Read Achang GYUNG 32 Bible Online

GYUNG 32 - Achang bible

GYUNG 32

¹Ruben vkoq yahge Gad vkoq gas yvng shvbeq svsoh nyo los. Nyamoq gas Yazer yahge Gilead mau gas noeu xiklyis joqyos svsoh phi joq yvlyis nyvng lyis,

²nyamoq gas Moshe, Eleaza yahge gohtoeu dius phung dah uhjyung jens jyank e taiq zis gas,

³Hai YHENSAIN Israel jens lyis pangh las nyeis nhang dah joqyos, Atarot, Dibon, Yazer, Nimra, Heshbon, Eleale, Sibma, Nebo yahge Beon wus jens gas yvng shvbeq nyhoeu das nyhenshang svsoh gis: ngamoq mas eq gaunyhauq nyo.

⁵Haih mau ngamoq dah vso mau khyvlyis jenh dyei aq. Ngamoq lyis Yodan lvng thyitvp pheh goeu las houmha vnyeis nhang, ge.

⁶Moshe phuk taiq, Gohtoeu Israel jens jeszan loh uhlyis namoq gas heimha nyeis mes lhyeh?

⁷YHENSAIN Israel jens lyis dyei dah mau mas loh das zis Yodan lvng ma mes goeu loh das khyvlyis namoq nyamoq lyis yom shuon shoq womh kuot lhyeh?

⁸Hauh mau lyis loh yoeuh das xiklyis ngos namoq dah uwus moq lyis Kadesh Barnea masyah nhang uhlyis eq houyah dvyhangteh kuot.

⁹Nyamoq gas Eshko langhkhau jweh shoq loh las hauh mau lyis nyvng, nghuot laus eq nyamoq tauh los uhlyis Israel jens lyis YHENSAIN dyei dah mau mas ma wvng das khyvlyis yom shuon nhang.

¹⁰Hauh nyeih lyis YHENSAIN nhaiqyo las dangthoengh toh.

¹¹Ngos maukhi zis gas, nyamoq ngos lyis lom ma luk yvmvyah Egutu masyah thuq los bang aiqci zvn masyah thoq pheh bang hank eq ngos Abraham, Isak, Yakop moq lyis dangthoengh toh dah mau mas ma xauh wvng das.

¹²Heika Kenizi dius Yephun lo Khaleb yahge Nun lo Yoshua mas lai las, gohtoeu dvnganh bos. Nyah aiq yuk gas YHENSAIN lhyi lomluk goeus, ge.

¹³YHENSAIN eq dius jens lyis nhaiqyo las, YHENSAIN lhyi nhaiq ma doeus nhang dah dius caiq dvnganh dye shei shoq mhanhdyvp mas nyeici zvn whang yenh nhang.

¹⁴Gvshih namoq, namoq dah phauh thyeih moq dah joqyos yoeus toh. Yaunos yah dyingh dah dius caiq vsaiq gas YHENSAIN dah gyukphoh nhaiqyo zis Israel jens thoq mas doms she khyoq das zis cicont nghuot.

¹⁵Ruben yahge Gad dius jens eh, gvshih namoq nyah thang mha chank das zis ngoek lyis gas, nyang haih dius jens dvnganh lyis hai mhanhdyvp mas dvlhain doms she tyamp das. Namoq gas hai nyamoq dah dyoqbis cho lhyi yvwons yoeus chah, ge.

¹⁶Nyamoq Moshe jyank mas los taiq, Cangxeih ngamoq lyis heimha yvng xiklyis luk yah ci dah zungs, ngamoq loshang jens xiklyis ciank ci wus tsain kuot nhang aq.

¹⁷Hauh thang lhyi ngamoq gas gohtoeu Israel jens yah dvgeh jeszan das zis cicont kuot las, nyamoq nyeis das joqyos yoh shoq jes shwih zan das. Hauh gyo lyis ngamoq lyis nges toh bang gas, heimha goeng dah ciank ci wus mas haih mau mas bang dah jesshoh masyah luiq las yoh nyeis das.

¹⁸Gohtoeu Israel jens dvnganh nyamoq lyis toeuq toh dah vso maunyeis ma xauh yoeus dvchank, ngamoq eq ngamoq yhen mha ma tauh los das.

¹⁹Ngamoq dah gvmboms gas hai Yodan lvng buisthuq tvp pheh xauh yoeus goeus yvmvyah Yodan lvng thyitvp pheh nyamoq mas vso maunyeis cheq ma yoeus das, ge.

