Read Achang GYUNG 20 Bible Online

GYUNG 20 - Achang bible

GYUNG 20

¹Cangxeih lhamhmuh khyvp lyis Israel jens dvphung gonh gas Zin mhanhdyvp mas jweh las, Kadesh mas thoeng nyeis. Houmha Miriam shei lha nyhop.

²Nyamoq thoeng yvmas jeis ma joq. Housoeh las dius jens gas Moshe yahge Aron jyank mas huom los las

³lop zis gas, YHENSAIN Zvng xikkhonh mas gohtoeu Israel shei uhlyis ngamoq eq nyamoq yah dvgeh shei ya lheih:

⁴Nvng ngamoq lyis hai mhanhdyvp mas chamus shwih thuq los? Ngamoq lyis heimha ngamoq gaunyhauq yah dvgeh shei nhang lhyeh?

⁵Ngamoq lyis Egutu masyah chamus shwih los las, hai cha ma yoh yuk dah shanghsenh joqyos mas los? Heimha jyo, maiphang shih, zvbiq shih, tvleh shih ma xauh khyoq zo. Shuk das jeis yangh ma joq, ge.

⁶Housoeh las Moshe yahge Aron hau dius jens mhayah thuq las Zvng khomh mas los tsain yap joq. Nyamoq nyeisjvng mas paiq gop joq. Hauh uhlyis YHENSAIN dah phunk nyah zomh jyank mas thuq xoeuq.

⁷YHENSAIN Moshe lhyi taiq,

⁸Hau Thanghchvp Kwi xik mas joq dah lhamloq yoeus chi aq, hauh thang lhyi nvng yahge Aron dius phung gonh lyis tsainh toh aq. Nyamoq dvnganhmoq xikkhonh mas hau luk lyis taiq aq. Housoeh khyvlyis hou mhayah jeis yaus thuq los das. Housoeh nvng hau luk masyah nyamoq xiklyis eq nyamoq gaunyhauq xiklyis eq shuk das jeis yoh thuq nhang das, ge.

⁹Moshe ka YHENSAIN tying vgus lhamloq loh yoeus.

¹⁰Nyang yahge Aron gas dius phung gonh lyis hau lukzains xik mas tsainh toh lho lha Moshe taiq, Gomloeus jens eh, gyo geh, namoq xiklyis ngah zomh haih luk masyah jeis thuq los nhang das lah?

¹¹Hauh thang lhyi Moshe nyah lhamloq toeu lha, hauh zis yah luk lyis aiq dvm bat: housoeh jeislo lvng yaus thuq los las, dius dvnganh eq, gaunyhauq jens eq jeis tsain shuk.

¹²Nghuot laus eq YHENSAIN Moshe yahge Aron lyis than than yobos huon taiq zis gas, Namoq ngos lyis ma lomsjingh, Israel jens xikkhonh mas ngah gyingshang yomsoq lyis seq das khyvlyis ma phauh nyang yvmvyah ngos nyamoq lyis dangthoengh toh mau mas nah zomh haih dius jens lyis ma yoh shwih wvng das.

¹³Haih zis gas Meriba[8] mas bweh. Houmha Israel jens YHENSAIN yah tyi lha lop, houmha nyang gyingshang soeu nghuot zis eq nyamoq lyis chixoeuq.

¹⁴Moshe ka Kadesh mhayah Edom hwankti jyank mas lvgyo nhang lha, Haih loeus gas nah vnoeuh Israel vkoq jens masyah zis nghuot. Nvng ngamoq xauh dah shanghsenh lyis seq.

¹⁵Ngamoq phauh thyeih moq Egutu mas khasoeh gyoh e lha ngamoq houmha nyoshoq zvn nyeis khoq. Egutu bang gas ngamoq phauh thyeih moq yahge ngamoq lyis zaiq:

¹⁶Ngamoq lyis YHENSAIN pangh das xiklyis kaiq sang. Ngamoq kaiq sang zis nyang xauhgyo las loeuswons soeu nhang lha Egutu masyah ngamoq lyis shwih los. Gvshih ngamoq nah maukyo Kadesh wus mas nyeis.

¹⁷Ngamoq lyis nah mau cho jenh suh lai nhang aq. Ngamoq eq ngamoq dah noeu jens eq nah jyo, nah zvbiq khyam lhyi ma zangh das. Nah jeisdwang mas jeis eq ma shuk das: nah maukyo ma lai dvchank ngamoq chomuh gungs chank dvloh das, ge.

¹⁸Nghuot laus eq Edom bang toeuh zis gas, Namoq lyis ngah mau cho ma suh lai nhang. Lai lyis ngamoq thuq las zan langh das, ge.

¹⁹Israel jens nyang lyis taiq, Ngamoq talhoeu chank dvloh das, ngamoq yahge ngamoq gaunyhauq nah jeis shuk lyis gas, phauh dyei das, lai kyingh dvjenh lai nhang aq, ge.

²⁰Edom bang doms toeuh zis gas, Ngamoq ma gyo! ge Israel dius jens lyis zan das ge yomsoq bos dah jesphung tsain jens thuq los.

²¹Israel gas tauh las gohcho yah loh: khasoeh ge lyis Edom jens gas Israel jens lyis nyamoq mau chank ma lai loh nhang.

²²Israel dius dvphung gonh Kadesh mhayah Hor boms mas jweh loh.

²³Hau Edom maukyo mha, YHENSAIN Moshe yahge Aron lyis taiq zis gas,

²⁴Aron gas ngos Israel lyis dyei das dangthoengh toh mau mas ma wvng das. Nyang shei lo das: khasoeh ge lyis Meriba mas nah zomh ngos tyingtoh dang lyis tyi lha gomloeus toq.

²⁵Aron yahge nyah loloeu Eleaza lyis Hor boms mas shwih doq los aq.

²⁶Houmha Aron dah phudyei thau khyuot las nyah loloeu Eleaza lyis huot aq: Aron gas houmha shei lo das, ge.

²⁷Moshe gas YHENSAIN taiq toh vgus kuot las, moqphung gonh dah nyoqlvtjvng mas nyamoq Hor boms mas doq loh.

²⁸Housoeh Moshe ka Aron dah phudyei dyixing khyuot las Eleaza lyis huot. Aron gas hau boms thyoh mas shei. Moshe yahge Eleaza eq hauh boms masyah doms gyoh los.

²⁹Aron shei goeus yvlyis dius phung gonh seq lyis, nyamoq dvnganhmoq gas nyah xiklyis somhci nyeih top kuk ngaus.