Read Achang GYUNG 17 Bible Online

GYUNG 17 - Achang bible

GYUNG 17

¹YHENSAIN Moshe lhyi taiq,

²Nvng Israel jens lyis, nyamoq dvkoq mas uhshe soeu dah lhamloq mas nyah nyings lhaih tap las lhamloq dvnganh lyis dvci aiq koeuq dyei das xiklyis taiq aq.

³Lewi xiklyis dah lhamloq mas Aron dah nyings lhaih tap geh: housoeh dvkoq dah uhshe soeu xiklyis lhamloq dvkoeuq koeuq nghuot chah.

⁴Nvng hau lhamloq lyis yoeus las ngos namoq yah xauhgoh joqyos, ngah xikkhonh Zvng mha dah Thanghchvp Kwi xik mas tsain toh chah.

⁵Ngos khyen yoeus soeu dah lhamloq gas vbuh buh das: heisoeh khyvlyis, haih Israel jens nvng lyis malyen lo tyi lha lop cho tomp tyamp das, ge.

⁶Housoeh Moshe ka Israel jens lyis taiq las nyamoq dah uhshe bang dvkoq mas dvyuk mulas dvci aiq yuk dah lhamloq nyah jyank mas dyei. Houmha Aron dah lhamloq eq chi los.

⁷Moshe ka hauh lhamloq dvnganh lyis Zvng vkhau, YHENSAIN dah Thanghchvp Kwi xik mas tsain toh.

⁸Nungs nyeih Moshe Zvng khau mha wvng loh lyis Lewi vkoq gungsthaiq Aron dah lhamloq gas vhuq thuot, vbuh buh las nyhink joq dah batan shih shih joq zis nyvng.

⁹Moshe ka hau lhamloq dvnganh yoeus las Israel jens lyis chixoeuq. Nyamoq eq houmha cha bweh zis dvnganh nyvng. Uhshe bang yuk khanghmuh eq nyang yuk nyang toeu lhamloq doms yoeus loh.

¹⁰YHENSAIN Moshe lhyi taiq, hau Aron dah lhamloq lyis Thanghchvp Kwi xik mas doms toh aq. Houka Israel gomloeus toq bang lyis zaih nhang khyvlyis toh chah. Nyamoq lop zis ma no lyis gas nyamoq shei das, ge.

¹¹Moshe ka YHENSAIN nyang lyis tying toh vgus kuot.

¹²Israel jens Moshe lhyi taiq, Hauh zis ngamoq dah thang thank nghuot goeus.

¹³Zvng mas ni loh soeu yangh shei chah lyis gas, ngamoq dvnganh shei thank loh das lah, ge.