo nyvng das.

¹³Hauh buisnyeis lyis yombos loloeu jens yahge lonyi jens yangh shet las lains das.

¹⁴Samari phvra jens lyis lui zis yah maukhi bang, Dan dah mangso nyings yah, Besheba dah mangso nyings yah, ge bang lains las ma doms toq lo das, ge.