Read Achang GYUNG 1 Bible Online

GYUNG 1 - Achang bible

GYUNG 1

¹Israel dius jens Egutu masyah thuq zis aiq vzvn, aiq vkhyvp cangxeih vnyeih lyis YHENSAIN ka Sina mhanhdyvp, nyah xikkhonh Zvng mas Moshe lhyi taiq:

²Nvng yahge Aron Israel dius jens lyis nyah yhenbang, nyah vhuh khyvlyis nyings kui geh.

³Aiqci zvn bos bang, nghuot ya hauh thoq pheh jes muh wons geh bang yukgis jens dvnganh dah nyings lhaih toh geh.

⁴Namoq lyis pangh das xiklyis vkoq khanghmuh masyah vhuh uhjyung dvyuk yuk sang geh.

⁵Heika haih muh nyhenshang dius phung mhayah khyen toh, nyamoq vkoq mas dah uhshe bang vbusbih jens nghuot. [Vkoq] — [vhuh uhjyung] Ruben — Shedeur lo Elizu Simon — Zurishadai lo Shelumiel Yuda — Aminadab lo Nashon Isakha — Zua lo Nethanel Zebulun — Helon lo Eliab Ephraim — Amihud lo Elishama Manase — Pedazu lo Gamaliel Benyamin — Gideoni lo Abidan Dan — Amishadai lo Ahiza Asher — Okran lo Pagiel Gad — Deuel lo Eliasap Napthali — Enan lo Ahira nghuot.

¹⁷Hai dvci aiq yuk moq pangh zis yah Moshe yahge Aron gas

¹⁸aiq vkhyvp, das vnyeih lyis moqphung gonh lyis dvgeh khi huom lha yhenbang yahge vhuh khyvlyis dius dvnganh dah nyings yoh lhaih toh. Aiqci zvn masyah thoq pheh yukgis jens dah nyings dvnganh suon lha lhaih comh toh.

¹⁹Houka YHENSAIN Moshe lhyi tying toh vgus nghuot. Moshe ka Sina mhanhdyvp mas dius jens dah nyings lhaih.

²⁰Yakop lobes Ruben vkoq masyah xi lha yhenbang, vhuh khyvlyis aiqci zvn masyah thoq pheh jes muh wons geh dah yukgis jens dvnganh nyings tsain kat. Suon bos bang dvnganh gas o mha lhaih toh. [Vkoq] — [Sonzoh] Ruben — 46,500 Simon — 59,300 Gad — 45,650 Yuda — 74,600 Isakha — 54,400 Zebulun — 57,400 Ephraim — 40,500 Manase — 32,200 Benyamin — 35,400 Dan — 62,700 Asher — 41,500 Napthali — 53,400 Dvnganh lyis: — 603,550

⁴⁷Lewi jens gas gohkoq bang yah dvgeh nyings ma kat.

⁴⁸Khasoeh ge lyis YHENSAIN Moshe lhyi taiq zis gas,

⁴⁹Nvng dius jens lyis jes muh wons wuq geh bang nyings kui lhyi Lewi vkoq lyis vbos nhang.

⁵⁰Hauh gungsthaiq Lewi jens lyis ngah xikkhonh mas Zvng yahge nyah kyahsoe dvnganh yoeuh das yvmas kat chah. Nyamoq gas hau Zvng yahge nyah kyahsoe dvng das, houmha phuqsoe das. Nyamoq dah thoenggus gas hauh yvm lhaink yah toeutsung das.

⁵¹Namoq dah thoenggus cheh khanghmuh Lewi jens gas Zvng lyis thyoq das; thoenggus saiq mas thoeng khanghmuh Zvng lyis toeutsung das. Lewi mas lai las hank laus eq hau Zvng nvm mas los soeu lhyi sat chah.

⁵²Nyet dah Israel dius jens eq nyang phung nyang, yuk khanghmuh vsainnyang dvp, vsainnyang khyiq nvm mas thoenggus tsain kuot das.

⁵³Israel moqphung lhyi ngos nhaiqyo las bat zis ma jweh bas jungh, Lewi jens gas hau zvng yvmlhaink mas thoeng lha hau Zvng lyis zungh chah, ge.

⁵⁴Housoeh las Israel jens gas YHENSAIN Moshe lhyi tying toh zis dvnganh kuot.