Read Achang HAGAI 2 Bible Online

HAGAI 2 - Achang bible

HAGAI 2

¹Hau dvyhangteh vzvn, lhamhmuh nyhet vkhyvp, aiqci dvnyeih lyis YHENSAIN ka lvpe Hagai lyis yah doms taiq.

²Nyang Hagai lyis taiq, Yuda mungh zau Zerubabe, Phudyei Zainsmuh Yoshua yahge dius jens lyis taiq aq,

³Hauh Yhenmuh kha iq yunghshop khoq zis soh shih bang namoq mas dvyuk yuk vbos lah? Gvshih haih zis khasoeh teh zis nghuot joq? Houka cha ma nghuot teh mus joq vnghuot lah?

⁴Nghuot laus eq namoq gvshih hank eq yom vgyau goh. Ngos namoq yah dvgeh nghuot yvmvyah hauh muh zwi geh.

⁵Namoq Egutu masyah thuq los uhlyis, ngos vjangh namoq yah dvgeh nghuot das oen dangthoengh toh. Ngos namoq yah dvgeh nghuot shih, housoeh las vchiq goh.

⁶Ma nyangh lyis ngos maukhung nyeisjvng, thomh yahge tungyos lyis nhont das.

⁷Ngos dius nyau dvnganh lyis thyoqpi das, nyamoq dah zisyos heimha yoeus los nhang das las Yhenmuh gas yohkhuiq cho yah dyingh das.

⁸Mungkvn mas dah ngwis xing dvnganh ngah zis nghuot.

⁹Yhenmuh vsaiq gas vcauh thoq lyis zes yunghshop las houmha ngos ngah dius jens lyis nyeisgis yaplhoq cho yahge nyenstap cho dyei das. Maukhung Jesphung YHENSAIN taiq goeus.

¹⁰Dari hwankti zainsmuh doq dah aiq vzvn, lhamhmuh gau vkhyvp, aiqci nyei vnyeih lyis Maukhung Jesphung YHENSAIN ka lvpe Hagai lyis doms jis.

¹¹Nyang taiq, Phudyei bang lyis hai lyi cho nyeidang nyei aq.

¹²Oen goh, dvyuk yuk kyauh toh goeus dah phudyei masyah shoh yoeus las nyah dyithang yah koek los thang lhyi, nyah dyi yah ohlhyoq, jyauq goeus zonoms, zvbiq, tsanlun coeu, chah zonoms lyis laus eq tanh nhang lhyi, hauh zonoms eq kyauh das lah, ge nyei lyis phudyei bang gas, Ma nghuot, ge toeuh.

¹³Hauh thang lhyi Hagai nyei, oen goh, dvyuk yuk gas mvng lyis zangh yvmvyah vwot v-oeu bweh nyeis. Nyang haih zonoms dvja ja lyis tanh lyis hauh zonoms eq vwot v-oeu vmus lah, ge nyei lyis, Phudyei bang gas, Mus, ge tsain toeuh.

¹⁴Hauh thang lhyi Hagai taiq, houyah dvyhangteh haih dius nyau dah dius jens gas nyamoq kuot zis dvnganh vwot v-oeu nghuot las phon mha nyamoq dyei dah phudyei dvnganh gas vwot v-oeu nghuot, ge YHENSAIN taiq.

¹⁵YHENSAIN taiq, Namoq mas cha bweh yvlyis ma yoh nyvng goh lhyeh? Namoq Yhenmuh ma doms xi tsuk shih lyis,

¹⁶Namoq jyo aiqci luh yoh das ge nghamhloms dah jyo boms mas loh lyis dvci luh dvyoh. Tsai zvbiq oengci joi yoh das ge dah zvbiq nyhet zwvng mas loh lyis aiqci joi dvyoh.

¹⁷Ngos namoq yomkat tsungh toh dah jyozains dvnganh lyis lyeis gywes muot nhang lha eq, gyutomp nhang lha eq dyoq loh nhang, nghuot laus eq namoq ehnyet ma thaiq shih.

¹⁸Khvnyhik gas Yhenmuh vpom dye xi zis Lhamhmuh gau vkhyvp, aiqci nyei vnyeih nghuot. Gvshih masyah cha bweh los das zis yoeuh geh.

¹⁹Jyo ma nyet laus eq, zvbiq nwis, maiphang zains, tsanlun zains, tvleh vshih ma tsain shih shih laus eq, gvshih masyah ngos namoq lyis shvmanh dyei das, ge.

²⁰Hau dvyhangteh nyeih, hau lhamhmuh khyvp 24 vnyeih lyis YHENSAIN ka Hagai lyis aiq vlhain loeus dyei.

²¹Yuda mungh zau Zerubabe xiklyis: Ngos maukhung yahge nyeisjvng lyis nhont bah oen.

²²Ngos munghdan lyis mhuk las nyamoq dah yomsoq lyis thank loh nhang. Ngos nyamoq dah jeslhyingh yahge jeslhyingh komp bang lyis toeulhain das. Nyang jens shei das las nyang ji bang nyamoq nyang changh sat goh das.

²³Ngah jyeidwis Zerubabe eh, hauh buisnyeis lyis ngos nvng lyis shwih yoeus las ngah nyings mas guon das zis toeuq toh das. Nvng gas ngos khyen yoeus soeu nghuot. Maukhung Jesphung YHENSAIN taiq goeus.