Read Achang YONA 1 Bible Online

YONA 1 - Achang bible

YONA 1

¹Amitai dah lo Yona jyank mas YHENSAIN dah dang jweh los zis gas,

²Yona! Ninewe wusmuh pheh loh aq. Nyamoq lyis nhaiqlom thaiq los das cho loh taiq kyingh aq. Khasoeh ge lyis nyamoq dah yaunos lyis ngos nyvng.

³Nghuot laus eq Yona gas YHENSAIN xikkhonh masyah Tarshi wus pheh phang das ge toq loh. Housoeh nyang gas Yopa wus mas gyoh e lha Tarshi pheh goeu loh das sangpho nyvng lyis nyang sangpho khoq kat las, YHENSAIN xikkhonh masyah phang lha, nyamoq yah dvgeh Tarshi pheh loh das xiklyis sangpho khau mha wvng loh.

⁴YHENSAIN ka hau thomh mas lyeismuh jyang nhang kat. Thomh mas lyeismuh jyang los las sangpho gyop bah ge.

⁵Sangpho muh zwi bang gas gyuk los las, yuk khanghmuh vsainnyang mangso lhyi tsain kaiq lui. Sangpho siq das xiklyis, houmha bos dah kyahsoe jeis mas tsain tyungh khyoq. Hauh uhlyis Yona gas sangpho vlhunk khau mha gyoh e lha, sop nyang yhet joq.

⁶Housoeh las sangpho vgyis nyah jyank mas los las, Nvng khasoeh yoh yhet muih joq? Toq aq, nah mangso lhyi dung aq. Yah kang luiq das zis nah mangso yang lyis toq soh mvbeh, ge.

⁷Tsai, sangpho muh zwi bang gas, Haih shanghsenh cho hank yobos gvng mas nghuot zis yang yoh seq shoq, nyang changh nyang doeugoh yoeuh goh, ge nyamoq tsain doeugoh yoeuh lyis Yona lyis vvng loh.

⁸Housoeh las nyamoq gas, Hank gvng mas yang haih chiqjyen xauh zis taiq kyoh aq: nah muh cha nghuot? Nvng khapheh yah los? Nvng khamau mas zis nghuot? Nvng chah vnyau nghuot, ge nyang lyis nyei.

⁹Nyang nyamoq lyis taiq zis gas, Ngos Hebre dius nghuot. Thomh yahge tungyos lyis gvnkhanh toh, maukhung mha dah YHENSAIN Mangso lhyi paiq soeu nghuot, ge.

¹⁰Hauh uhlyis dius jens svsoh gyuk las, Nvng chamus heisoeh kuot, tsain ge: khasoeh ge lyis nyang taiq kyoh yvmvyah nyang gas YHENSAIN xikkhonh masyah phang soeu nghuot zis dius jens seq.

¹¹Thomh mas lyeismuh jyang yahge jeisphauq zes than los nyeis las, nyamoq gas nyang lyis, Ngamoq xiklyis thomh tam das nyhenshang ngamoq nvng lyis khasoeh kuot das, ge nyei.

¹²Nyang nyamoq lyis taiq zis gas, Ngos lyis thomh mas doeuh khyoq geh, housoeh lyis namoq xiklyis thomh tam das, haih lyeismuh jyang ka ngah gvng mas namoq lyis zangh zis ngos seq, ge.

¹³Nghuot laus eq sangpho muh zwi bang gas jyankyvm mas yoh dap shoq yomkat tsain zes laus eq thomh gas lyeis jyang zes than los las ma yoh bweh.

¹⁴Housoeh las nyamoq YHENSAIN lhyi kaiq sang zis gas, YHENSAIN eh, haih soeu dah kang gvng mas ngamoq ma somh loh bas jungh, tswi ma bos dah suih huot yobos ngamoq lyis vjenh dap nhang; YHENSAIN eh, nvng gas nvng nhaiqtap khyvlyis kuot goeus, ge.

¹⁵Housoeh nyamoq Yona lyis thomh mas doeuh khyoq lyis thomh mas changhphauq eq tam tyamp.

¹⁶Housoeh yvmvyah dius jens gas YHENSAIN lhyi svsoh gyuk las YHENSAIN lhyi jyungshuk phudyei zis yah tsain nyhen toh.

¹⁷Housoeh YHENSAIN ka Yona lyis nyhau das xiklyis oengmuh dvdoeu lyis toeuq toh zis yah dvyhangteh Yona gas hauh oengmuh womdau mas somh nyeih somh nyens lungh joq.