Read Achang ZEPHANIA 1 Bible Online

ZEPHANIA 1 - Achang bible

ZEPHANIA 1

¹Haih zis gas Amon lo Yuda hwankti Yosia zaih lyis Zephania lyis YHENSAIN dyei dah loeus nghuot. Zephania gas hwankti Hezekia mas yaus Amaria, Gedalia, Khushi lo nghuot.

²YHENSAIN taiq, Ngos nyeisjvng thoq mas zis dvnganh mhont das.

³Cangsoeu dius yahge gaunyhauq, nghoq yahge oengdoq lyis thyuk das. Lhung bang lyis shang tyamp das.[1] Ngos yuk khanghmuh lyis mhont tyamp las hank eq ma doeng nyeis lo das. Ngos YHENSAIN taiq goeus.

⁴Ngos gas, Yuda mau yahge Yerusalem wus mas bang dvnganh lyis joeng das. Houmha Bala lyis paiq cho shank shoq tomh das las hau Bala phvra lyis phuqsoe dah gohnyau phudyei bang lyis hank yangh ma soh lo das.

⁵Yhenkhung thoq mas doq las buislom, lhamhmuh yahge kyi jens lyis paiq soeu hank lyis laus eq mhont das. Ngos lyis paiq las dang jings das ge maukhi laus eq thang lhyi Molek mangso nyings mas kyamptang bang lyis eq mhont das.

⁶Ngah jyank masyah nungsdoms loh las ngah thang ma chank lo bang, ngah jyank ma los, nyamoq lyis choshe das zis ngos lyis ma sang bang lyis ngos mhont das, ge.

⁷YHENSAIN soetuon yvmas tsung das buisnyeis ni goeus; housoeh las nyah xikkhonh mas samlo nyeis geh. YHENSAIN ka nyah dius jens lyis phudyei das zis sont nyeis las Yuda lyis thyoq das zis jeswus jens lyis yus goeus.

⁸YHENSAIN taiq, Hau sat buisnyeis lyis ngos zau jens, hwankti lo jens yahge lvbaus lyi thungh chank bang dvnganh lyis joeng das.

⁹Gohnyau bang teh paiq bang yahge nyamoq dah yhensain yhen[2] lhyi lvnyhvp yah tyink das zis khauh bang, dius sat bang dvnganh lyis ngos joeng das.

¹⁰YHENSAIN taiq, Hauh buisnyeis lyis Yerusalem Oengdoq Khomh mas ngaus thwe xauhgyo das. Wus saiq chink pheh uhngauh thwe yahge jing jens masyah batkhyop thwe zainsmuh xauhgyo das.

¹¹Wus o chink pheh nyeis bang eh, namoq haih zis xauhgyo lyis ngaus geh. Khasoeh ge lyis soenghi jens dvnganh shei loh das.

¹²Hauh shishenh lyis ngos nyibung yoeus las Yerusalem lyis xo das. Vsainnyang ehnyet tap las nghamhnywe nyeis bang lyis joeng das. Nyamoq gas, YHENSAIN ka, gis gang khanhamp eq cha ma kuot, ge taiq zo.

¹³Nyamoq dah yohkhuiq cho ka lvnyhvp duot las nyamoq dah yhen ka monh loh das. Nyamoq gas nyamoq tsuk dah yhen mha khanhamp eq ma xauh nyeis das. Nyamoq tsungh dah zvbiq khyam mha dah zvbiq ma xauh shuk das.

¹⁴YHENSAIN dah buisnyeis zainsmuh ni los: houka svsoh ni las lvnyap los nyeis. Houka khoh buisnyeis nghuot das las womh thank jeslo jens xiklyis yangh yomgyau las kaiq ngaus das.

¹⁵Houka nhaiqlom dyis nyeih, yau las chiqjyen nyeih, thyoqpi lha dyoqbis nyeih, chuot las soeng soeng noq nyeih, noq las jyommauh nhoenk nyeih nghuot das.

¹⁶Jes lvbuh thwe yah dyingh nyeih, jeszan hoeu dah jeslo jens ciank ci wus jens yahge, nyhang dah tyoeuqzvm jens lyis zan nyeih nghuot das.

¹⁷YHENSAIN taiq, Ngos cangsoeu dius jens thoq mas hau dyoqbis zainsmuh she los das las yuk khanghmuh nyoqjet soeu teh sop yenh das. Nyamoq gas ngos yah tyi dah yaunos kuot goeus. Gvshih nyamoq dah suih jeis soeh huot das. Nyamoq mvng tsoh mas tsain bop joq das, ge.

¹⁸YHENSAIN nyah nhaiqlom dyis zis chixoeuq nyeih lyis, nyamoq dah ngwis xing yah yangh nyamoq lyis ma yoh khyuot yoeus. Nyah nhaiqyo nyi yah nyeisjvng gonh lyis mhont das. Nyang gas nyeisjvng thoq mas nyeis bang yuk khanghmuh lyis nyetlos nyettant tomh das.