Read Achang GYUNG 13 Bible Online

GYUNG 13 - Achang bible

GYUNG 13

¹YHENSAIN Moshe lhyi taiq zis gas,

²Ngos Israel jens lyis dyei das Khanan mau lyis joh loh yoeuh das xiklyis dvci aiq koq mas dah uhshe bang mas, dvkoq mas dvyuk khyen nhang kat aq, ge.

³Moshe ka domsyos gyo las Paran mhanhdyvp masyah o mha dah uhshe bang lyis nhang kat. [Vkoq] — [Uhshe soeu] Ruben — Zakhu lo Shamua. Simon — Hori lo Shaphat. Yuda — Yephun lo Khaleb. Isakha — Yosep lo Igal. Ephraim — Nun lo Hoshea. Benyamin — Raphu lo Palti. Zebulun — Sodi lo Gadiel. Manase — Susi lo Gadi. Dan — Gemali lo Amiel. Asher — Mikhael lo Sethu. Napthali — Wopsi lo Nabi, Gad — Makhi lo Geuel moq nghuot.

¹⁶Heika Moshe hauh mau mas joh loh yoeuh nhang bang nghuot. Nyang gas Nun lo Hoshea dah nyings lyis Yoshua ge thaiq dyei.

¹⁷Moshe nyamoq lyis nhang uhlyis taiq zis gas, Namoq heimhayah mautsung pheh doq las Khanan mautyi chank yah boms mau pheh loh geh.

¹⁸Namoq yoeuh los das zis gas, Hauh zis khasoeh teh mau nghuot, dius khanyhoq nyeis, nyamoq yom kha iq bos?

¹⁹Hauh mau gis, gang; nyamoq nyeis wus gas khasoeh teh zis nghuot, zvng mas nyeis lah? Ciankci wus mas nyeis lah, yoeuh los geh.

²⁰Hauh maunyeis coeu ma coeu, Saiqkhyam bos ma bos yoeuh los geh? Hauh mau mas yuk dah shih dvkhamh yoeus los geh. (Hauh shishenh gas zvbiq vsaiq nyhink los yoq nghuot.)

²¹Housoeh las dius jens gas mautyi pheh Zin mhanhdyvp masyah mautsung pheh Hamat nvm chank yah Rehob wus jweh shoq joh loh tsain yoeuh.

²²Nyamoq cangxeih lyis hauh mau dah mautyi shot cho wvng las Hebron wus mas jweh. Houmha Anakim ge dam dius dah vshih jens Ahiman, Sheshai, Talmai vhuh jens tsain nyeis. Hebron wus gas Egutu mas Zoan wus ma xi shih lyis nyhet zvn xeih las kuot goeus.

²³Nyamoq Eshko langhkhau jweh las houmha zvbiq shih dvdyoms dap dah zvbiq dvko zan las hauh zis sunk lyei las dius aiq yuk jo mas lvthyauh yah dvng los. Nyamoq tvleh yahge maiphang shih eq tsain yoeus los.

²⁴Houmha Israel jens zvbiq dvdyoms zan yvmvyah hau joqyos lyis Eshko langhkhau ge nyhink.[6]

²⁵Joh yoeuh bang hauh mau lyis nyeici nyeih dye yoeuh thang lhyi tsain tauh los.

²⁶Nyamoq gas Moshe, Aron yahge Israel moqphung gonh nyeis dah Paran mhanhdyvp Kadesh joqyos mas jweh las, nyamoq nyvng khoq zis taiq kyoh, nyamoq wons los shih eq tsain chixoeuq.

²⁷Nyamoq Moshe lhyi taiq kyoh, Ngamoq hauh mau lyis loh yoeuh las gis, nyeis coeu bos zis nyvng goeus. Haih zis hauh mau mas dah shih nghuot.

²⁸Nghuot laus eq hauh mau mas bang gas yomsoq bos. Nyamoq dah wus jens eq svsoh kuh, ciank ci toh. Hauh thoq lyis houmha dam jens dah vnyau vshih lyis ngamoq nyvng khoq.

²⁹Amalek jens gas mautyi shot, Hiti, Yebusi, Amori jens gas boms mau mas, Khanan jens gas Mediteranean Thomh yvm yahge Yodan lvng yvm mas nyeis, ge.

³⁰Khaleb gas, Moshe lhyi tyi lha lop bang lyis sam nhang lha taiq zis gas, Sweh, yang gvshih loh zan lha hauh mau lyis sain yoeus goh; yang yoh ung das yombos, ge.

³¹Nghuot laus eq Khaleb yah dvgeh loh khoq bang taiq zis gas, Yang houmha bang lyis yoh zan ko yom ma bos. Houmha nyeis bang yah thoq lyis yomsoq bos, ge.

³²Nyamoq gas Israel jens mas nyamoq loh yoeuh dah mau cho ma jus zis taiq hoeuh. Nyamoq taiq zis gas, Hauh mau gas houmha nyeis bang zo das zis yangh ma yoh thuq los nhang. Houmha ngamoq nyvng bang yuk khanghmuh gas svsoh nyhang.

³³Ngamoq houmha Anak dah vnyau vshih dam jens lyis nyvng. Ngamoq gas janghgyik teh ngis oen dvnghamh; nyamoq eq ngamoq lyis housoeh teh nghamh das, ge.