Read Achang GYUNG 15 Bible Online

GYUNG 15 - Achang bible

GYUNG 15

¹YHENSAIN Moshe lhyi

²Nyang Israel dius jens lyis dyei das mau mas nyamoq chank das xiklyis o mha lyi dyei.

³YHENSAIN xiklyis ngheq dyei jyungshuk, nghuot ya nyhen toh zis tyink dyei zis phudyei jyungshuk, xihhonh jyungshuk, vjangh gyangh kuot dah loms noq pwe phudyei jyungshuk teh zis noeu, yvnglus, yvng, shvbeq yah YHENSAIN lhyi phudyei lyis haih zonoms jyungshuk xangh shom ka YHENSAIN lhyi nhaiqdoeus nhang.

⁴YHENSAIN jyank mas ngheq dyei jyungshuk khyvlyis yvng nghuot ya shvbeq phudyei soeu hank laus eq, gaunyhauq dvdoeu mas jyo jyungshuk khyvlyis tsanlun coeu 2 pint yah lhoeuq dah monh aiq paung yah dvgeh zvbiq aiq pint chi los chah.

⁶Yvnglus dyei lyis gas, jyo jyungshuk khyvlyis tsanlun coeu somh pint yah lhoeuq dah monh nyei paung

⁷yah dvgeh zvbiq nyei pint dyei chah. Hai phudyei dah xangh shom ka YHENSAIN lhyi nhaiqdoeus nhang.

⁸YHENSAIN lhyi ngheq phudyei jyungshuk, nyhen toh zis phudyei, nghuot ya nyenstap jyungshuk khyvlyis noeulu dyei lyis,

⁹tsanlun coeu nyei pint yah lhoeuq dah monh khyuk paung bos dah jyo jyungshuk dyei chah.

¹⁰Houyah dvgeh zvbiq nyei pint bos chah. Hai phudyei dah xangh shom ka YHENSAIN lhyi nhaiqdoeus nhang.

¹¹Heika noeulu, yvnglus, yvnglo, beqlo dvdoeu dyei lyis bos chah zis nghuot.

¹²Gaunyhauq dvdoeu thoq lyis nyo las phudyei lyis, houyah dvgeh bos chah zis eq hounyhoq nyo chah.

¹³Mau sain Israel jens yuk khanghmuh YHENSAIN nhaiqdoeus dah xangh shom duot das xiklyis zonoms jyungshuk dyei lyis haih zis kuot chah.

¹⁴Namoq mas nyeis dah lvbaus, dvdvm dvsoq nyeis laus eq vcaiq caiq nyeis laus eq, khanhamp laus eq YHENSAIN nhaiqdoeus dah xangh shom zonoms jyungshuk kuot dyei lyis nyang eq hau dvyhangteh lyi yah chank kuot chah.

¹⁵Jweh los das shishenh dvnganh lyis, namoq yahge namoq mas nyeis dah lvbaus lyis dvlyi yah dvtwih toh. YHENSAIN dah nyoqlvtjvng mas namoq yahge nyamoq dvyih dvnghuot.

¹⁶Namoq yahge nyamoq xiklyis dvyhangteh lyi dvkoeuq, thungh eq dvkoeuq dvtoeuq toh, ge.

¹⁷YHENSAIN Moshe lhyi,

¹⁸nyang Israel jens lyis dyei das mau mas chank das xiklyis o mha dah lyi dyei.

¹⁹Hou mhayah thuq los dah zonoms cha laus eq zo uhlyis YHENSAIN lhyi lhyenwhei vlu khyvlyis dvkhamh gvm toh chah.

²⁰Nvng ohlhyoq piq lyis, guk saiq masyah cangxeih kuot dah ohlhyoq mas cangxeih vlhyoq gas YHENSAIN lhyi lhyenwhei vlu khyvlyis dyei chah. Houka nvng thanjang mas nis dah jyungshuk khyvlyis phudyei zis nghuot.

²¹Jweh los das shishenh dvnganh lyis hai lhyenwhei jyungshuk gas namoq piq ohlhyoq masyah YHENSAIN lhyi dyei chah zis nghuot.

