Read Achang NAHUM 1 Bible Online

NAHUM 1 - Achang bible

NAHUM 1

¹Heika Elkosh mas dah Nahum nyvng dah nyoqnyvng, Ninewe wus lyis toeuq dah loeus nghuot.

²YHENSAIN Mangso ka nyang lyis xiq bang hank lyis eq ma jhen; nyang lyis loqyom tyonh bang lyis joeng. Nyang nhaiqlom dyis zis yah lvto phuk.

³YHENSAIN ka nhaiq lvnyap ma yo laus eq, nyang yomsoq bos las yobos bos soeu lhyi ma joeng khanhamp eq ma kat kat. YHENSAIN suh yvmas lyeisjyang toq los; jyommauh gas nyah khyei mhayah toqh dah phvlhau nghuot.

⁴Nyang, thomh lyis zaudang khyoq lyis houka kanh loh! Nyang jeislvng jens lyis kyuk nhang. Bashan katjang nyhauh loh. Kharmel boms muih loh, Lebanon mas dah ban eq shen tyamp.

⁵YHENSAIN xikkhonh mas boms jens dwis las jing jens yaus tyamp. YHENSAIN thuq los uhlyis nyeisjvng gas nonh nyeis. Mungkvn yahge nyah dius jens dvnganh nvn nyeis.

⁶Nyang nhaiqyo lyis hank yoh doeng das lah? Nyang gyukphoh nhaiqyo yvmas hank yoh doeng das lah? Nyang nhaiqyo nyilhyam huot kat lyis lukkuh gwi las nyah xikkhonh mas tsohmop bweh loh.

⁷YHENSAIN ka gis, nyang nyah dius jens lyis chiqjyen buisnyeis lyis gos toh dyei. Nyah jyank mas lhain los bang lyis nyang loqzamh zwi.

⁸Nyang gas nesthan dah jeisnhauq zis teh nyah jeswus jens[1] dvnganh lyis mhont. Nyang lyis loqyom tyonh bang lyis nyamoq dah shei cho pheh nhang kat.

⁹Namoq YHENSAIN lhyi tyi lha cha lhaink? Nyang namoq lyis mhont das. Nyang lyis dvlhain thoq lyis loqyom hank ma tyonh.

¹⁰Namoq yhei pauhzoe jens gas zoeugyomh yahge nyoq kyuk teh ngeh jom das.

¹¹Ninewe eh, nvng masyah lhung dah toeuq cho dyingh dyingh yah YHENSAIN lhyi lhaink soeu dvyuk thuq los.

¹²Heika YHENSAIN nyah dius Israel jens lyis taiq zis nghuot. Asiria jens gas yombos zis yahge nyo laus eq nyamoq gas mhont zis xauh las dyuk tyamp das. Ngah dius jens eh, ngos namoq lyis khamzo nhang laus eq ngos namoq lyis ma doms kuot lo das.

¹³Gvshih ngos nah thoq mas dah Asiria yomsoq lyis thank loh nhang lha, nvng lyis twih dah shamjvng khyauh das.

¹⁴Heika Asiria cho YHENSAIN lyi thyet toh. Nyamoq mas nyamoq dah nyings wons das vnyau vshih ma bos das. Ngos nyamoq dah yhenmuh jens mas dah phvra jens lyis mhont das. Asiria jens gas kang dwis ma mon las ngos nyamoq xiklyis lop sont nyeis.

¹⁵Yoeuh aq, loeus gis wons dah loeuskyoh soeu ka boms jens lyis lai las los nyeis. Nyang gas ung cho kyoh das zis nyah gyung cho mha nghuot. Yuda dius jens eh, Namoq dah pwe kuot las nvng Mangso lhyi dangthoengh toh zis dyei aq; Lhung bang gas nah mau mas khanhamp eq ma doms nyhenh wvng lo das. Nyamoq dvnganh mhont zis xauh goeus.