Read Achang ZEPHANIA 3 Bible Online

ZEPHANIA 3 - Achang bible

ZEPHANIA 3

¹Vsainnyang dah dius jens lyis zaiq, wotwu dyoq las gomloeus toq dah Yerusalem wus gas mvtanhzoe nghuot.

²Nyang gas YHENSAIN dang lyis ma gyo, nyang jyauh zis ma kham, YHENSAIN lhyi ma loms, nyang pangh cho lhyi ma sang.

³Nyah zau jens gas nyings dah khangkhyi jens teh, nyah soetuon bang gas, nyo nyoqnoq las nvp yo jweh shoq shohyau ma kat khyoq yuot dah cauhpau jens teh nghuot.

⁴Lvpe jens gas yvwons ma yoeus tsain mhuih bang nghuot. Phudyei bang gas gyingshang yvlyis vwot v-oeu kuot las Mangso dah lyi lyis nyamoq nyang vkyuh xiklyis tsain lhoeu nhunk.

⁵Nghuot laus eq YHENSAIN ka hauh wugungs mas nyeis shih. Nyang gas jus zis kuot las khanhamp eq shuot zis ma kuot. Nyang khanhamp eq ma i, nvp yau nvp nyah dius jens jyank mas lyi jus cho chi los. Nghuot laus eq houmha ma dan bang gas shuot cho tsoq kuot nyeis las nyamoq ma xoq.

⁶YHENSAIN taiq, Ngos dius nyau jens dvnganh lyis dom nhang goeus. Nyamoq dah wus jens lyis mhont las nyamoq dah ciank yahge tyoeuqzvm dyoq gyoh joq. Wus jens jyamhjyuklhyuk joq; talhoeu jens eq vkom joq, hank eq ma nyet lo.

⁷Hauh yoq lyis ngos nghamh zis gas, ngah dius jens gas ngos lyis gyukwoms zis yah ngos jyauh cho lhyi lhom yoeus lyis gas, ngos nyamoq nyeis dah joqyos lyis ma thyet tyamp das oen. Nghuot laus eq ma nyangh lyis nyamoq gas ma gis dah wotwu vgus dvkuot nyeis.

⁸YHENSAIN taiq, dvlangh aq, Ngos dius nyau jens lyis toq kauq buisnyeis lyis langh aq. Ngah nhaiqyo cho lhyi kham nhang das xiklyis dius nyau jens yahge munghdan jens lyis tsainh das zis nghamh thyet goeus. Nyeisjvng gonh ngah nhaiqlom dyis nyi yah monh tyamp das.

⁹Hauh thang lhyi ngos dius nyau jens dah dius jens lyis thaiq tyamp das las nyamoq gas gohtoeu mangso jens lyis ma dung, ngos lyis kyingh dung das. Nyamoq dvnganh ngah domsyos gyo das.

¹⁰We dah Ethiopia mau masyah yangh dyos joq dah ngah dius jens gas ngah jyank mas jyungshuk chi los das.

¹¹Hauh shishenh lyis namoq ngah dius jens gas, ngos lyis gomloeus toq gvng mas ma xoq nyeis chah lo. Ngos gas lhoq lhoq teh khwank soeu khanghmuh lyis shang tyamp das las namoq gas ngah gyingshang jing[5] mas ngos lyis gomloeus khanhamp eq ma doms toq lo das.

¹²Ngos houmha ehnyet nyhen mha gyoh las noeuhnhamp bang, pangh das xiklyis ngah jyank mas los bang lyis nyhet toh das.

¹³Israel jens doeng nyeis bang hank lyis eq ma cu, hwah dang ma taiq, ma mhuih. Nyamoq gas nyeisgis yaplhoq das, jesluiq las hank lyis eq ma gyuk noh.

¹⁴Israel dius jens eh, lvkhyank kat las gauslaus zis yah kaiq geh! Yerusalem eh, nah ehnyet gonh gauslaus aq!

¹⁵YHENSAIN ka nvng lyis joeng cho thank loh nhang goeus. Nyang nah jeswus dvnganh lyis shang tyamp goeus. YHENSAIN, Israel hwankti ka nvng yah nghuot; gvshih gyuk chank ma bos lo.

¹⁶Yerusalem lyis nyamoq heisoeh taiq das shishenh jweh los, Zion wus eh, Vgyuk, nah loq lyis vdyungh nhang!

¹⁷YHENSAIN namoq dah Mangso ka namoq yah nyeis. Nyah yomsoq gas nvng lyis ung cho dyei. YHENSAIN ka nvng mas pyo cho bos das. Nyah jyetdap yvmas nyang nvng lyis kang saiq dyei das.[6] Nyang nvng mas lvkhyank kat las gauslaus das.

¹⁸Pwe mha dius jens gauslaus teh gauslaus das. YHENSAIN taiq, Nvng kuk las jom das cho lhyi thank loh nhang lha nah nyoqnho ngelang gyoh cho yoeus tyamp goeus.[7]

¹⁹Ngos nvng lyis zaiq bang lyis joeng das shishenh jweh los. Ngos khyei ma yangh bang dvnganh lyis khyuot las jonsdoeus loh bang lyis yhen mha shwih los das. Ngos nyamoq dah xoqphuh cho lhyi nyoqnho ngelang pheh thaiq kat das las mungkvn gonh nyamoq lyis chungh das.

²⁰Ngos dyos sanh joq dah nah dius jens lyis yhen mha shwih los das shishenh jweh los! Ngos nvng lyis mungkvn dvkhauyah nyings hoeuh nhang das las namoq lyis dvlhain nyeisgis yap doms lhoq nhang das. YHENSAIN taiq goeus, ge.