²²Nghuot laus eq YHENSAIN Moshe lhyi yah dyei toh lyi dvyuk yuk ma soh chank.

²³Thang pheh dius phung ka YHENSAIN Moshe lhyi yah tyingtoh zis dvnganh ma chank lyis,

²⁴dius phung ka chaxwe ma nhang gvng mas cu lhyi nyamoq gas YHENSAIN lhyi ngheq dyei jyungshuk khyvlyis noeulu dvdoeu, nhaiqdoeus nhang dah xangh shom bweh das zis, jyo jyungshuk yahge zvbiq jyungshuk phudyei chah. Hauh thoq lyis yaunos jyungshuk khyvlyis beq lus dvdoeu phudyei chah.

²⁵Phudyei soeu ka dius phung xiklyis cheihshang cho kuot dyei das. Nyamoq gas masoh mathamh dvcu yvmvyah yobos khyuot zis xauh das: nyamoq eq YHENSAIN jyank mas zonoms jyungshuk khyvlyis nyamoq dah yaunos jyungshuk chi los chah.

²⁶Israel dius phung gonh yahge nyamoq mas nyeis lvbaus gas yobos khyuot zis xauh das. Khasoeh ge lyis yuk khanghmuh gas hau cu yvmas bos.

²⁷Dvyuk masoh mathamh cu lhyi yaunos jyungshuk khyvlyis dvzvn bos dah beqmuh dvdoeu phudyei chah.

²⁸Phudyei soeu ka phon mha nyah yaunos masyah cheihshang cho kuot dyei las nyang yobos khyuot zis xauh das.

²⁹Mau sain Israel laus eq nyeis goeus dah lvbaus laus eq masoh mathamh cu cho mha lyi dvyhangteh dvtoeuq.

³⁰Nghuot laus eq dvyuk yuk, nyang mau sain laus eq, lvbaus laus eq, pa-i cu zis gas YHENSAIN lhyi maphauh madanh mhuih jyomh dah yobos nghuot las nyang sat zis xauh chah.

³¹Khasoeh ge lyis YHENSAIN taiq toh yvlyis peq las nyang tyingtoh dang dvkoeuq pa-i thyoq goeus. Nyang shei zis gas nyah yvwons nghuot.

³²Israel jens mhanhdyvp mas nyeis shih uhlyis, dvlhain ka No nyeih lyis dius dvyuk thangh xo nyeis yvlyis nyvng.

³³Nyang lyis Moshe, Aron yahge dius phung dvnganh jyank mas shwih los.

³⁴Nyang lyis khasoeh kuot chah zis bvng bvng ma seq yvmvyah zungh yvmas toh.

³⁵Hauh thang lhyi YHENSAIN Moshe lhyi taiq, Hauh soeu lhyi sat chah. Dius phung gonh dvp nghe mha luk yah doeuh sat chah, ge.

³⁶Housoeh las YHENSAIN Moshe lhyi tying toh vgus, dius phung gonh gas hauh soeu lhyi dvp nghe pheh shwih thuq las luk yah doeuh sat.

³⁷YHENSAIN Moshe lhyi taiq,

³⁸Israel jens lyis taiq aq, Namoq dyithang mha bandyoms kuot las twih lanh yah lhangh chah. Namoq haih zis jweh los das shishenh dvnganh mas kuot chah.

³⁹Hauh bandyoms gas taiq kyingh khyvlyis pangh jus das. Namoq hau bandyoms lyis nyvng khanghmuh, ngos tying toh zis soh das las domsyos yoh gyo das. Housoeh xikpheh ngah jyank masyah phanh las vsainnyang o khyvlyis kuot loh teh ma doms kuot lo das.

⁴⁰Hauh bandyoms gas ngos tying toh zis dvnganh chank kuot das zis soh nhang lha namoq ngos yah vlhomuh sen das.

⁴¹Ngos gas YHENSAIN, namoq dah Mangso nghuot. Ngos namoq dah Mangso duot das oen namoq lyis Egutu masyah shwih los. Ngos YHENSAIN nghuot, ge.