Read Achang GYUNG 10 Bible Online

GYUNG 10 - Achang bible

GYUNG 10

¹YHENSAIN Moshe lhyi taiq,

²Dius jens khi huom das zis yahge dyens toq lyis yhung das zis ngwis yah lvbuh aiq koeuq kuot aq.

³Lvbuh aiq koeuq yah thwe xing xing muot lyis, moqphung gonh ngah xikkhonh Zvng khomh, nah yvmlhaink mas huom chah.

⁴Nghuot laus eq lvbuh dvkoeuq kyingh nyings lyis gas, vhuh uhshe bang kyingh nah yvmlhaink huom das.

⁵Dvlhain dvm than than muot lyis buisthuq pheh thoeng vkoq jens dyens toq das.

⁶Aiq vlhain than than muot lyis mautyi pheh thoeng vkoq jens toq das. Housoeh dyens toq das xiklyis than than muot nyhink chah.

⁷Nghuot laus eq dius phung khi huom das lyis lvbuh xing xing muot chah.

⁸Hau lvbuh gas Aron loloeu jens, phudyei bang muot chah. O mha dah lyi gas jweh los das shishenh dvnganh mas chank nyeis das lyi nghuot.

⁹Namoq mau mas jes bos uhlyis, namoq lyis los zan dah jeswus lyis thoenk zan das zis haih lvbuh yah jeszan cho vlho muot kat chah. Hauh uhlyis ngos YHENSAIN, namoq dah Mangso ka namoq lyis pangh las namoq dah jeswus masyah khyuot yoeus das.

¹⁰Namoq dah gausyis buisnyeis, pwe nyeih, lhamhmuh canh nyeih pwe, gohtoeu lomsnoq cho pwe mha eq - namoq dah ngheq dyei jyungshuk yahge nyenstap jyungshuk phudyei uhlyis lvbuh muot chah. Hauh uhlyis ngos namoq lyis pangh das. Ngos YHENSAIN, namoq dah Mangso nghuot, ge.

¹¹Dius jens Egutu masyah thuq thang lhyi aiq vzvn, aiq vkhyvp, aiqci vnyeih lyis jyommauh gas YHENSAIN xikkhonh Zvng thoq masyah yop tyamp.

¹²Israel jens gas Sina mhanhdyvp masyah cheh las gyung loh; hau jyommauh gas Paran mhanhdyvp mas loh no joq.

¹³Nyamoq gas YHENSAIN Moshe lhyi yah dyei vmingh yah jens xi loh.

¹⁴Lhain khanghmuh nyamoq cheh lyis vzoh yah vgus gus loh. Yuda vkoq uhshe dah dvp gas nyamoq khyiq kuh khyei mha nyang phung nyang cangxeih toq loh. Hauh dvp mas vmingh dyei soeu ka Aminadab lo Nashon nghuot.

¹⁵Zua lo Nethanel gas Isakha vkoq mas dah vmingh dyei soeu nghuot.

¹⁶Helon lo Eliab gas Zebulun vkoq mas dah vmingh dyei soeu nghuot.

¹⁷Hauh thang lhyi Zvng yop las Zvng muh wons wuq bang Gershon vhuh jens yahge Merari vhuh jens tsain toq.

¹⁸Tsai, Ruben vkoq shwih dah dvp gas nyah khyiq kuh yah dvgeh nyang phung nyang toq. Hau dvp mas vmingh dyei soeu ka Shedeur lo Elizu nghuot.

¹⁹Zurishadai lo Shelumiel gas Simon vkoq mas dah vmingh dyei soeu nghuot.

²⁰Deuel lo Eliasap gas Gad vkoq mas dah vmingh dyei soeu nghuot.

²¹Hauh thang lhyi Lewi Kohat vhuh gas gyingshang kyahsoe wuq las tsain toq. Nyamoq thoeng das yvmas jweh lyis Zvng doms toeutsung toh langh goeus.

²²Tsai, Ephraim vkoq shwih dah dvp gas nyah khyiq yah dvgeh, nyang phung nyang toq. Hauh dvp mas vmingh dyei soeu ka Amihud lo Elishama nghuot.

²³Pedazu lo Gamaliel gas Manase vkoq mas dah vmingh dyei soeu nghuot.

²⁴Gideoni lo Abidan gas Benyamin vkoq mas dah vmingh dyei soeu nghuot.

²⁵Thang thank lyis Dan vkoq shwih dah dvp gas nyah khyiq yah dvgeh, dvp dvnganh dah vthang mha zungh bang khyvlyis nyang phung nyang tsain toq. Amishadai lo Ahiza gas Hauh dvp mas dah vmingh dyei soeu nghuot.

²⁶Okran lo Pagiel gas Asher vkoq mas dah vmingh dyei soeu nghuot.

²⁷Enan lo Ahira.gas Napthali vkoq mas dah vmingh dyei soeu nghuot.

²⁸Heika Israel jens thoenggus yop las dyens toq khanghmuh nyang phung nyang vzoh yah jens loh zis nghuot.

²⁹Moshe ka nyah auyis, Midian dius Yethro lo Hobab lyis, Ngamoq gas YHENSAIN ngamoq lyis dyei das ge taiq toh mau pheh loh das. Housoeh las nvng ngamoq yah loh goh, ngamoq nvng lyis gis zis gvm dyei das. YHENSAIN ka Israel jens lyis gis zis kuot dyei das ge dangthoengh toh, ge.

³⁰Hoba toeuh zis gas, Ngos ma chank, ngos ngah choq thyet mau pheh tauh loh das, ge.

³¹Moshe taiq zis gas, Ngamoq lyis vjenh toh khoq; hau mhanhdyvp mas ngamoq khamha yoh thoeng das zis nvng seq las nvng ngamoq dah cho she soeu duot aq.

³²Nvng ngamoq yah loh lyis, YHENSAIN ngamoq lyis dyei dah shvmanh jyehjuh dvnganh nvng lyis eq gvm dyei das, ge.

³³Dius jens gas gyingshang boms Sina masyah thuq las somh nyeih gyung suh. Nyamoq thoeng das joqyos xo das nyhenshang YHENSAIN dah Thanghchvp Kwi ka vjangh nyamoq xik pheh loh.

³⁴Nyamoq thoenggus dvkoeuq dvkoeuq masyah loh las nyeih lyis YHENSAIN dah jyommauh gas nyamoq thoq mas joq.

³⁵Thanghchvp Kwi toq loh khanghmuh Moshe taiq zis gas, YHENSAIN eh, toq aq, nah jeswus jens lyis dyos loh nhang aq, nvng lyis hoeng bang lyis phang loh nhang aq.

³⁶Hau kwi loh no lyis eq, YHENSAIN eh, Israel yhenbang khyoengh mons jyank mas tauh los aq,[1] ge.