Read Achang AMO 9 Bible Online

AMO 9 - Achang bible

AMO 9

¹Yhensain ka phon yvm mas yap joq yvlyis ngos nyvng. Nyang zaudang khyoq zis gas, Yhen pom nonh bas jungh, Yhenmuh zains thyoh jens lyis than than bat aq. Hauh zains jens lyis khyauh las, dius jens dah uhloms mas gyoh nhang aq. Ngos nyet shih dah dius jens lyis jes mas sat das. Hank eq ma luiq das, dvyuk eq phang ma luiq das.

²Shei mau mas doeu gyoh loh lyis yangh ngos nyamoq lyis chank nyhik das. Maukhung mha doq lyis yangh ngos nyamoq lyis she khyoq kat das.

³Nyamoq Kharmel boms thyoh mas tamh lyis ngos nyamoq lyis xo lha nyhik das. Nyamoq thomh theh mas ngos lyis tamh lyis ngos thomh mvnjung lyis taiq las ngat nhang das.

⁴Nyamoq dah jeswus jens nyamoq lyis shwih jons loh lyis hauh bang lyis sat aq, oen zaudang khyoq shih das. Ngos nyamoq lyis ma pangh, dvmhont das zis nghamh thyet goeus.

⁵Maukhung Jesphung, Yomzains YHENSAIN nyeisjvng lyis tanh las hauh zis dwis. Houmha nyeis bang dvnganh kuk. Mungkvn gonh gas Nile lvng teh toq las doms gyoh.

⁶YHENSAIN ka nyah yhen lhyi maukhung mha tsain kuot las, nyeisjvng thoq mas maukhung khungh toh toh. Nyang thomh mas jeis lyis lui las nyeisjvng thoq mas huot khyoq. Nyah nyings YHENSAIN nghuot.

⁷YHENSAIN taiq, Israel dius jens eh, ngos namoq lyis Ethiopia dius jens yah dvyhangteh dvnghamh. Ngos namoq lyis Egutu masyah shwih los teh, Philisti jens lyis Kreti masyah, Siria jens lyis Kir masyah shwih los.

⁸Ngos Yomzains YHENSAIN ka hai yaunos bos dah Israel munghdan lyis zungh yoeuh nyeis las hai nyeisjvng thoq masyah nyamoq lyis mhont tyamp das. Nghuot laus eq ngos Yakop vnyau vshih dvnganh lyis ma mhont das.

⁹Ngos tying toh das las Israel dius jens lyis kyangkhyink mas jyo khyink teh nhont das. Ngos nyamoq lyis dius nyau jens mas ko lha ma mon-yih bang dvnganh lyis yoeus tyamp das.

¹⁰Ngah dius jens mas yaunos bos bang, Mangso ka ngah nvm mas nos nhang ja ma jweh los nhang das, ge bang dvnganh gas jes mas sat zis xauh das.

¹¹YHENSAIN taiq, dyoq gyop gyoh joq dah yhen teh dah Dawi dah munghdan lyis doms toeu das buisnyeis jweh los. Ngos nyah tyoyvm lyis soq das, xik pheh joq vgus doms kuot toh das.

¹²Housoeh las Israel dius jens gas Edom mau mas nyet joq shih bang yahge xik pheh ngah dius nghuot khoq dah dius nyau jens dvnganh lyis ung das, ge haih muh bweh nhang das YHENSAIN taiq.

¹³YHENSAIN taiq, jyo ka yoh yhomh thoq lyis lvnyap yuk kuh das, zvbiq yoh kuot thoq lyis zvbiq shih shih nyap das. Boms jens yahge jing jens masyah zvbiq jeis chau yaus nyeis dah buisnyeis jweh los nyeis.

¹⁴Ngos ngah dius jens lyis nyamoq mau mas shwih tauh los das. Nyamoq gas dyoq gyoh joq dah nyamoq wus lyis doms tsuk las houmha nyeis das. Nyamoq zvbiq khyam tsungh las zvbiq shuk das; nyamoq khyam tsungh las nyamoq khyoq zis xauh zo das.

¹⁵Ngos ngah dius jens lyis, ngos nyamoq lyis dyei toh mau mas nyeis nhang das las nyamoq nuot tyamp zis ma xauh lo das, ge YHENSAIN, namoq dah Mangso taiq goeus.