Read Achang MIKHA 5 Bible Online

MIKHA 5 - Achang bible

MIKHA 5

¹Yerusalem dius jens eh, namoq dah thoenkgus jesdvp tsainh geh! Yang gas lhaink toh zis xauh goeus! Nyamoq gas Israel uhshe soeu lhyi zan nyeis.

²YHENSAIN taiq, Betlehem Ephratha eh, Nvng gas Yuda mau mas ngis thank wus jens mas dvwus nghuot laus eq ngos nvng masyah Israel xiklyis guon soeu thuq los nhang das. Nyang gas gohlhain yah los soeu nghuot, ge.

³Housoeh las YHENSAIN ka nyah dius jens lyis nyamoq dah jeswus jyank mas, lokhoeu das vmesbih gas, nyah lo khoeu shoq, doeuh tyamp toh das. Hauh thang lhyi jonsdoeus loh dah Israel jens gas nyamoq nyang dius jens yah doms xauh tsoq goh das.

⁴Nyang los lyis, nyang nyah dius jens lyis YHENSAIN jyank masyah los dah yom yah, YHENSAIN Mangso nyang, nyah dah shoenkkhyi yah nyah dius jens lyis guon das. Nyeisjvng thoq mas dius jens dvnganh nyah kuhxing cho lhyi rhen das yvmvyah, nyah dius jens gas jesluiq zis yah nyeis das las,

⁵nyang nyenstap cho she los das. Ngamoq dah mau mas Asiria nyhenh wvng los las ngamoq dah thoenkgus jesdvp thyoq wvng uhlyis, nyamoq lyis zan das xiklyis ngamoq dah yombos thank uhshe bang lyis nhang kat das.

⁶Nyamoq[7] gas jesphung yomkat zan zis yah Asiria yahge Nimrod mau lyis zan ung lha ngamoq lyis Asiria jens ngamoq maukyo mha nyhenh wvng los masyah khyuot kat das.

⁷Doeng los dah Israel dius jens gas YHENSAIN gyoh nhang dah jyweh teh dius nyau nyoshoq lyis gying cwangh nhang das. Mhanh mas wus gyon dah mau teh nghuot das. Nyamoq gas dius lyis ma nges, Mangso lhyi nges bang nghuot.

⁸Dius nyau jens mas nyet joq dah Israel jens gas, mhanhdyvp mas, katjang mas shoh khat dah khangkhyi teh nghuot das. Yvng jens mas dyvm nyhik las ngat chingh tyamp. Hank eq ma yoh kyoeu kat.

⁹Israel gas nyah jeswus jens lyis zan ung lha nyamoq dvnganh lyis mhont das.

¹⁰YHENSAIN taiq, Hauh shishenh lyis ngos nah nyang jens lyis yoeus tyamp las nah jeslhyingh tsain mhont das.

¹¹Ngos nah mau mas dah wus jens lyis mhont das, nah thoenkgus jesdvp dvnganh thyoq khyoq das.

¹²Ngos nvng yhung nyeis dah hweq kat cho mhont das, botthyet cho ma bos, toh das.

¹³Ngos namoq dah phvra yahge gyingshang dah luk, zains jens lyis mhont das. Namoq gas namoq nyang kuot yoeus dah vyhang jens lyis ma paiq lo das.

¹⁴Ngos namoq mau mas dah gywesnyhiq Ashera gungslho jens lyis lang khyoq las namoq dah wus jens lyis mhont das.

¹⁵Ngos ngah domsyos ma gyo kuot goeus dah dius nyau jens dvnganh lyis nhaiq gis yo zis yah lvto phuk das, ge.