Read Achang MIKHA 6 Bible Online

MIKHA 6 - Achang bible

MIKHA 6

¹Israel yah tyi dah YHENSAIN dah soe lhyi gyo geh. YHENSAIN eh, toq aq, nah soe hwank kat aq. Nvng taiq zis boms jens, jing jens lyis xauhgyo nhang aq.

²Boms jens yahge nyeisjvng dah vcaiq vto vpom eh, YHENSAIN dah soe gyo geh. YHENSAIN mha nyah dius jens yah tyi dah soe bos. Nyang Israel jens yah tyi dah kauq cho chi los das.

³YHENSAIN taiq, Ngah dius jens eh, ngos namoq lyis cha kuot ku? Ngos namoq xiklyis yvwons khasoeh duot ku? Ngos lyis phuk taiq aq.

⁴Ngos nvng lyis Egutu masyah shwih thuq las, jons duot nyeis masyah khyuot yoeus. Nvng lyis shwih das nyhenshang Moshe, Aron yahge Miriam lyis nhang.

⁵Ngah dius jens eh, Moab hwankti Balak nvng lyis cha kuot das ge toeuq cho yahge Beor lo Balam nyang lyis khasoeh toeuh cho soh aq. Thoenggus Akhesia masyah Giga jo mas bweh cho soh aq. Haih chojeis lyis soh las namoq lyis yoh khyuot yoeus shoq ngos cha kuot zis sohseq das.

⁶Ngos YHENSAIN, maukhung Mangso lhyi paiq los lyis nyah jyank mas cha chi los das lah? Nyang lyis ngheq dyei jyungshuk khyvlyis gis thank noeulo jens she los das lah?

⁷Ngos YHENSAIN jyank mas yvng khyoengh soe, nghuot ya ma thank lo dah tsanlun coeulvng chi los lyis nyang nhaiqdoeus das lah? Ngah yaunos xiklyis loxeih dyei das lah?

⁸Ma nghuot, YHENSAIN ka yang lyis gis cho taiq goeus. Nyang yah jyank masyah o zis haih zis nghuot. Jus cho kuot las ma thank magons jyetdap cho chixoeuq zis yah nhaiqlom nyhen mha gyoh las yah Mangso yah zomh nyeis das cho nghuot.

⁹YHENSAIN lhyi gyukwoms zis gas joeui bos cho nghuot. Nyang wus lyis lui las, Wus mas toeuq toh zis xauh bang eh, gyo geh.

¹⁰Ma gis bang dah yhen jens mas lyi ma bos khyvlyis yoh toh dah zisyos joq. Nyamoq gas ngos hoeng dah ma jus pan tsain yhung.[8]

¹¹Ma jus dah jvng yahge jvngshih yhung bang lyis ngos yobos khasoeh yoh khyuot dyei das?

¹²Namoq dah dis bang gas nyungs bang lyis lhuot zo cho dyingh. Namoq dvnganh gas hwah bang nghuot.

¹³Housoeh las nah yaunos gvng mas nvng lyis thyoq khyoq las mhont das.

¹⁴Nvng zo das laus ehnyet ma tap, yuot nyeis shih das. Nvng vyhang yoeus loh das laus eq ma yoh yung toh das; nvng yung toh dah vyhang lhyi, ngos jes mas mhont das.

¹⁵Nvng jyo khyoq das laus eq vshih ma xauh yhomh das. Tsanlun coeu nyhet das laus eq khanhamp eq ma xauh yhung das. Nvng zvbiq kuot toh das laus eq khanhamp eq ma xauh shuk das.

¹⁶Namoq gas hwankti Omri yahge nyah lo hwankti Ahab moq dah ma gis cho lhyi toeuq las chank yvmvyah haih zis bweh los das. Namoq gas nyamoq dah joeui da cho tsoq chank las ngos nvng lyis thyoq khyoq das. Dvkhauyah ngah dius jens lyis dius ngis khyoq las jwangh das.