Read Achang YONA 4 Bible Online

YONA 4 - Achang bible

YONA 4

¹Haih cho gvng mas Yona gas ehnyet svsoh ma tap las nhaiqyo nyeis.

²Housoeh las nyang YHENSAIN lhyi shvmanh dung zis gas, YHENSAIN eh, ngos ngah mau mas nyeis shih lyis yah ngos nvng lyis taiq goeus ma nghuot lhyeh? Nvng gas jyetdap zis yahge nhaiq seq nyen dah Mangso, khanhamp eq nhaiqlom xing, pangh, nhaiqlom thaiq bang lyis yobos khyuot dyei dah Mangso nghuot yvlyis ngos seq. Housoeh yvmvyah ngos cangxeih lyis Tarshi pheh phang loh.

³YHENSAIN eh, gvshih gas ngah kang lhyi yoeus tyamp dyei aq; dwis nyeis das thoq lyis shei zis gas ngah xiklyis zes gis, ge.

⁴YHENSAIN phuk taiq zis gas, Nvng nhaiqyo zis jus lhyeh, ge.

⁵Yona gas wus mas cha bweh los das zis nyvng das xiklyis, wus dah buisthuq shot pheh e thuq tsung toh. Hauh thang lhyi nyah xiklyis zvng kuot las houmha tsung toh.

⁶YHENSAIN Mangso eq whom nwis dvzains yuk nhang lha Yona dah ehnyet lhoq ngon das xiklyis nyah uhloms mas mau toh dyei. Yona hauh whom nwis zains gvng mas svsoh pyo nyeis.

⁷Nungsnvp nyoqnyvng los lyis Mangso sont toh dah bau dvdoeu whom nwis lyis ngat dyei las hauh zis nyhauh loh.

⁸Buis canh los lyis Mangso ka gywes dah buisthuq lyeis nhang kat las, Yona uhloms mas buis ngeh yvmvyah nyungdaus las shei mes ehnyet bos los. Housoeh las nyang taiq zis gas, Dwis nyeis thoq lyis shei tyamp zis gas ngah xiklyis zes gis, ge.

⁹Nghuot laus eq Mangso Yona lyis taiq zis gas, Nvng hai whom nwis gvng mas hou iq nhaiq gis yo lhyeh, ge nyei lyis, nyang gas, Ngos shei shoq nhaiqyo gis, ge.

¹⁰Housoeh YHENSAIN taiq zis gas, Nvng ma kuot khyik, xoh eq ma xoh khyik, dvnyens dvm lyis yuk las dvnyens dvm lyis shei loh dah whom nwis lyis nvng yu.

¹¹Ngos gas nyamoq nyang loqyos loq yahge loqwi loq lyis yangh ma seq gvn bang, dius dvsens aiq mons yahge gaunyhauq nyoshoq nyeis dah Ninewe wusmuh lyis zes yu gis ma nghuot lhyeh, ge.