Read Achang GYUNG 31 Bible Online

GYUNG 31 - Achang bible

GYUNG 31

²Midian jens lyis Israel jens xiklyis lvto phuk aq. Hauh zis dye thang lhyi nvng shei das, ge.

³Housoeh las Moshe eq dius jens lyis taiq: jeszan das xiklyis cicont kuot geh. Housoeh namoq YHENSAIN xiklyis Midian jens lyis zan las lvto yoh phuk das.

⁴Israel dvkoq masyah jeszan das dius dvkhyoengh khyoengh nhang aq, ge.

⁵Housoeh dvkoq mas dvkhyoengh khyoengh tsain khyen lha, dvnganh lyis dvmons aiq khyoengh jeszan das zis cicont nghuot.

⁶Moshe ka gyingshang vyhang yahge vlho dyei das zis muot das lvbuh yvwons yoeus soeu, phudyei Eleaza lo Phineha dah vmingh o mha jeszan das zis nyamoq lyis nhang kat.

⁷YHENSAIN Moshe lhyi tying toh vgus, nyamoq Midian lyis zan las, yukgis dvnganh sat.

⁸Houmha Ewi, Rekem, Zur, Hur, Reba ge Midian hwankti oeng yuk bos. Beor lo Balam lyis eq sat.

⁹Israel jens gas Midian vmesbih jens yahge loshang jens dvnganh nyhik los. Nyamoq dah noeu, yvng phung zisyos dvnganh lyis lvnyhvp khyvlyis yoeus.

¹⁰Nyamoq dah wus jens yahge thoenggus dvnganh ngheq.

¹¹Nyamoq gas nyhik toh dah lvnyhvp ge thung dius, gaunyhauq dvnganh yoeus los.

¹²Nyamoq hauh yvlyis Yerikho twi twi Yodan lvng thyitvp Moab pa mha thoeng nyeis Moshe, phudyei Eleaza yahge Israel dius phung jyank mas tsain chi los.

¹³Moshe, Eleaza yahge gohtoeu dius phung dah uhshe bang dvnganh gas, jesphung lyis zes das ge dvp masyah thuq e.

¹⁴Moshe ka, jeszan masyah tauh los bang, dius dvkhyoengh guon, dvxo guon zau jens yahge moqphung lyis nhaiqyo.

¹⁵Nyang nyamoq lyis nyei zis gas, Namoq hauh vmesbih jens dvnganh lyis chamus kang dwis nhang toh goh?

¹⁶Balam taiq shet cho chank dah vmesbih jens gas Peor mas dius jens lyis YHENSAIN lhyi lom ma luk shwih kuot zis soh geh. Houka YHENSAIN dah dius jens mas yomh she los zis nghuot.

¹⁷Housoeh las gvshih yukgislo dvnganh, yukgis yah yhetgoh goeus dah vmesbih dvnganh sat geh.

¹⁸Nye loshang jens yahge lonyi gyingh jens dvnganh lyis gas namoq xiklyis kang dwis nhang toh geh.

¹⁹Gvshih namoq dvnganh, dius sat soeu, mvng zangh soeu hank laus eq dvp nghe pheh nyhet nyeih thoeng nyeis chah. Somh vnyeih yahge nyhet vnyeih lyis namoq nyang yahge namoq nyhik los dah vmesbih jens lyis cheihshang geh.

²⁰Namoq dah dyimis dvnganh, shohyeis yah, beq mauh yah, saiq yah kuot dah kyahsoe dvnganh lyis eq cheihshang chah, ge.

²¹Jeszan masyah tauh los bang lyis Phudyei Eleaza taiq, Heika YHENSAIN Moshe lhyi dyei toh dah lyi tsain nghuot.

²²Ngwis, xing, thunk, thyeq, thunk thyoeu yahge cui teh, nyi mas ma ngeh dah vyhang lhyi ka nyi mas chilhyuot zis yah cheihshang chah. Vyhang dvnganh gas cheihshang das xiklyis jeis mas cheihshang chah.

²³

²⁴Nyhet vnyeih lyis namoq dyimis cheih chah. Hauh thang lhyi namoq lhoqshang lha dvp khau mha wvng das toeuh yoh das.

²⁵YHENSAIN Moshe lhyi taiq,

²⁶Nvng, phudyei Eleaza, dius phung uhshe bang yah dvgeh, nyhik los dah thung dius yahge gaunyhauq lyis suon geh.

