Read Achang HABAKUK 3 Bible Online

HABAKUK 3 - Achang bible

HABAKUK 3

¹Heika lvpe Habakuk dah shvmanh dung dang nghuot.[4]

²YHENSAIN eh, ngos nvng cha kuot khoq yvlyis xauhgyo goeus las gyuk zis yah dyingh joq. Gvshih ngamoq dah shishenh lyis eq, nvng gyangh kuot dah kuhxing muhzoh doms kuot aq. Nvng nhaiqyo uhlyis yangh nhaiqnyen aq.

³Mangso ka Edom masyah doms los nyeis; Gyingshang Mangso ka Paran jing jens masyah los. Nyah yunghshop phunk nyoqnho ngelang gas maukhung lhyi nghop las, nyeisjvng gas nyang lyis chungh cho yah dyingh joq. (Selah)

⁴Nyang gas bvng dah maunyoq nyik zis yah los; nyah yomsoq lyis bvng zis yah gos toh.

⁵Nyang nyah xik mas noslom nhang lha, shei cho ka nyah thang mha chank los nhang.

⁶Nyang yap lyis nyeisjvng gas nonh; Nyang yoeuh kat lyis dius nyau jens nvn nyeis. Vcaiq vto boms jens gas dyis loh; gohlhain nyang suh las vjangh joq dah jing jens gyop loh.

⁷Ngos Khushan dius jens gyuk nyeis zis eq, Midian dius jens nvn nyeis zis eq nyvng.

⁸YHENSAIN eh, nvng lyis nhaiqyo nhang zis jeislvng jens nghuot lhyeh? Nvng lyis nhaiqlom tsoeu nhang zis thomh nghuot lhyeh? Nvng gas jyommauh mas ji. Nvng nah dius jens jyank mas ung cho chi los uhlyis lyeisjyang jyommauh gas nah jeslhyingh nghuot.

⁹Nvng nah lyei yhung das zis cicont kuot: Nah nyo baiq das zis cicont kuot.[5] Nah maunyoq gas nyeisjvng lyis gwi loh nhang. (Selah)

¹⁰Boms jens gas nvng lyis nyvng lyis gyuk nvn. Jeis gas maukhung mhayah huot khyoq. Nyeiskhau mha dah jeis nyings nyeis. Nyamoq dah jeisphauq gas nyhang doq los.

¹¹Nah nyo dyvm zis yvng las bvng, nah lham ying ying nghuot las buis yahge lhamhmuh gas tsain no yap joq.

¹²Nvng gas nhaiqyo zis yah nyeisjvng cho, jens lai loh; Nvng nhaiqlom tsoeu zis yah dius nyau jens lyis nang nheh.

¹³Nvng nah dius jens yahge nvng khyen toh hwankti lhyi khyuot das zis thuq loh. Nvng Lhung bang dah uhjyung lhyi thungh thyi lha nyah thang chank bang lyis shank shoq mhont tyamp.[6] (Selah)

¹⁴Nah nyo jens gas nyah jesphung dah zau lyis baiq kyank tyamp. Nyah jesphung ka ngamoq lyis khat sanh das, nyungs bang lyis gauh zaiq bang teh, nyhau das ge, lyeismuh jyang teh los.

¹⁵Nvng thomh mas nah nyang yah nang thyi loh lyis than dah jeisphauq mas nyop thuq.

¹⁶Ngos haih zis dvnganh xauhgyo lyis ngos nvn nyeis. Gyuk las ngah nhuotkuk loek loek ko nyeis. Gungs eq nhuk gyoh las khyei eq lains bah ge. Ngamoq lyis zan bang lyis Mangso joeng das shishenh jweh das yvlyis ngos tsoek yah langh nyeis das.

¹⁷Maiphang zains vshih ma shih, zvbiq nwis mas zvbiq shih ma dap, tsanlun shih ma shih, yos mas eq jyo ma thuq; Yvng eq dvnganh shei lha noeu zungs eq vkom dvnghuot laus eq,

¹⁸Ngos gas gauslaus zis yah gaus nyeis shih das, khasoeh ge lyis YHENSAIN Mangso ka ngah khyuot yoeus soeu nghuot.

¹⁹Yomzains YHENSAIN ka ngos lyis yomdyei. Nyang ngah khyei lhyi cvt khyei teh kuot las, ngos lyis boms jens thoq mas jesluiq zis yah toh.