Read Achang GYUNG 27 Bible Online

GYUNG 27 - Achang bible

GYUNG 27

¹Yosep lo Manase, Manase lo Makhir, Makhir lo Gilead, Gilead lo Hepha, Hepha lo Zelophehad dah lonyi jens Mala, Noa, Hogla, Milkha, Tirza moq gas,

²YHENSAIN xikkhonh, Zvng khomh mas, Moshe, phudyei Eleaza, uhshe bang yahge dius phung gonh dah xikkhonh mas loh yap las dung zis gas,

³Ngamoq dah uwus gas loloeu ma bos khoq mhanhdyvp mas shei goeus. Nyang gas YHENSAIN lhyi gomloeus toq, Kora dah thang chank bang mas ma bos: Nyang nyah yobos gvng mas shei goeus.

⁴Nyang yukgislo ma bos yvmvyah, ngamoq uwus nyings gas Israel masyah chamus dyuk loh das? Ngamoq uwus dah boekyis jens yah dvgeh ngamoq lyis eq yossoh gvm dyei geh, ge.

⁵Moshe eq nyamoq dah soe YHENSAIN jyank chi loh dyei.

⁶YHENSAIN nyang lyis taiq,

⁷Zelophehad lonyi jens sang cho jus; nyamoq uwus dah boekyis jens yah dvgeh nyamoq lyis yossoh vso gvm dyei geh. Nyamoq uwus dah vso ka nyamoq lyis dyei bas jungh.

⁸Nvng Israel jens lyis taiq aq, Dvyuk yuk yukgislo ma bos shei loh lyis, nyah zisyos vso ka nyah lonyi yoh sain das.

⁹Lonyi eq ma bos lyis gas, hauh vso ka nyah vmang vnoeuh sain das.

¹⁰Vmang vnoeuh eq ma bos lyis gas, hauh vso ka phvthank phvlvt moq sain das.

¹¹Nyang mas vmang vnoeuh, vbus moq eq ma bos lyis gas, nyang mas ni thank boek gas hauh zis sain lha nyah vso khyvlyis zwi toh das. Heika Israel dius jens chank chah dah lyi ngos YHENSAIN Moshe lhyi yah dyei toh.

¹²YHENSAIN Moshe lhyi taiq zis gas, Nvng Abarim boms mas doq los aq; ngos Israel jens lyis dyei dah mau lyis yoeuh kat aq.

¹³Nvng hauh yvlyis nyvng thang lhyi, nah vmang Aron shei loh teh, nvng eq shei das.

¹⁴Khasoeh ge lyis Zin mhanhdyvp mas nah zomh aiq yuk yah ngos tying toh yvlyis tyi lha gomloeus toq goeus. Meriba mas dius dvphung gonh ngos lyis tyi lha lop uhlyis, nyamoq xikkhonh mas ngah gyingshang yomsoq lyis ma chunghtoq, ge. Meriba gas Zin mhanhdyvp Kadesh mha dah jeisthuq dwang nghuot.

¹⁵Moshe dung zis gas,

¹⁶Kang dvnganh dah vpom YHENSAIN Mangso eh, Dius jens lyis yoh shwih uhshe soeu jeszan yvmas vmingh yoh dyei soeu dvyuk jenh toeuq toh dyei aq. Housoeh lyis nah dius phung ka yoeuh soeu ma bos dah yvng teh ma bweh das, ge.

¹⁸YHENSAIN Moshe lhyi taiq, Dyos bos soeu, Nun lo Yoshua lyis shwih las nyah uhloms mas nah loq kih dyei aq:

¹⁹Nyang lyis phudyei Eleaza yahge dius dvphung gonh dah xikkhonh mas yap nhang lha, nyang gas nah muh kyauh toh zis xauh soeu nghuot khyvlyis nyamoq dvnganhmoq xikkhonh mas hoeuh kat aq.

²⁰Nvng yoh toh toeuh dvkhamh nyang lyis dyei aq. Housoeh lyis Israel jens dvphung gonh nyah domsyos gyo das.

²¹Yoshua gas phudyei Eleaza lyis nges las, nyang gas Urim yahge Thumim yhung lha ngah ehnyet lyis xuq das. Heisoeh khyvlyis Eleaza gas Yoshua yahge Israel dvphung gonh dah soe dvnganh mas cho yoh shet das, ge.

²²Moshe eq YHENSAIN tying toh vgus kuot. Nyang Yoshua lyis phudyei Eleaza yahge dius dvphung gonh xik mas yap nhang.

²³YHENSAIN tying toh vgus, Moshe ka nyah uhloms mas loq kih zis yah muh kyauh toh zis xauh soeu nghuot cho hoeuh kat.