Read Achang NAHUM 3 Bible Online

NAHUM 3 - Achang bible

NAHUM 3

¹Thyoq yoeus, lhuot yoeus das xiklyis yohkhuiq cho yah dyingh joq dah wus, hwah las dius sat dah wus gas mvtanhzoe nghuot.

²Lvxuk thwe, lhyingh thwe, nyang dyvm thwe, jeslhyingh wuih thwe lhyi gyo geh.

³Nyang ji dvp bang dyvm zan las sham ying lham ying bweh nyeis. Mvng vbomsdom joq: mvng ma thoq suon lo, dius jens eq houmha khyei uh thungh.

⁴Ninewe ge dah nghe nyhiq gas joeng zis xauh goeus. Nyang gas yungh las nghamh twih toh phoh zis yah dyingh joq. Nyang gas dius nyau jens lyis yoeuh ngwis nhang lha nyamoq lyis jons yoh shwih kuot.

⁵Maukhung Jesphung YHENSAIN taiq, Ninewe eh, ngos nvng lyis joeng das. Ngos nvng lyis shohchen shang lha dius nyau jens lyis nyvng nhang das. Nvng xoqphuh zis tsain nyvng das.

⁶Ngos nvng lyis vchoqh vlhauq kuot das, nvng lyis ma lhoq zis yah nghop das las dius jens nvng lyis gyuk zis yah yoeuh tsuk toh das.

⁷Nvng lyis nyvng bang dvnganh, nungsjik loh das. Nyamoq gas, Ninewe wus dyoq gyoh joq! Nyah xiklyis hank nhaiq vnyen au! Nyang lyis nhaiq hank taink mes das au, ge das.

⁸Ninewe eh, nvng Egutu wusmuh Thebe thoq lyis vzes gis lah? Nyang mas eq nyang lyis tyoyvm teh gos das zis jeis dvlvng yoh. Nile lvng gas nyang lyis khomp toh zis nghuot.

⁹Thebe gas Ethiopia yahge Egutu lyis guon khoq, nyah yomsoq lyis ma yoh keq. Libya gas nyah buisnoms nghuot.

¹⁰Nghuot laus eq Thebe dius jens gas jonsdoeus loh. Talhoeu cho thunk khanghmuh mas nyah loshang jens bat sat zis xauh. Nyamoq dah uhshe bang lyis shamjvng yah she loh zis xauh las nyamoq lyis nyhik bang mas tsain gvm goh.

¹¹Ninewe eh, nvng eq yhei yet nhaiq chuot das. Nvng eq nah jeswus jens masyah phang luiq shoq yomkat das.

¹²Nah thoenkgus jesdvp dvnganh gas shih nyhink joq dah maiphang shih zains teh nghuot das. Shih zains lyis nhont aq, hauh shih gas nah nhuot khau mha top gyoh los das.

¹³Nah jeswus jens xikkhonh mas nah jeslo jens gas vmesbih teh yom ma bos, nah mau eq khomp cho ma bos joq. Nah wus khomh, khomh kyank lyis nyi yah mhont das.

¹⁴Lhaink toh das xiklyis jeis kham sont toh aq. Jesdvp lyis yombos nhang geh! Tsenhchvp xiklyis mutsoh nang las mu phuot das zis cicont kuot geh.

¹⁵Nvng khasoeh kuot laus eq nvng gas nyi mas ngheq sat zis xauh das, nghuot ya jes mas gyoh das. Janghgyik gas jyo lhyi zo tomh teh nvng gas shang tyamp zis xauh das. Nvng gas janghgyik teh jebais los khoq.

¹⁶Nvng nah soenghi jens lyis maukhung kyi thoq lyis nyo shoq kuot thuq kat. Nghuot laus eq gvshih nyamoq dyuk loh goeus, janghgyik jens nyamoq dungs tyo lha dang loh teh nghuot.

¹⁷Nah zau jens gas ngamh nyeih lyis tyoyvm mas dap joq laus eq buis thuq los lyis dang loh las nyamoq khalhye loh zis hank eq ma seq kat dah janghgyik whom teh nghuot.

¹⁸Asiria hwankti zainsmuh eh, nah wus guon bang shei goeus, nah xamchangh jens eq vcaiq vto yhet joq. Nah dius jens gas boms mas tsain dyos yenh las nyamoq lyis yhen mha hank ma doms shwih los.

¹⁹Nah dvmdap cho xiklyis mvcheih ma bos, nah dvm ma yoh gis los. Nah dyoqbis cho loeus xauhgyo bang dvnganh gas gaus zis yah loq tsain tyuk. Nah ma thank lo lhoeng cho mhayah dvyuk yuk phang luiq ku lhyeh!