Read Achang GYUNG 18 Bible Online

GYUNG 18 - Achang bible

GYUNG 18

¹YHENSAIN Aron lyis taiq zis gas, Nvng, nah lo jens yahge Lewi jens gas ngah xikkhonh Zvng mas phuqsoe cho yah sen dah yobos kham chah; Phudyei muh yah sen lha phuqsoe yvmas dah yobos gas nvng yahge nah lo jens kyingh kham chah.

²Nvng yahge nah lo jens Zvng mas phuqsoe uhlyis namoq lyis pangh las namoq yah dvgeh zwi das zis Lewi vkoq mas dah boekyis jens lyis shwih los aq.

³Nyamoq gas nah loq o mha nyamoq dah yvwons yoeus das. Zvng xiklyis eq nyamoq dah yvwons yoeus das. Nghuot laus eq gyingshang joqyos mas dah vyhang, nghuot ya phon mha ma gis thungh tanh. Nyamoq thungh tanh lyis nyamoq eq, namoq eq sat zis xauh das.

⁴Nyamoq gas nvng yah dvgeh Zvng mas phuqsoe chah dah nyamoq yvwons lyis wons wuq das. Nghuot laus eq toeuq toh zis ma nghuot bang nvng yah ma gis zwi.

⁵Nvng yahge nah loloeu jens kyingh hau Gyingshang joqyos yahge phon xiklyis yvwons yoeus las kuot chah. Housoeh lyis Israel dius jens thoq mas ngah nhaiqyo zis ma jweh das.

⁶Ngos gas nah boekyis Lewi jens lyis Israel jens masyah khyen lha namoq lyis jyungshuk khyvlyis dyei soeu nghuot. Nyamoq lyis ngah jyank mas kyauh toh las nyamoq Zvng mas nyamoq dah yvwons muh yoh wons wuq.

⁷Nghuot laus eq nvng yahge nah loloeu jens kyingh phon yahge gyingshang thank joqyos yah sen dah phudyei muh yvwons dvnganh wons wuq chah; Ngos namoq lyis phudyei muh jyungshuk dyei toh yvmvyah houka namoq yvwons nghuot. Ma toeuq toh soeu hank eq gyingshang vyhang mha ni loh lyis sat zis xauh das, ge.

⁸YHENSAIN Aron lyis taiq, Lomhxangh khyvlyis ma ngheq, ngos lyis lhyenwhei dyei dah vlu dvnganh gas ngos nvng lyis dyei yvlyis soh aq. Hauh zis nvng yahge nah vshih jens lyis vcaiq vto gvmboms khyvlyis kyauh goeus.

⁹Phon mha ma ngheq, gyingshang thank o mha taiq dah jyungshuk gas namoq yah sen. Houka zonoms jyungshuk, yaunos jyungshuk yahge yobos khyuot jyungshuk tsain nghuot. Gyingshang jyungshuk khyvlyis ngos lyis dyei zis dvnganh nvng yahge nah loloeu jens yah sen.

¹⁰Namoq hauh yvlyis gyingshang joqyos mas zo chah. Hauh zis yukgis lo jens kyingh dvgis zo; hauh zis gyingshang oen nghamh chah.

¹¹Hauh thoq lyis Israel jens ngos lyis dyei dah gohtoeu lhyenwhei vlu eq namoq zis nghuot das. Ngos hauh zis nvng yahge nah loloeu lonyi jens lyis jweh los dah shishenh dvnganh mas dyei toh. Nah yhenbang mas gyingshang bang dvnganh gis zo.

¹²Dvzvn dvzvn Israel jens ngos lyis dyei dah cangxeih thuq los, gis thank tsanlun coeu, zvbiq yahge zonoms dvnganh ngos nvng lyis dyei.

¹³Hau dvnganh nvng yah sen. Nah yhenbang mas lhoqshang bang yuk khanghmuh gis zo.

¹⁴Israel jens ngos lyis kyauh zis dyingh dyingh dvnganh eq namoq yah sen.

¹⁵Israel jens ngah jyank mas chi los dah loxeih, nghuot ya gaunyhauq suot xeih gas namoq yah sen. Nghuot laus eq loxeih lyis doms khyuot nhang chah. Ma lhoq ma shang dah gaunyhauq vxeih lyis eq doms khyuot nhang chah.

