Read Achang HAGAI 1 Bible Online

HAGAI 1 - Achang bible

HAGAI 1

¹Persia hwankti zainsmuh Dari doq dah aiq vzvn gyo khyuk vkhyvp cangxeih vnyeih lyis YHENSAIN ka lvpe Hagai lyis yah taiq. Hauh loeus gas, Shealtiel lo Yuda mungh zau Zerubabe yahge Yehozadak lo, phudyei zainsmuh Yoshua xiklyis nghuot.

²Hagai lyis Maukhung Jesphung YHENSAIN taiq. Haih dius jens gas, haih zis Yhenmuh doms tsuk das shishenh ma nghuot shih, ge.

³Hauh thang lhyi YHENSAIN ka dius jens lyis lvpe Hagai lyis yah haih loeus dyei.

⁴Ngah Yhenmuh gas dvdyoq gyoh joq shih lyis, namoq gas chamus tsuk yhen mha yoh lungh nyeis goh?

⁵Namoq mas cha bweh nyeis zis ma nyvng goh lhyeh?

⁶Namoq jyo nyoshoq khyoq laus eq dvtsiq dvxauh yhomh. Zo das zonoms yoh laus eq jo shoq zo das zis ma tham. Shuk das zvbiq yoh laus eq yet shoq shuk das zis ma tham. Dyimis yoh laus eq nywe shoq wuot das zis ma tham. Uhkung kuot zo bang eq nyamoq womdau khoeu ko ma yoh.

⁷Haih zis chamus bweh yvlyis namoq ma nyvng lhyeh?

⁸Gvshih jing mas doq, thyeh khwih las Yhenmuh doms tsuk geh. Housoeh ngos nhaiqdoeus das las, ngos lyis paiq chah zis yah dvyhangteh yoh tsain paiq das.

⁹Namoq gas jyo nyoshoq xauh yhomh das ge nghamhloms laus eq dvtsiq dvyoh. Hauh zis yhen mha chi los lyis ngos mhuot tyamp[1]. Ngos housoeh chamus kuot? Khasoeh ge lyis ngah Yhenmuh dyoq gyoh joq shih lyis namoq yuk khanghmuh gas vsainnyang yhen kuot yvmas muh nyo nyeis.

¹⁰Housoeh yvmvyah mau ma wus las cha ma yoh yuk.

¹¹Ngos hauh maunyeis lyis eq, jing jens lyis eq, sunghso yos, zvbiq khyam, tsanlun shih khyam nyeisjvng masyah thuq dah jyo, dius, gaunyhauq yahge nvng xoh dah vzains dvnganh lyis kyuk nhang.

¹²Hauh thang lhyi Zerubabe, Yoshua yahge Babilon mas jonsdoeus masyah tauh los[2] dah dius jens dvnganh gas YHENSAIN, nyamoq dah Mangso nyamoq lyis kuot aq ge taiq zis kuot. Nyamoq gyuk las YHENSAIN dah loeus kyoh soeu lvpe Hagai dah domsyos tsain gyo.

¹³Hauh thang lhyi Hagai gas dius jens lyis YHENSAIN dah loeus dyei. Ngos namoq yah dvgeh nghuot das - houka ngah dangthoengh nghuot, ge.

¹⁴YHENSAIN ka Yhenmuh kuot das bang yuk khanghmuh lyis dyos muot kat dyei. Nyamoq Yuda mungh zau Zerubabe, phudyei zainsmuh Yoshua yahge jonsdoeus masyah tauh los dah dius jens dvnganh nghuot. Nyamoq gas Maukhung Jesphung YHENSAIN, nyamoq dah Mangso Yhenmuh lyis tsain kuot xi.

¹⁵Houka Dari, hwankti zainsmuh doq dah aiq vzvn, khyuk vkhyvp, aiqci nyei vnyeih lyis nghuot.