Read Achang GYUNG 4 Bible Online

GYUNG 4 - Achang bible

GYUNG 4

¹YHENSAIN Moshe lhyi taiq,

²Lewi vhuh Kohat yhenbang, vhuh yahge yhenbang khyvlyis dah nyings kui toh aq.

³YHENSAIN xikkhonh Zvng mas muh zwi das zis kank bos bang somhci zvn masyah oengci zvn jo mas dah vbusbih jens dvnganh lyis nyings kat toh aq.

⁴Nyamoq dah phuqsoe muh gas gyingshang thank vyhang yah sen.

⁵YHENSAIN ka Moshe lhyi o mha dah taiq shet cho dyei. Dyens toq das lyis, Aron yahge nyah loloeu jens gas Zvng mas wvng las Thanghchvp Kwi xik mas dah gosseh khyoq las hauh zis yah Kwi lhyi nghop das.

⁶Hauh thoq mas shohyeis noeuh vnghop, mis lanh seh tsank nghop lho lha tanzoe jauh toh das.

⁷YHENSAIN lhyi dyei dah ohlhyoq kih dah kihgus thoq mas mis lanh seh nyhoeuh las hauh thoq mas bvn, xangh khuq, jyungshuk khuq jens zvbiq jyungshuk xiklyis jywanglo tsain kih das. Kihgus thoq mas ohlhyoq vjangh joq chah.

⁸Hau dvnganh thoq mas mis nes seh yah nghop, shohyeis noeuh yah nghop lho lha tanzoe jauh toh das.

⁹Nyamoq mis lanh seh yoeus las nyituonh gus yah nyah nyitoengh, nyvp, nyiyvp kat bvn, tsanlun coeu kat vyhang dvnganh lyis tsain nghop das.

¹⁰Vyhang dvnganh yvlyis shohyeis noeuh yah koek lho lha dvng dah kyau mha kat toh das.

¹¹Nyamoq hau xing phon lhyi mis lanh seh yah nghop, shohyeis noeuh yah tsank nghop lho lha tanzoe jauh toh das.

¹²Gyingshang joqyos mas yhung dah vyhang dvnganh yoeus, mis lanh seh mas koek, shohyeis noeuh yah nghop lho lha dvng dah kyau mha kat das.

¹³Nyamoq phon mha nyiyvp khoeuh tyamp las hauh thoq mas nesnoq seh nyhoeuh.

¹⁴Hauh thoq mas phon yah sen, phuqsoe muh mas yhung kyahsoe ge, nyibvn, nghweh, tsoh thauh, wulang tsain kih thang lhyi shohyeis noeuh nghop lho lha tanzoe jauh toh das.

¹⁵Housoeh dyens toq das lyis, Aron yahge nyah loloeu jens hau gyingshang vyhang yahge nyah kyahsoe dvnganh dye nghop thang lhyi, Kohat vhuh hauh zis dvng das xiklyis los chah. Kohat vhuh gyingshang vyhang lhyi ma gis tanh, tanh lyis shei das. Haih goeu gas zvng cheh khanghmuh Kohat vhuh dah yvwons nghuot.

¹⁶Phudyei Aron lo Eleaza dah yvwons gas, Zvng dvkoeuq gonh, nyituonh coeu, xangh, jyo jyungshuk, juot coeu, zvng mas YHENSAIN lhyi kyauh dah vyhang dvnganh nghuot.

¹⁷YHENSAIN Moshe yahge Aron lyis taiq,

¹⁸Kohat vhuh haih gyingshang thank vyhang mha ni loh las nyamoq shei zis ma xauh bas jungh, hauh cho mhayah gos das nyhenshang, Aron yahge nyah loloeu jens shih wvng las dvyuk dvyuk dah yvwons lyis toeuq dyei las hank khah zis dvng das zis taiq aq.

²⁰Nghuot laus eq Kohat jens Zvng mas wvng las cheh das zis phudyei bang gyingshang vyhang sont yvlyis loh nyvng lyis nyamoq dvxa lhyi shei das, ge.

²¹YHENSAIN Moshe lhyi taiq,

²²Lewi vhuh Gershon yhenbang, vhuh yahge yhenbang khyvlyis nyings kui aq.

²³YHENSAIN xikkhonh, Zvng mas muh wons das xiklyis kank bos vbusbih nyenhkyi somhci zvn masyah oengci zvn jo mas bang dvnganh lyis nyings kat aq.

²⁴Gershon vhuh yvwons yoeus las dvng das vyhang ka o mha zis tsain nghuot.

²⁵Zvng, nyah vkhau pheh vnghop, nghe pheh vnghop, thoq mas tsank nghop dah shohyeis noeuh, zvng khomh gosseh,

²⁶Zvng yahge phon yvmlhaink mas dah khyam gosseh yahge twih, khyam khomhgos, hauh vyhang toeutsung lhyi yhung dah kyahsoe dvnganh dvng chah. Nyamoq gas haih vyhang xiklyis chah zis dvnganh lyis kuot das.

²⁷Moshe yahge Aron gas Gershon lo jens nyamoq yvwons dvnganh kuot zis yahge Aron yahge nyah loloeu jens nyamoq lyis toeuq dyei zis dvng cho dvnganh lyis yoeuh das.

²⁸Heika Zvng mas Gershon vhuh dah yvwons nghuot. Nyamoq gas phudyei Aron lo Ithama shwih khyvlyis kuot das.

²⁹YHENSAIN ka Moshe lhyi taiq: Lewi vhuh Merari yhenbang, vhuh yahge yhenbang khyvlyis nyings kui aq.

³⁰YHENSAIN xikkhonh Zvng mas muh wons wuq das xiklyis kank bos vbusbih nyenhkyi somhci zvn masyah oengci zvn jo mas bang dvnganh lyis nyings kat aq.

³¹Nyamoq yvwons gas dvng das xiklyis Zvng dah vzwvng, vkyank, zains, phangh,

³²Zvng yvmlhaink mas dah Khyam zains, phangh, jywangh twih yah dvgeh hauh vyhang toeutsung lhyi yhung dah kyahsoe dvnganh nghuot. Yuk khanghmuh lyis nyang cha dvng chah zis top taiq chah.

³³Heika Merari vhuh Zvng mas phuqsoe yvmas nyamoq dah yvwons nghuot. Nyamoq gas phudyei Aron lo Ithama shwih khyvlyis kuot das.

³⁴YHENSAIN tying toh cho chank las Moshe, Aron yahge moqphung mha dah uhjyung jens gas, Lewi vhuh Kohat, Gershon, Merari somh huh dah nyings tsain kui. Nyamoq gas nyamoq yhenbang, vhuh yahge yhenbang khyvlyis nyenhkyi somhci masyah oengci zvn jo vbusbih jens YHENSAIN xikkhonh Zvng mas muh yoh wons wuq das xiklyis kank bos bang dvnganh lyis nyings tsain kat. Hauh bang gas: [Vhuh] — [Sonzoh] Kohat — 2,750 Gershon — 2,630 Merari — 3,200 Dvnganh lyis: — 8,580

⁴⁹Yuk khanghmuh gas YHENSAIN Moshe lhyi tying toh vgus nyings tsain kat. YHENSAIN Moshe lhyi yah tying toh vgus yuk khanghmuh gas nyah xiklyis yvwons, nyang phuqsoe das muh, dvng das yvwons toeuq dyei zis xauh.