Read Achang NAHUM 2 Bible Online

NAHUM 2 - Achang bible

NAHUM 2

¹Ninewe eh, nvng lyis zan nyeis goeus. Nvng lyis thyoq sanh das soeu jweh los goeus. Jesdvp tsain sont geh! Talhoeu zungh geh, Jeszan das xiklyis sont geh.

²YHENSAIN ka Israel dah phunk lyis, nyah jeswus jens nyang lyis ma thyoq sanh shih uhlyis teh doms toeu bah ge.

³Jeswus jeslo jens gas gos nes tsain chi, dyimis thau eq nes zis wuot. Nyamoq gas zan das zis sont nyeis! Nyamoq dah jeslhyingh jens nyi soeh bvng nyeis! Nyamoq dah nyang jens[2] dyvm nyeis!

⁴Jeslhyingh gas wus talhoeu mha khat wuih las wus mas dius huom joqyos mas e los tsain duon loh. Houka nyiduk teh bvng las maunyoq teh nyik nyeis.

⁵Zau jens lyis khi kat las nyamoq gas xikpheh duon los lyis thungh lains. Jeszan bang gas wusciank mas duon loh las thoenkgus jesdvp thyoq das dom xiklyis gos tsain toeu tsung.

⁶Jeislvng yvm mas dah wus khomh jens buiq bangh los. Hwankti yhen ka gyukphoh zis yah dyingh joq.

⁷YHENSAIN ka jonsdoeus loh nhang das zis nghamh thyet goeus las, nyah jyeidwis jens khotjyauh jens teh noskyingh las, nyamoq sainhkhonh loq bat las tsain kuk nyeis.

⁸Dius jens gas Ninewe masyah thomh buiq las yaus loh dah jeis teh tsain phang thuq loh goeus. No geh, no geh ge kaiq lui laus eq hank eq ma tauh los lo.[3]

⁹Ngwis lhuot yoeus geh, xing lhuot yoeus geh: hauh wus gas zisyos yah dyingh joq.

¹⁰Ninewe gas dyoqbis goeus, jyamhjyuklhyuk sihyos nghuot goeus. Nhaiqlom jens gas chiqh zis yah dye yings tyamp. Phvlukchvp nvn las yom ma bos lo; nyoqnho eq tsain mi tyamp.

¹¹Khangkhyi lo whop joqyos, khangkhyi vlus vzains dvgeh suh las nyamoq dah khangkhyi lo jens eq jesluiq joqyos khangkhyi jens dah khyung teh nghuot dah wus, gvshih khalhye nghuot?

¹²Khangkhyi ka khat shoh lyis sat, khangkhyi zains yahge nyah lo jens xiklyis ngat chingh toh. Khangkhyi ka nyah khyung lhyi shoh chingh yah tyink toh.

¹³Maukhung Jesphung YHENSAIN taiq, Ngos nah jeswus nghuot. Ngos nah jeslhyingh jens lyis ngheq tyamp das. Nah jeslo jens jes mas shei das, nvng gohyuk dah lvnyhvp khanhamp eq ma doms yoeus lo das. Nah lvgyo jens sang cho ma xauhgyo lo das, ge.