Read Achang ZEKHARIA 1 Bible Online

ZEKHARIA 1 - Achang bible

ZEKHARIA 1

¹Dari, Persia hwankti zainsmuh doq zis aiq vzvn, xet vkhyvp lyis YHENSAIN ka Berekhia lo, Ido nyeilo lvpe Zekharia lyis haih loeus dyei.

²Maukhung Jesphung YHENSAIN ka Zekharia lyis yah dius jens lyis taiq nhang. Ngos YHENSAIN namoq dah phauh thyeih moq lyis svsoh nhaiqyo.

³Nghuot laus eq gvshih ngos nvng lyis taiq bah, Ngah jyank mas tauh los geh, housoeh lyis ngos namoq jyank mas tauh los das.

⁴Namoq dah phauh thyeih moq teh vkuot goh. Gohlhain dah lvpe jens gas nyamoq lyis ngah loeus dyei zis yah ma gis khyvlyis kang ma dwis, yaunos vkuot lo goh, ge. Nghuot laus eq nyamoq ngah dang ma gyo, domsyos eq ma gyo.

⁵Namoq dah phauh thyeih moq eq, hauh lvpe jens eq ma nyeis lo.

⁶Ngos ngah jyeidwis lvpe jens lyis yah namoq dah phauh thyeih moq lyis tyingtoh dang yahge zaih nhang cho dyei laus eq nyamoq hauh yvlyis chaxwe ma nhang lha joeng cho xauh kham. Hauh thang lhyi nyamoq ehnyet thaiq las Ngos Maukhung Jesphung YHENSAIN nghamh thyet goeus zis yah dvyhangteh, nyamoq mon-yih las joeng zis xauh, ge seq los.

⁷Dari hwankti zainsmuh doq dah aiq vzvn, dvci das vkhyvp, aiqci nyei vnyeih, nyenh lyis nyoqnyvng mas YHENSAIN ngos, Berekhia lo, Ido nyeilo lyis loeus dyei.

⁸Ngos dius dvyuk nyang nes ji los zis nyvng. Nyang gas langhkhau mha dah zoeu kyank gyomh mas no yap joq. Nyah nungsthank mas nyang nes, nyang kywank, nyang thyoeu jens tsain yap joq.

⁹Ngos nyang lyis, Svra eh, haih nyang jens gas chah vjyuk gah, oen nyei. Nyang toeuh zis gas, Hauh zis chah vjyuk tsain nghuot yvlyis ngos nvng lyis chixoeuq bah.

¹⁰Nyeisjvng lyis loh jas yoeuh das xiklyis YHENSAIN nhang kat bang nghuot, ge.

¹¹Nyamoq gas loeuswons soeu lhyi, Ngamoq mungkvn gonh jweh khoq goeus, mungkvn gonh gas sam lha nyenstap joq zis nyvng, ge taiq kyoh.

¹²Housoeh loeuswons soeu taiq zis gas, Maukhung Jesphung YHENSAIN eh, nvng Yerusalem yahge Yuda wus jens lyis nhaiqyo zis gvshih nyhetci zvn bos goeus. Nvng nhaiqnyen cho ma chixoeuq zis khanyhank nyangh shih das lah, ge.

¹³YHENSAIN ka loeuswons soeu lhyi nhaiqtaink dang yah toeuh.

¹⁴Housoeh loeuswons soeu ka ngos lyis, Maukhung Jesphung YHENSAIN taiq zis taiq hoeuh aq, ge. Ngos ngah Zion boms yahge Yerusalem lyis kang twih toh.

¹⁵Nyenstap zis yah samlo gauslaus nyeis dah dius nyau jens lyis ngos nhaiq gis yo: khasoeh ge lyis ngos ngah dius nyau lyis nhaiqyo zis doms jhen nyeis uhlyis hauh dius nyau jens gas ngah dius jens lyis zes xungh shoq kham nhang.

¹⁶Housoeh las ngos Yerusalem mas tauh los goeus las, hauh wus lyis ngah nhaiqnyen cho chixoeuq das. Ngah Yhenmuh doms toeu das. Wus eq doms soq kuot das, ge.

¹⁷Loeuswons soeu ngos lyis taiq hoeuh aq, eq ge. Ngos ngah wus jens lyis nyeisgis yap doms lhoq nhang das las Yerusalem lyis dvlhain doms pangh zis yah nyah wus khyvlyis hoeuh das, ge Maukhung Jesphung YHENSAIN taiq.

¹⁸Gohtoeu nyoqnyvng mas ngos noeu khyau nyei koeuq nyvng.

¹⁹Ngos hau ngos yah jisgoh goeus dah loeuswons soeu lhyi, Haih khyau jens gas chah vjyuk tsain nghuot, oen nyei. Nyang toeuh zis gas, Haih khyau jens gas Yuda mau dius, Israel mau dius yahge Yerusalem wus mas bang lyis lhoq sanh dah mungkvn yomsoq lyis chixoeuq dah vlho tsain nghuot, ge.

²⁰Tsai YHENSAIN ngos lyis doeus tsain chi toh dah muh zwi bang nyei yuk chixoeuq.

²¹Ngos gas, Nyamoq cha los kuot, oen nyei. Nyang phuk taiq zis gas, Nyamoq gas Yuda mau lyis shank shoq thungh thyi lha nyah dius jens lyis lhoq sanh tyamp dah dius nyau jens lyis kyuk zis yah mhuk tyamp das xiklyis los bang nghuot, ge.