¹⁶Loshang jens lyis lhamhmuh dvkhyvp bos lyis gyingshang joqyos mas thyet dah kya yah dvyhangteh ngwis kyvp oeng koeuq yah doms khyuot das.

¹⁷Nghuot laus eq noeu, yvng, shvbeq vxeih gas ma gis khyuot, houka ngos yah sen lha phudyei chah. Nyamoq dah suih phon mha doeuh gyon thang lhyi nyamoq dah coeu lhyi zonoms jyungshuk xangh khyvlyis ngos lyis nhaiqdoeus nhang das xiklyis ngheq dyei chah.

¹⁸Lhyenwhei jyungshuk sainhkhonh yahge loqyos bungssan teh hauh shoh gas nvng yah sen.

¹⁹Israel jens ngah jyank mas chi los, lhyenwhei vlu dvnganh, jweh los das shishenh dvnganh mas ngos nvng lyis eq, nah loloeu jens, lonyi jens lyis eq dyei toh. Heika nvng yahge nah vshih jens yah kuot toh, ma dyoq loh dah thanghchvp nghuot, ge.

²⁰YHENSAIN Aron lyis taiq, Israel jens sain dah mau mas, nvng sain das zisyos cha eq ma xauh yoeus das. Vso maunyeis eq ma toeuq dyei das. Ngos YHENSAIN ka nvng mas chah nyeis zis dvnganh nghuot.

²¹YHENSAIN taiq, Israel jens ngos lyis dyei dah ciboms dvboms ngos Lewi jens lyis dyei goeus. Heika nyamoq ngah xikkhonh Zvng muh lyis loqzamh zwi las wons wuq dah xiklyis dyei zis nghuot.

²²Gohtoeu Israel jens gas Zvng mas ma gis ni loh. Housoeh ni loh lyis nyamoq nyang shei dah yobos zangh das cho dvshe los.

²³Gvshih masyah Lewi jens kyingh Zvng lyis loqzamh zwi las hauh yvlyis yvwons vlhomuh yoeus chah. Heika vjangh joq dah lyi nghuot. Nyah vshih jens lyis eq toeuq zis nghuot. Lewi jens gas Israel mas vjangh sain dah zisyos ma yoh.

²⁴Khasoeh ge lyis Israel jens ngos lyis lhyenwhei vlu khyvlyis dyei dah ciboms dvboms ngos nyamoq lyis nyamoq dah vso zisyos khyvlyis dyei toh. Housoeh las ngos nyamoq lyis Israel jens mas vjangh sain toh dah vso zisyos ma yoh oen taiq goeus, ge.

²⁵YHENSAIN Moshe lhyi tying toh,

²⁶Lewi jens lyis taiq aq: YHENSAIN namoq dah vso khyvlyis dyei, Israel jens jyank masyah xauh yoeus lyis hou mhayah ciboms dvboms YHENSAIN lhyi lhyenwhei vlu khyvlyis dyei chah.

²⁷Hai lhyenwhei vlu lyis danh zwi bang dah guk uh yahge zvbiq monh jyungshuk teh nghuot oen nghamh chah.

²⁸Heisoeh khyvlyis namoq eq Israel jens jyank masyah xauh yoeus dah ciboms dvboms dvnganh masyah YHENSAIN yah sen dah lhyenwhei vlu dyei chah. Namoq gas hai YHENSAIN xiklyis lhyenwhei vlu phudyei Aron lyis dyei chah.

²⁹Namoq xauh yoeus masyah gis thank zis dyei aq.

³⁰Namoq gis thank zis dyei goeus ya, nyet zis yoh yung toh goeus. Houka danh zwi soeu nyah jyungshuk dye dyei thang lhyi nyet yvlyis yung toh teh nghuot.

³¹Houka nvng yahge nah yhenbang khalhye eq gis zo: khasoeh ge lyis houka namoq Zvng muh wons wuq dah nyhenshang uhkung phauh dvnghuot.

³²YHENSAIN lhyi gis thank zis dyei goeus ya, namoq zo lyis yobos ma bos. Nghuot laus eq Israel jens dyei dah gyingshang jyungshuk mas gis thank zis ma dyei shih lyis zo las vwot v-oeu ma bweh shoq soh soh kuot geh. Ma nghuot lyis, nvng sat zis xauh das, ge.