Read Achang ZEPHANIA 2 Bible Online

ZEPHANIA 2 - Achang bible

ZEPHANIA 2

¹Ma daq xoq dah dius nyau eh, namoq lyis lyeis yah muot tangh dah phihsan teh khat tyamp zis ma xauh shih, YHENSAIN dah duk nyeis nhaiqyo nyi namoq thoq mas ma jweh shih lyis, nyang nhaiqlom dyis cho chixoeuq dah buisnyeis ma jweh shih lyis jus cho mha dvgeh huom geh.

³YHENSAIN dah tyingtoh dang lyis domsyos gyo las hauh mau mas noeuh nhamp dah dius jens dvnganh eh, nyah jyank mas tauh los geh. Jus zis kuot las YHENSAIN xikkhonh mas ehnyet nyhen mha gyoh nyeis geh. YHENSAIN nyah nhaiqyo cho chixoeuq nyeih lyis nvng joeng cho mhayah phang luiq das mvbeh.

⁴Gaza wus mas hank ma nyet lo das. Ashkelon wus gas jyamhjyuklhyuk mus das. Ashdod bang lyis dvkhyauq lyis khat tyamp[3] las Ekron bang lyis nyamoq wus masyah khat tyamp das.

⁵Thomh yvm chank yah nyeis dah namoq Philisti jens gas mvtanhzoe nghuot. YHENSAIN ka namoq lyis dang thang thyet goeus. Nyang namoq lyis mhont das las namoq dvyuk eq ma nyet lo das.

⁶Thomh yvm mas namoq dah maunyeis gas yvng yoeuh bang dah zvng yahge yvng phung dah mhanh yos janggyon bweh das.

⁷Doeng nyeis dah Yuda dius jens gas namoq dah mau mas wvng nyeis das. Houmha nyamoq dah yvng phung tsoh las Ashkelon dah yhen mha tsain yhet das. YHENSAIN, nyamoq dah Mangso ka nyamoq yah nghuot das las, nyamoq lyis nyeis gis yap doms lhoq nhang das.

⁸Maukhung Jesphung YHENSAIN taiq, Moab yahge Amon dius jens gas ngah dius jens lyis maphauh gis jwangh jausxo zis yahge nyamoq dah mau xauh yoeus das ge moengs zis ngos xauhgyo goeus.

⁹Jyoengh ngos dwis nyeis YHENSAIN, Israel dah Mangso nghuot zis yah dvyhangteh, Moab yahge Amon gas Sodom yahge Gomora teh mhont tyamp zis xauh das, oen ngos maukhi. Hauh zis gas coh dwang tsain bos, vcaiq vto dyoq gyoh joq las nyoq yah nghop dah joqyos duot das. Doeng nyeis dah ngah dius jens gas nyamoq lyis thyoq das nyamoq dah mau lyis yoeus das, ge.

¹⁰Houka Moab yahge Amon dius jens Maukhung Jesphung YHENSAIN dah dius jens lyis nyamoq lhoq lhoq teh khwank zis yah maphauh gis kuot gvng mas joeng zis khasoeh xauh das cho nghuot.

¹¹YHENSAIN ka nyamoq lyis kyuk tant das. Nyang gas nyeisjvng thoq mangso jens lyis thank loh nhang lha, dius nyau khanghmuh hank eq hank nyang mau masyah nyang lyis paiq das.

¹²YHENSAIN ka Ethiopia dius jens lyis eq sat das.

¹³YHENSAIN ka Asiria lyis mhont das zis nyah yomsoq yhung das. Nyang Ninewe wus lyis jyamhjyuklhyuk, jeis ma joq dah sihyos kuot das.

¹⁴Houka yvng phung, noeu phung, gaunyhauq vja ja whop joqyos nghuot das. Khunghbop jens houmha nyeis das las khomhbaiq masyah nyings das. Kvnhoq jens gas zvmlhangh keq masyah nghaq das.[4] Hau tsuk toh yhen jens mas dah arit saiq lyis thyoq yoeus loh das.

¹⁵Houka nyang yomsoq bos, jesluiq ge khwank nyeis dah wus bweh los das cho nghuot. Hauh wus mas dah dius jens gas, nyamoq dah wus gas mungkvn mas kuhxing thank zis nghuot ge, nghamh nyeis. Nyang jyamhjyuklhyuk joqyos bweh das, yewus jens no nyeis joqyos bweh das. Suh lai bang yuk khanghmuh gas, gyuk zis yah nungs jik loh das.