Read Achang GYUNG 8 Bible Online

GYUNG 8 - Achang bible

GYUNG 8

¹YHENSAIN Moshe lhyi taiq,

²Aron lyis taiq aq: Nyang nyitoengh nyhet lom lyis nyituonh gus mas kat las tuonh lyis xik mas bvng los das, ge.

³Aron eq domsyos gyo las nyitoengh lyis nyituonh gus dah xik pheh xoeu lha tsain toh.

⁴Hau nyituonh gus gas vpom mha zis vthyoh jweh shoq xing yah bat toh. Houka YHENSAIN Moshe lhyi chixoeuq dah yikhyoh vgus nghuot.

⁵YHENSAIN Moshe lhyi taiq,

⁶Lewi jens lyis Israel jens masyah kangh las, nyamoq lyis o mha taiq khyvlyis cheihshang aq,

⁷Nyamoq lyis cheihshang jeis yah tyitsant las, gungs gonh mauh yuk, dyimis cheih nhang aq. Housoeh lyis nyamoq lhoqshang das.

⁸Hauh thang lhyi noeulu kyoh dvdoeu yah dvgeh houmha chah dah tsanlun coeu lhoeuq monh jyo jyungshuk thuq chah. Nvng eq yaunos jyungshuk xiklyis gohtoeu noeulu kyoh dvdoeu thuq chah.

⁹Hauh thang lhyi Israel moqphung gonh lyis khi huom lha Lewi jens lyis ngah xikkhonh Zvng xik mas yap nhang chah.

¹⁰Israel dius jens dah loq Lewi jens dah uhloms mas tsain kih das.

¹¹Hauh thang lhyi Aron gas Lewi jens lyis Israel jens masyah lhyenwhei jyungshuk khyvlyis ngos lyis kyauh das. Housoeh nyamoq ngah muh gis wons wuq das.

¹²Housoeh Lewi jens eq noeulu aiq doeu uhloms mas loq tsain kih das. Dvdoeu lyis yaunos jyungshuk khyvlyis phudyei las gohtoeu dvdoeu gas ngheq dyei jyungshuk khyvlyis phudyei zis yah Lewi jens xiklyis yaunos cheihshang cho kuot.

¹³Housoeh Lewi jens lyis lhyenwhei jyungshuk khyvlyis ngah jyank mas kyauh aq. Aron yahge nyah loloeu jens gas nyamoq lyis yoeuh das nyhenshang toh aq.

¹⁴Lewi jens lyis Israel jens masyah heisoeh khyvlyis gvm toh aq. Housoeh nyamoq gas ngos yah sen das.

¹⁵Nvng Lewi jens lyis cheihshang lha kyauh thang lhyi nyamoq gas Zvng mas muh wons das zis kank bos das.

¹⁶Ngos nyamoq lyis Israel jens dah lomons dvnganh dah joqyos mas yoeus toh las nyamoq kyingh ngos yah sen.

¹⁷Ngos Egutu mas lomons dvnganh sat uhlyis Israel yhenbang khanghmuh dah lomons yahge gaunyhauq suot xeih lyis ngah zis khyvlyis cheihshang yoeus.

¹⁸Gvshih ngos Israel lomons jens dvnganh dah gungsthaiq Lewi jens lyis yoeus.

¹⁹Ngos Lewi jens lyis Aron yahge nyah loloeu jyank mas Israel jens jyank masyah jyungshuk khyvlyis kyauh. Nyamoq gas Israel jens xiklyis Zvng mas muh wons wuq das. Israel jens gyingshang joqyos mas ni los lyis nyamoq dyoqbis zainsmuh xauh das mhayah eq gos das xiklyis nghuot.

²⁰Housoeh las Moshe, Aron yahge Israel jens dvnganh gas, YHENSAIN Moshe lhyi tying toh vgus Lewi jens lyis kyauh.

²¹Lewi jens eq nyamoq nyang cheihshang lha, nyamoq dah dyimis eq tsain cheih. Aron gas nyamoq lyis lhyenwhei jyungshuk khyvlyis YHENSAIN jyank mas kyauh. Nyang eq nyamoq xiklyis cheihshang cho kuot dyei.

²²Dius jens gas Lewi yah sen lha YHENSAIN Moshe lhyi tying toh vgus dvnganh kuot. Housoeh las Lewi jens gas Aron yahge nyah loloeu jens loq o mha Zvng muh wons wuq das zis kank bos bang nghuot.

²³YHENSAIN Moshe lhyi taiq zis gas,

²⁴Lewi jens gas nyenhkyi aiqci oeng zvn masyah ngah xikkhonh Zvng mas nyah yvwons yoeus das.

²⁵Oengci zvn jweh lyis nyang muh no das.

²⁶Hauh thang lhyi nyah Lewi changh jens yah dvgeh Zvng mas muh kuot yvmas gis pangh das; nyang kyingh gohtoeu muh ma kuot noh. Heika nvng Lewi jens dah yvwons khasoeh toeuq cho nghuot, ge.