Read Achang GYUNG 12 Bible Online

GYUNG 12 - Achang bible

GYUNG 12

¹Moshe ka Khush vmesbih lyis nyihwank[3] las Miriam yahge Aron gas Moshe lhyi tyi lha taiq.

²Nyamoq taiq, YHENSAIN ka Moshe lhyi yah kyingh dvtaiq lhyeh? Nyang ngamoq lyis yah eq taiq goeus ma nghuot lhyeh, ge. Hauh dang lyis Yhensain xauhgyo.

³Moshe ka nyeisjvng gonh mas dius dvnganh thoq lyis ehnyet noeuh nhamp soeu nghuot.

⁴Moshe, Aron yahge Miriam lyis YHENSAIN nyetlos nyettant taiq zis gas, Namoq somh yuk ngah xikkhonh Zvng mas thuq los geh, ge.

⁵Nyamoq loh lyis YHENSAIN ka jyommauh punk yah Zvng khomh mas lyih yap las Aron, Miriam, ge lui. Nyah aiq yuk eq xik mas los.

⁶YHENSAIN taiq zis gas, Ngah dang gyo yoeuh geh: Namoq mas lvpe[4] jens nyeis lyis ngos nyamoq lyis nyoqnyvng mas ngah gungs chixoeuq; yhetmoq mas taiq.

⁷Ngah dius Israel dvnganh lyis yoeuh das xiklyis kat toh dah ngah jyeidwis Moshe lhyi taiq uhlyis gas houyah shaih.

⁸Ngos nyang lyis jis lyis wishomp ma shomp, nhuottsuk kyoq kyoq taiq; nyang ngah gungs khyank lyis yangh nyvng. Namoq ngah jyeidwis Moshe lhyi tyi lha hou iq womh taiq lhyeh, ge.

⁹Housoeh YHENSAIN nyah aiq yuk lyis nhaiqyo zis yah nyang gang loh.

¹⁰Jyommauh eq Zvng masyah yop loh; Miriam[5] dah shohyeis mas nyetlos nyettant gyu teh thyoeu dah gyukphoh noslom yah nghop los. Aron yoeuh las Miriam mas noslom dap zis nyvng.

¹¹Aron Moshe lhyi taiq zis gas, Ngah yhensain eh, ngah aiq yuk dah vkoh vpaq cu dah joeng cho ngamoq lyis vjenh xauh nhang.

¹²Nyang lyis gungs dvkhyamh zo tyamp las shei zis khoeu los dah vyhang teh vjenh bweh nhang.

¹³Housoeh las Moshe YHENSAIN lhyi kaiq lui zis gas, Mangso eh, nyang lyis gis los nhang aq, ge.

¹⁴YHENSAIN toeuh zis gas, Nyah uwus yah nyah nyoqnho mha svkanh dyeh gyon lyis nyhet nyeih top xoqphuh nyeis chah. Housoeh las nyang lyis dvp nghe pheh dvdaus loh nyeis nhang aq; hauh thang lhyi dvyoh doms shwih wvng los, ge.

¹⁵Housoeh Miriam lyis dvp nghe pheh nyhet nyeih toh toh. Miriam dvp khau mha ma doms wvng dvchank dius jens eq gyung ma suh.

¹⁶Hauh thang lhyi nyamoq gas, Hazerot masyah cheh las Paran mhanhdyvp mas thoeng nyeis.