Read Achang GYUNG 30 Bible Online

GYUNG 30 - Achang bible

GYUNG 30

¹Moshe ka Israel vkoq jens dah uhshe bang lyis o mha dah taiq shet cho dyei.

²Dvyuk yuk YHENSAIN lhyi dvja ja dyei das ge nyhen toh, nghuot ya nyang dvja ja lyis jhank das ge maukhi toh lyis nyah dangthoengh ma gis thyoq, nyang kuot das ge taiq toh zis dvnganh kuot chah.

³Nyah uwus yhen mha nyeis shih dah lonyi gas YHENSAIN lhyi dvja ja dyei das ge nyhen toh, nghuot ya dvja ja lyis jhank das ge dangthoengh toh lyis,

⁴hau nyhen toh zis, dangthoengh toh zis nyah uwus xauhgyo las ma tomp lyis gas, nyang hauh zis dvnganh kuot chah.

⁵Nghuot laus eq nyah uwus hauh zis xauhgyo las nyhen toh zis tyink das nyhenshang tomp lyis gas, nyang ma kuot noh. Nyah uwus ma kuot nhang yvmvyah YHENSAIN eq yobos khyuot dyei.

⁶Vmesbih dvyuk nyhen toh, nghuot ya dvja ja masyah jhank das ge dangthoengh zangh toh thang lhyi nyang phoengh wvng.

⁷Nyah yhensain phoq hauh zis xauhgyo las nyang lyis ma tomp lyis gas, nyang nyhen lha dangthoengh toh zis dvnganh kuot chah.

⁸Nghuot laus eq nyah yhensain phoq hauh zis xauhgyo las tomp lyis gas, nyang nyhen toh zis ma tyink noh. YHENSAIN eq nyang lyis khyuot dyei das.

⁹Chauhmuh, nghuot ya yukgis yah gang goh goeus dah vmesbih gas nyang nyhen toh zis, dvja ja lyis jhank das ge dangthoengh toh zis dvnganh kuot chah.

¹⁰Phoengh wvng dah vmesbih nyhen toh, dvja ja lyis jhank das ge dangthoengh toh lyis,

¹¹nyah yhensain phoq hauh zis xauhgyo laus eq, ma tomp lyis gas, nyang nyhen toh zis dvnganh kuot chah.

¹²Nghuot laus eq nyah yhensain phoq hauh zis xauhgyo las hau nyhen toh zis tyink das zis tomp lyis gas, nyang ma kuot noh. Nyang nyhen toh zis nyah yhensain phoq tomp tyamp yvmvyah YHENSAIN eq yobos khyuot dyei das.

¹³Nyah yhensain phoq gas nyang nyhen toh cho, dangthoengh toh cho cha lhyi laus eq doengs nhang das, phe tyamp das toeuh bos.

¹⁴Nghuot laus eq nyang nyhen toh zis nyah yhensain phoq xauhgyo nyeih lyis cha ma tomp lyis gas, nyang nyhen toh zis, dangthoengh toh zis dvnganh kuot chah. Nyang hauh zis xauhgyo nyeih lyis, ma tomp samlo nyeis zis yah hau nyhen toh yvlyis doengs nhang.

¹⁵Nghuot laus eq thang lhyi nyang hau nyhen toh yvlyis tomp lyis gas, nyhen toh las ma yoh tyink cho lhyi yhensain phoq kham chah.

¹⁶Heika YHENSAIN Moshe lhyi dyei toh, uwus yhen mha nyeis shih lonyi nyhen toh cho yahge yhen loh goeus vmesbih nyhen toh cho yah sen dah lyi nghuot.