²⁷Hau yoeus los yvlyis aiq boms yih yih gvm geh. Dvboms gas jeslo jens xiklyis, gohtoeu dvboms gas nyet dah dius phung xiklyis nghuot.

²⁸Jeslo jens yah sen dah vboms mas zis YHENSAIN xiklyis khoengh khyvlyis, thung dius oengxo mas dvyuk dyei das. Noeu, mauhlyihzoe, yvng shvbeq mas zis eq housoeh dvyhangteh nghuot.

²⁹Hauh zis YHENSAIN lhyi lhyenwhei vlu khyvlyis phudyei Eleaza lyis kyauh geh.

³⁰Nyet dah dius phung nyhenshang vboms mas zis thung dius oengci mha dvyuk, noeu, mauhlyihzoe, yvng shvbeq mas zis eq housoeh dvyhangteh nghuot. Hauh zis tsain yoeus las YHENSAIN dah Zvng muh wons bang Lewi jens lyis dyei geh, ge.

³¹Moshe yahge Eleaza gas YHENSAIN tying toh zis kuot.

³²Jeslo jens nyhik los dah lvnyhvp masyah nyet shih zis gas yvng shvbeq khyuk sens nyhetmons oeng khyoengh, noeu nyhetmons aiq khyoengh, Mauhlyihzoe khyukmons dvkhyoengh, yahge Lonyi gyingh somh mons aiq khyoengh nghuot.

³³

³⁴

³⁵

³⁶Jeslo jens dah gvmboms dvgohyih gas, yvng shvbeq somhsens somhmons nyhet khyoengh oengxo nghuot. Hou mhayah khyukxo nyhetci oeng gas YHENSAIN xiklyis khoengh nghuot. Jeslo jens xiklyis noeu somhmons khyuk khyoengh mas nyhetci aiq gas YHENSAIN xiklyis khoengh nghuot. Jeslo jens xiklyis mauhlyihzoe somh mons oengxo mha khyukci das gas YHENSAIN xiklyis khoengh nghuot. Jeslo jens xiklyis lonyi gyingh dvmons khyuk khyoengh mas somhci aiq yuk gas YHENSAIN xiklyis khoengh nghuot.

³⁷

³⁸

³⁹

⁴⁰

⁴¹Housoeh las Moshe ka YHENSAIN tying toh vgus hauh khoengh YHENSAIN xiklyis lhyenwhei vlu khyvlyis Eleaza lyis kyauh.

⁴²Dius phung dah gvmboms eq jeslo jens dah gvmboms yah dvyhangteh nghuot. Yvng shvbeq somhsens somhmons nyhet khyoengh oengxo, Noeu somhmons khyuk Khyoengh, Mauhlyihzoe somhmons oengxo yahge lonyi gyingh dvmons khyuk khyoengh nghuot.

⁴³

⁴⁴

⁴⁵

⁴⁶

⁴⁷Moshe ka haih gvmboms masyah thung dius yahge gaunyhauq oengci mha dvkoeuq koeuq yoeus las YHENSAIN Zvng muh wons bang Lewi jens lyis dyei. Houka YHENSAIN Moshe lhyi tying toh cho nghuot.

⁴⁸Hauh thang lhyi Jesphung dah jeszau jens Moshe jyank mas los taiq.

⁴⁹Ngamoq dah o mha jeslo jens lyis suon lhyi dvyuk eq ma dyuk.

⁵⁰Housoeh las ngamoq hank eq hank yoeus los dah xing shunkzis, Loqyom thoengh, thoengh, loqkyop, nodangh, ywi tsain chi los. Hauh zis YHENSAIN ngamoq dah yaunos khyuot dyei das xiklyis jyungshuk dyei. Housoeh nyang ngamoq lyis gos dyei das, ge.

⁵¹Moshe yahge Eleaza gas, nyamoq jyank mas dah xing shunkzis lyis lhom yoeus.

⁵²Jeszau jens dyei dah vlu dvnganh lyis 400 paung vluk bos.

⁵³Jeszau jens ma nghuot bang gas nyamoq yoeus los zis nyamoq nyang yoeus toh.

⁵⁴Housoeh Moshe yahge Eleaza gas hauh xing lhyi Zvng mas yoeus los. Housoeh YHENSAIN ka Israel dius jens lyis gos toh dyei das.