²⁰Moshe phuk taiq zis gas, Namoq taiq khyvlyis jyoengh nghuot lyis gas, hai YHENSAIN xikkhonh mas jeszan das zis ngamoq loh uhlyis bos loh chah.

²¹Namoq dah jeszan bang dvnganh Yodan lvng goeu las, YHENSAIN dah vmingh o mha nyamoq gas YHENSAIN, yah jeswus lyis ung shoq zan chah.

²²Housoeh hauh mau vso xauh yoeus das. Hauh thang lhyi YHENSAIN lhyi eq namoq dah Israel jens lyis eq, namoq dah yvwons tyink goeus yvmvyah namoq yoh tauh loh goeus. Housoeh lyis YHENSAIN namoq lyis Yodan lvng buisthuq pheh maunyeis dyei las yoh sain das.

²³Nghuot laus eq namoq dangthoengh ma chank lyis gas, YHENSAIN lhyi shuot las, namoq dah yaunos gvng mas joeng zis xauh das.

²⁴Namoq loshang jens dah xiklyis wus eq, yvng shvbeq xiklyis zungs eq kuot toh geh: dangthoengh toh vgus loh kuot geh, ge.

²⁵Gad yahge Ruben dius jens taiq, Nvng yhensain vmingh vgus ngamoq kuot das, ge.

²⁶Ngamoq dah yhensain nyhiq jens, lo jens yahge noeu, yvng gas hai Gilead wus jens mas tsain toh khoq das.

²⁷Nghuot laus eq ngamoq dvnganh gas YHENSAIN dah vmingh o mha jeszan loh das zis cicont nghuot. Ngamoq gas nvng taiq vgus Yodan lvng goeu las jeszan das, ge.

²⁸Housoeh las Moshe ka Eleaza, Nun lo Yoshua yahge gohtoeu Israel uhshe bang lyis haih vmingh dyei.

²⁹Gad yahge Ruben dius jens gas jeszan das zis cicont kuot das. Namoq yah dvgeh Yodan lvng goeu das. YHENSAIN dah vmingh yah loh las pangh zis yah namoq hauh mau lyis ung das. Hauh thang lhyi Gilead mau nyamoq dah zisyos khyvlyis dyei geh.

³⁰Nghuot laus eq namoq yah dvgeh jeszan das zis Yodan lvng ma goeu lyis gas, nyamoq eq namoq teh Khanan mau mas yhenzis gvmboms yoeus chah, ge.

³¹Gad yahge Ruben dius jens toeuh zis gas, YHENSAIN tying toh vgus ngamoq kuot das.

³²Nyah vmingh o mha ngamoq Khanan tvp pheh goeu las jeszan das. Nghuot laus eq ngamoq dah vso maunyeis gas Yodan lvng buisthuq tvp pheh nghuot das, ge.

³³Housoeh las Moshe ka, Amori hwankti Sihon yahge Bashan hwankti Og dah maunyeis yahge nyah wus jens, nyah wuxom mas dah boms mau dvnganh, Gad, Ruben, yahge Manase vkoq dvgohyih lyis toeuq dyei.

³⁴Gad vkoq goeng dah thoenkgus jesdvp yahge yvng khom soq kuot dah wus jens gas Dibon,

³⁵Atrot Shophan, Yazer, Yogbeha,

³⁶Betnimra yahge Bet Haran tsain nghuot.

³⁷Ruben vkoq soq kuot wus jens gas, Heshbon, Eleale, Kiriathaim,

³⁸Nyings thaiq goeus dah Nebo, Bal Meon yahge Sibma nghuot. Nyamoq soq kuot dah wus lyis nyings vsaiq tsain thaiq nyhink.

³⁹Manase lo Makhir vhuh gas Gilead mau mas nyhenh wvng nyeis. Houmha dah Amori jens lyis khat tyamp.

⁴⁰Housoeh Moshe ka Manase lo Makhir vhuh lyis Gilead mau dyei las, nyamoq houmha nyeis.

⁴¹Manase vkoq mas Yair gas wukhau dvkhamh lyis zan yoeus las Yair wukhau jens ge nyhink.

⁴²Noba gas Kenat yahge nyah wukhau jens lyis zan yoeus las hauh yvlyis nyah nyings khyvlyis Noba ge doms nyhink.