Read Achang GYUNG 28 Bible Online

GYUNG 28 - Achang bible

GYUNG 28

¹YHENSAIN Moshe lhyi tying toh.

²Israel jens lyis cho shet aq. Mangso lhyi nhaiqdoeus nhang das zis chah dah zonoms jyungshuk lyis toeuq toh shishenh lyis nyah jyank mas chi los chah.

³Heika YHENSAIN jyank mas chi los das zonoms jyungshuk nghuot. Nyeih yau dah ngheq dyei jyungshuk xiklyis nos ma bos, dvzvn dyingh dah yvnglus lo aiq doeu.

⁴Yvnglo cangxeih vdoeu lyis nvpsangh pheh, aiq vdoeu lyis nyenhthang pheh phudyei chah.

⁵Yvnglo dvdoeu yah dvgeh jyo jyungshuk monh dvkilogram lyis gis thank tsanlun coeu dvliter yah lhoeuq zis bos chah.

⁶Heika Sina boms mas zonoms jyungshuk khyvlyis cangxeih phudyei dah nyeih yau ngheq dyei jyungshuk nghuot. Hauh jyungshuk gas dvnganh ngheq dyei chah. Hauh xangh shom ka YHENSAIN lhyi nhaiqdoeus nhang.

⁷Yvnglo dvdoeu yah dvgeh shukphoh jyungshuk khyvlyis zvbiq dvliter phon mha huot kat chah.

⁸Nyenhthang lhyi yvnglo aiq vdoeu phudyei chah. Houka nvpsangh jyungshuk yah dvyhangteh jyo jyungshuk yahge shukphoh jyungshuk bos chah. Hauh jyungshuk gas nyi yah ngheq dyei chah. Hauh xangh shom ka YHENSAIN lhyi nhaiqdoeus nhang.

⁹No nyeih lyis nos ma bos dvzvn dyingh yvnglus lo aiq doeu phudyei chah. Jyo jyungshuk khyvlyis tsanlun coeu yah lhoeuq dah monh 4 paung yahge zvbiq jyungshuk bos chah.

¹⁰Nyeih yau jyungshuk yah nyah zvbiq jyungshuk ma suon, hai ngheq dyei jyungshuk gas No nyeih khanghmuh tsank phudyei chah.

¹¹Lhamhmuh canh nyeih khanghmuh, YHENSAIN jyank mas ngheq dyei jyungshuk chi los chah: houka noeulu kyoh aiq doeu, yvnglus dvdoeu, dvzvn dyingh dah yvnglus lo nyhet doeu phudyei chah. Hau dvnganh gas nos ma bos zis nghuot chah.

¹²Jyo jyungshuk khyvlyis tsanlun coeu yah lhoeuq dah monh phudyei chah: noeulu dvdoeu mas, monh 6 paung; yvnglus mas 4 paung;

¹³yvnglo dvdoeu mas 2 paung bos chah. Haih ngheq dyei jyungshuk gas YHENSAIN lhyi nhaiqdoeus nhang dah xangh shom zonoms jyungshuk nghuot.

¹⁴Vgus gus zvbiq jyungshuk eq, noeulu dvdoeu mas zvbiq aiq liter, yvnglus mas dvliter dvkhyamh, yvnglo dvdoeu mas dvliter bos chah. Heika dvzvn gonh lohcanh khanghmuh ngheq dyei jyungshuk dah lyi nghuot.

¹⁵Nyeih yau ngheq dyei jyungshuk yah nyah zvbiq jyungshuk ma suon, yaunos jyungshuk khyvlyis beqlus dvdoeu tsank phudyei chah.

¹⁶Cangxeih lhamhmuh khyvp, dvci nyei vnyeih lyis YHENSAIN lhyi chungh dah Lhuiq Kat Pwe kuot chah.

¹⁷Dvci oeng vnyeih lyis nyhet nyeih nyangh dah lomsnoq cho pwe xi. Hauh gyo lyis bicheih ma kat ohlhyoq kyingh zo chah.

¹⁸Hauh pwe cangxeih vnyeih lyis namoq gas paiq das nyhenshang huom chah: muh ma gis zwi.

¹⁹YHENSAIN lhyi zonoms jyungshuk khyvlyis ngheq dyei jyungshuk phudyei chah. Houka nos ma bos dah noeulu kyoh aiq doeu, yvnglus dvdoeu, zvn dyingh dah yvnglus lo nyhet doeu nghuot.

²⁰Vgus gus jyo jyungshuk gas tsanlun coeu lhoeuq dah monh phudyei chah: noeulu dvdoeu mas 6 paung, yvnglus mas 4 paung,

²¹Yvnglo dvdoeu mas 2 paung nghuot.

²²Yaunos jyungshuk khyvlyis beqlus dvdoeu eq phudyei chah. Heisoeh khyvlyis dius jens xiklyis cheihshang cho kuot chah.

²³Nvpsangh vjangh ngheq dyei jyungshuk mas haih zis tsain tsank phudyei chah.

²⁴Houyah dvyhangteh, nyhet nyeih gonh YHENSAIN lhyi nhaiqdoeus nhang dah zonoms jyungshuk nyang lyis phudyei chah. Heika nyeih yau ngheq dyei jyungshuk yahge zvbiq jyungshuk mas tsank phudyei chah.

²⁵Nyhet vnyeih lyis paiq das nyhenshang huom chah, muh ma gis zwi.

²⁶YHENSAIN jyank mas jyo saiq jyungshuk chi los dah jyo yhomh pwe cangxeih vnyeih lyis namoq paiq das xiklyis huom chah, hauh nyeih lyis nyeih yau muh cha eq ma gis zwi.

²⁷YHENSAIN lhyi nhaiqdoeus nhang dah xangh shom khyvlyis ngheq phudyei jyungshuk phudyei chah. Houka nos ma bos dah noeulu kyoh aiq doeu, yvnglus dvdoeu, dvzvn dyingh dah yvnglus lo nyhet doeu nghuot.

²⁸Vgus gus jyo jyungshuk eq tsanlun coeu yah lhoeuq dah monh phudyei chah. Houka noeulu dvdoeu mas 6 paung, yvnglus mas 4 paung,

²⁹yvnglo dvdoeu mas 2 paung nghuot.

³⁰Yaunos jyungshuk khyvlyis beqlus dvdoeu eq phudyei chah. Heisoeh khyvlyis dius jens dah xiklyis cheihshang cho kuot dyei.

³¹Nyeih yau ngheq dyei jyungshuk yahge jyo jyungshuk mas haih zis yahge zvbiq jyungshuk tsank phudyei.